LWIKHI 19

Jezwi lɛ Zache hwan

1Lóka Jezwi di Jerikho, ló ńmúrikhɔ ákhúbhɛ́ hrómɛn ánno. 2Bhringbi bɛn óche Zache khɛ́n ali la-nphodómán-óthe bha lóne. 3Zache énɛn awú lephan ali Jezwi, lókhɛ́n ápasá phu mɛ́n hɛ́nmɛn si. Lónian mɛn khɛ́n ńnɛn khɔn hɛ́nthé, ánnɛn gɛ wú nkɛ. 4Lóhɛ́nthé ńwa no hɛ́nmɛn, ló áyá bɛn óche Sikhomɔ, ńpha ka lótho, sa anwú Jezwi ebhá khɔ́ lóne bha hɛ́n. 5Lóka Jezwi di lóne, lótɛ ńje mɛ tho, ló ńkránman Zache sa:

– Zache, diathé gbraa, áyɔn salé ncɛ́n mɛn nɛ́ hɛ hwan.

6Zache diathé hɛ́nmɛn hɛ́nmɛn, ló ńdo Jezwi áphɔhá mɛn. 7Néphan khúnbrɛn awu lóyí lókɔn, ńthɛ́nyan ka wo hromɛn, ló wo étɔ sa:

– Lephan lókɔn lo lɛ newo hwan!

8Zache chanfe ya Jezwi hɛ́nmɛn ló ńkránman nkɛ sa:

– Hwánthe ɛye, mɛn yí khúnbrɛn khɛ́n mɛn pɛ ɔn, mán múri ndɔn mɔn, ló man khwɛ́n lókhu sé gbremán. Ló kasé mɛn khrɛ lephan bɛn khwɛn mɛ́n jɛtɛn, mán wrɔ lómɛ́n yábhɛ brɛ lí ńdɔn bhwelí sé lólephan.

9Ló Jezwi tɔ sa:

– Ncɛ́n, wo swa ábháthónɛ́n khúnbrɛn lókɔn, lósi akhɔ tɛ ɔn, lephan lókɔn lɔ li Ábrahámɛn njibhi. 10Átɛsalé Lephan Mi bha énɛn néphan alia, ló answa nkɔn.

Ńcí fránkhi phɔ yandran obhu

(Ɔ́n wú Mat 25.14-30)

11Lóka néphan eyé bhwe khúnbrɛn lókɔn, lótɛ Jezwi cu bhu yandran bɛn se nkɔn. Lóka lókɔn ɔn, ńgbali Jeruzalɛ́mɛn phɔ phu, ló néphan ebhú salé, thénthé tɛɛ nɔn Yankan Bhringbi khúbhɛ́ ebhá thándi. 12Ló yandran ńmu nɔn ali sa:

– Bhadremán hrómɛn, lephan bɛn eló ákhúbhɛ́ bɛn abha thwethwemɛn-áan lo se osɛn anní athe, khɛ́n lómánji ansáji má. 13Lóka anmán no, ńche mɛ́n nɛnkhwɛ́nmán áwɔ́ ma, ńse nkɔn ncí fránkhi brɛ brɛ, ló ńkránman nkɔn sa: “Ɔ́n mó jɛtɛn lókɔn pɛ lí mátra kábrɛ kábrɛ mɛn sáji má.” 14Khɛ́n wo khúbhɛ́nɛ́n sa nkɛ mɛ; lóhɛ́nthé wo chɛ mranchɛ́mán bho nkɛ mánji pɛ lo étɔlé: “Lo le pɔ salé lephan lókɔn otré lo lé.”

