JAN 5

Jezwi tɛ lephan bɛn abhuka thé phɔ jan

1Lómánji, Jwifunɛ́n elí Yankan fɛ́thi bɛn ló Jezwi lo Jeruzalɛ́mɛn. 2Jeruzalɛ́mɛn khúbhɛ́ hrómɛn ápɛ ńdu bɛn agbali ákhúmɛ́n óche gbankhran khúmɛ́n. Ńdu lókɔn, Ebrenɛ́n ncan mɛn óche Bezatha. Ńdu lókɔn mɛ́n, ápɛ ásitó mwannán okhɔ́ khali wú yí. 3Lósitó lókɔn hromɛn, lɔ́phɔmán búdúbúdú lalé yítathé: mɛphumán, ntabhumán, le néphan abhukhwa thé. [Wo khúnbrɛn lókɔn wo chre wo ébo lóka ńdu bha branman. 4Átɛsalé ákáfe Hwánthe-mranchɛ́wo chántho bha ká ńdu hrómɛn, ló antɛ́ ńdu branman. Lóka ńdu ébranman, lephan khɛ́n aphrɛ ka lóhrómɛn, lóyámɛ́n mɛ́n phɔ jan, ále yɛn mɛ́n lɔ́ yábhɛ abha mɛ́n phɔ.] 5Lephan bɛn abha lóne, álɔ́ hɔ́n-ɛn ńpa áphɛn le áwɔ́-bhia. 6Lóka Jezwi wui ńnalé, ńyɛn salé lephan lókɔn álɔ́ hɔ́n-ɛn ámɔn, ló ánmi nkɛ sa:

– Wú ɛ́nɛn salé hɛ phɔ ojan?

7Lɔ́phɔwo kranman Jezwi lée:

– Yíliéwo, mɛn nɛn pɛ lephan bha krɛn, ábha hɔ́n mɛn ká ndu hrómɛn, lóka ńdu ébranman. Lóka mɛn tɛ́ khékhremɛn no, lephan nankhɛ wá thwási lo káne khɛ́n ásé mɛn.

8Ló Jezwi krɛnmɛn lée:

– Chanfe tho, hɔn hɛ ntɛ́trɛ, ló ɛnɛnsi.

9Lóyámɛ́n mɛ́n phɔ jan. Ńhɔn mɛ́n ntɛ́trɛ ló ánnɛn si. Lócí lókɔn áli saba, 10lóhɛ́nthé Jwifunɛ́n-óthemánhɔn ékranmán lephan wo tɛ phɔ jan lée:

– Ncɛ́n li saba, lo bidí le se mɔ́nsi sa ɛhɔ́n hɛ ntɛ́trɛ thándi lo.

11Lephan wo tɛ phɔ jan kranman nkɔn lée:

– Lephan khɛ́n atɛ mɛn phɔ jan ɔn, mɛ́n nɔn ńkránman mɛn lée: “Hɔn hɛ ntɛ́trɛ ló ɛnɛnsi.”

12Ló wo bhi nkɛ sa:

– Lólephan bɛn nɔn akranman hɛ lée: “Ɛhɔ́n hɛ ntɛ́trɛ ló ɛnɛnsi ɛ?”

13Lókhɛ́n lephan wo tɛ phɔ jan le yɛ́n lólephan yábhɛ brɛ, átɛsalé néphan búdúbúdú bha lóne, ló Jezwi khrɛ wo hromɛn.

14Lómánji, Jezwi gɛ lephan lókɔn Yankan-khúthé, ló ńkránman nkɛ lée:

– Ɛye, thénthé hɛ phɔ jan, lókhɛ́n ɛlé cu tɛ́ ne npɔhɔ́n. Kasé ɛle hamwanhɛ́n, áyí khóo bɛn bha cu tɛ́ hɛ.

15Lephan lókɔn wo tɛ phɔ jan chan lóne féne, ló ńno kranman Jwifunɛ́n-óthemánhɔn lée Jezwi nɔn atɛ mɛ́n phɔ jan. 16Wo bho bhwe gɛ Jezwi, átɛsalé ńtɛ lephan phɔ jan saba cí. 17Ló Jezwi kranman wo lée:

– Mɛn Nthe elí júmán kakhúnbrɛn, ló thénthé mɛn lɔ mɛn ní júmán.