15– Khɛ́n wo sɛn ńni bhringbi, ló ńsáji ma wo khúbhɛ́. Ńchɛ oche nɛnkhwɛ́nmán khɛ́n ńse khwɛbhí olí mátra salé nkɔn bha yɛn fɛ́n se. 16Sithwáwo bha, ló ńtɔ sa: “Hwánthe, hɛ ncí fránkhi khɛ́n ɛse mɛn ɔn, mɛn cu gɛ áwɔ́ mɔ́tho.” 17Ló bhringbi krɛnmɛn sa: “Ɛtɛ yɔn pán, nɛnkhwɛ́nwo bhwá, hɛ lí ɛli mɛ́nbrɛ áyí chɛ́-nchɛ́ hrómɛn hɛ́nthé, mɛn san hɛ chre ákhúbhɛ́ áwɔ́ tho.” 18Nɛnkhwɛ́nwo adɔngba bha, ló ńtɔ sa: “Hwánthe, hɛ ncí fránkhi khɛ́n ɛse mɛn, mɛn cu gɛ mwannán mɔ́tho.” 19Ló bhringbi kranman nɛnkhwɛ́nwo lókɔn sa: “Hɛ ɔn, mɛn san hɛ chre ákhúbhɛ́ mwannán tho.” 20Nɛnkhwɛ́nwo nankhɛ lójɔ bha, ló ńtɔ sa: “Hwánthe, mɛn mo hɛ ncí fránkhi hrɔman ádɛgɔn hromɛn tre hɛ lé, nɛn ló o. 21Mɛn só hɛ, hɛ lephan khrákhrá ɛli hɛ́nthé. Hɛ, áyí ɛle bho tre lɔ, ɛbhó, saji ńyámí ɛle ha lɔ, ɛ́bwan.” 22Ló bhringbi kranman nkɛ sa: “Nɛnkhwɛ́nwo phromɛn, hɛ bɛn nbrɛn bhwe ɛtɔ, lótho nɔn mán ya mɔ́ hɛ kwa. Ɛyɛn sa mɛn ni lephan khrákhrá, áyí mɛn nɛn mo tre lɔ, mɛn mó, saji ńyámí mɛn nɛn ha lɔ, mɛɛ́n bwan. 23Ló kasé áli nɛn, ɛbhó mɛn khwɛbhí lo tré ási otré khwɛbhí lé, ochɛ́sé lóka mɛn saji ma ɔn, ápɛ yí bhrií bɛn ábha bhɔ́ mɛn jɛtɛn tho.” 24Lómánji, ńkránman néphan aya lóne sa: “Ɔ́n thándo ncí fránkhi brɛ lókɔn abha mɛ́n yé, ló lephan khɛ́n apɛ ncí fránkhi áwɔ́, ɔ́n mó kɛ́ ne.” 25Ló wo kranman nkɛ sa: “Hwánthe, ńpɛ ncí fránkhi áwɔ́!” 26Ló ńtɔ sa, mɛɛ́n kranmán hɔ́n: “Lephan apɛ yí thúbhɔ, óbha cu bhó yí bhɔ́ nkɛ tho; khɛ́n lephan alepɛ yíɛkɛ, lóbhrií lókɔn ńpɛ ɔn, lólɔ óbha thándo yɛn. 27Ló mɛn mɛsamán khɛ́n ale pɔ salé mɛn ní wo bhringbi ɔn, wo-ɛ ɔ́n khwɛ́n wo bhá krɛn, ló mɛn hɛ́nmɛn, ɔ́n wɛ́n wo khúnbrɛn.”

Jezwi eló Jeruzalɛ́mɛn

(Ɔ́n wú Mat 21.1-11; Ɔ́n wú Mák 11.1-11; Ɔ́n wú Jan 12.12-19)

28Lóka Jezwi tɔ bhwe lókɔn phu, ńsa thwasi ya ápasá hɛ́nmɛn annó Jeruzalɛ́mɛn. 29Lóka ńgbali Bɛthifaje le Betani ɔ́nmɔn khúbhɛ́ agbali ábhóbhó óche Olive-nyá bhóbhó phɔ, lótɛ ńchɛ mɛ́n yíchwɛmán mɔn yí, ló ńkránman nkɔn sa:

30– Ɔ́n nó ákhúbhɛ́ atre hɔ́n hɛ́nmɛn. Lóka ɔ́n di lóne, ɔ́n ma wú frímú mi bɛn odi bhɛ́ ya, ále ka pɛ lephan achre mɛ́n tho. Ɔ́n hrwɛn, ló ɔ́n hɔ́n-ɛn ɔ́nmɔn bhá. 31Ló kasé lephan bɛn ébhi hɔ́n lée: “Bítɛ khɛ́n hɔ́n éhrwɛn frímú?” ɔ́n krɛnmɛn lée: “Hwánthe énɛn.”

32Néphan lókɔn khɛ́n wo chɛ yí, wo lo, ló wo priman gɛ áyí Hwánthe tɔ lóphɔ bhwe khúnbrɛn simɛ́n cɛ́ɛ́. 33Lóka wo éhrwɛn frímú mi, lótɛ néphan ali wo frímú ébhi nkɔn sa:

– Bítɛ khɛ́n hɔ́n éhrwɛn frímú mi lókɔn ɛ?

34Ló wo nkɛé:

– Hwánthe nɔn énɛn.

35Lómánji wo hɔn frímú mi bha se Jezwi, wo khwɛn wo ntráliɛ́ khónkhó fa nkɛ tho, ló wo hɔn Jezwi chre nkɛ tho. 36Lóka wo élo, lótɛ néphan ekhwɛ́n wo ntráliɛ́ khónkhó fa sitó. 37Lóka wo khɔ ásitó achan Olive-nyá bhóbhó tho ebhá, lókhɛ́n wo égbalí Jeruzalɛ́mɛn phɔ, lótɛ áphɔ ehá yíchwɛmán npasá, ló wo elúkhwɛ́ átɔ́ khrákhrá mɛn lri Yankan hwa, hɛ́nmɛntányí khúnbrɛn lókɔn khɛ́n wo wu hɛ́nthé, 38ló wo étɔ sa: “Tɛmɛ Yankan obhɔ́ bhringbi ebhá Hwánthe hɛ́n hrómɛn ndu! Ńthɛ́nkhwálé obhá átho, ló ńguhá ogɛ Yankan!”

39 Fariziɛnnɛ́n mɔ́nbɛn abha ápasá hrómɛn ékranmán Jezwi sa:

– Yíliéwo, chɛ hɛ yíchwɛmán otémélé a.

40Ló Jezwi tɔ sa:

– Mɛɛ́n kranmán hɔ́n gbée salé, kasé wo temélé, ńmú bha lu nkhwɛ́!

Jezwi ethɔ́n hɛ́ndu há Jeruzalɛ́mɛn tho

41Lóka Jezwi gbali Jeruzalɛ́mɛn khɛ́n anwú ákhúbhɛ́ lókɔn, lótɛ anthɔ́n hɛ́ndu há nkɛ tho, 42ló ántɔ sa:

– Hɛ lɔ, áli ɛyɛ́n áyí khɛ́n ncɛ́n cí ágɛ chɛ́ hɛ pɛ thɛ́nkhwálé ka ábha yɔ́n! Khɛ́n lóyí lókɔn ɔn, thénthé áhrɔ́man hɛ hɛ́nmɛn, áchɛ́se ɛ́le gɛ wú! 43Khɛ́n ácí ebhá, hɛ mɛsamán bha bɔn nɔn jekhalí hɛ, wo bhá phú hɛ si, ló wo bhá khɔ́ hɛ ngrɛmɛ́n ngrɛmɛ́n si khúnbrɛn si hɛ ha. 44Wo bhá lɔ hɛ le hɛ miɔn ɔ́nmɔn, ló wo bha lé yɔ́ ábhú brɛ tré ábhú lójɔ tho, átɛsalé ɛle yɛn áka khɛ́n Yankan bha édɔnmán hɛ mɔ́n!

Jezwi bha Yankan-khúthé

(Ɔ́n wú Mat 21.12-17; Ɔ́n wú Mák 11.15-19; Ɔ́n wú Jan 2.13-22)

45Jezwi ka Yankan-khúthé. Néphan abha lóne ephɛ́ njɛ, anthú nkɔn thá, 46ló ńkránman nkɔn sa:

– Yankan hrɔ́ étɔlé: “Mɛn nkhú li yankanla-nkhú.” Khɛ́n hɔ́n-ɛ, ɔ́n hɔ́n jrɛn sídomán nɔn!

47Ácí khúnbrɛn Jezwi lie yí Yankan-khúthé. Khɛ́n nphahamán-óthemánhɔn, bidíyɛ́nmán le ákhúbhɛ́ hrómɛn néphan khónkhó ɔ́nmɔn énɛn nkɛ wɛ́n si, 48khɛ́n wo lé gɛ lómɛ́si, átɛsalé aféchwe khúnbrɛn di njɛlé yé mɛ́n bhwe.

Currently Selected:

LWIKHI 19: ENT96

Highlight

Copy