18Ábhwetɔ́ lókɔn, ánan Jwifunɛ́n-óthemánhɔn thɛ́n, ló wo énɛn lósi wo bhá khɔ́ wɛ́n Jezwi. Lókhɛ́n áleli saba bidí Jezwi khrɛ, lóbhwe brɛ hɛ́nthé, lókhɛ́n ńcu kranman néphan lée Yankan li mɛ́n nbrɛn mɛ́n The. Lóyábhɛ nɛn átɛsa ńhɔn mɛ́n nbrɛn gɛ Yankan ɔ́nmɔn príman.

Yankan Mi sɛ́npɛ́ si achan

19Ló Jezwi kranman nkɔn lée:

– Mímí mɛɛ́n kranmán hɔ́n: Nmi le gɛ tɛ́ mɛ́n nbrɛn hɛ́n thethé yí ńpɔ, áyí khɛ́n mɛ́n The etɛ́ anwú, lónɔn mɛ́n lɔ antɛ́. Áyí khúnbrɛn Nthe etɛ́, lónɔn mɛ́n Bhi lɔ etɛ́.

20Átɛsalé Nthe pɔ mɛ́n Bhi, ló áyí khúnbrɛn khɛ́n mɛ́n nbrɛn antɛ́, anmó nie nkɛ. Ánman cu nie mɛ́n Bhi áyí otɛ́ abanbrɛn áyí thénthé antɛ́, ló ábha tán hɔ́n khúnbrɛn hɛ́nmɛn. 21Lósi yábhɛ brɛ Nthe khɔ́ chɛ́ néphan chán khúnɔn mɛn fe ɔn, lósi yábhɛ brɛ nɔn mɛ́n Bhi lɔ khɔ́ bhó mɛpɔ́bhá sé néphan ńpɔ. 22Nthe bɛn nbrɛn le bhɔ́ néphan kwa, lókhɛ́n ńmo ákwabhɔ́ bhwetɔ́ khúnbrɛn ha mɛ́n Bhi mɔ́n mɛn, 23ochɛ́sé néphan khúnbrɛn oji Nmi sa lósi yábhɛ wo khɔ wo éji Nthe. Kasé lephan ɛle ji Nmi, átɛsalé ɛle ji Nthe khɛ́n achɛ nkɛ bha.

24Mímí mɛɛ́n kranmán hɔ́n: lephan kasé ɛyé mɛn bhwe mɛɛ́n tɔ, lókhɛ́n ɛbhu lephan achɛ mɛn ma mímí, ɛgɛ ńmɛpɔ́bhá álephú. Hɛ lephan lókɔn, wo bha le bhɔ́ hɛ kwa, lókhɛ́n ɛchan ákhú hrómɛn ka mɛpɔ́bhá hrómɛn. 25Mímí mɛɛ́n kranmán hɔ́n: ácí ebhá, ló mɛn mú salé ábha phu, lóka lókɔn néphan akhu, Yankan Mi tɔ́ bha dɛn wo bhá yé, ló néphan khɛ́n ábha yé átɔ́ lókɔn, wo bhá gɛ mɛpɔ́bhá. 26Sa lósi yábhɛ brɛ Nthe khɔ li ńmɛpɔ́bhá lóhɛ́n, lósi yábhɛ brɛ nɔn ńkhɔ chɛ mɛ́n Bhi lɔ li ńmɛpɔ́bhá lóhɛ́n. 27Ló ńse mɛ́n Bhi mɔ́nsi obhɔ́ néphan kwa, átɛsalé mɛ́n bhi nɔn ali Lephan Mi. 28Mɛn bhwe lókɔn mɛɛ́n tɔ ole tán hɔ́n hɛ́nmɛn. Ácí ebhá, lóka lókɔn néphan khúnbrɛn akhu wo bhá yé mɛ́n bhi tɔ́, 29ló wo bhá chán khúnɔn mɛn fe. Néphan atɛ yíbhwá wo bhá chán khúnɔn mɛn fe, ló wo bhá bhá mɛpɔ́, lókhɛ́n néphan atɛ yíléle, wo bhá chán khúnɔn mɛn fe, ló Yankan bha bhɔ́ wo kwa.

Jezwi sɛ́npɛ́ apɛ, lóyí átɛ́

30– Mɛn nɛ́n dɔn mɔ́n thɛ́n tɛ́ mɛn nbrɛn yí mɛn pɔ, Yankan si akhɔ tɔ bhwe se mɛn, lóne nɔn mɛn khɔ́ mɔ́ kwa, ló mɛn kwabhɔ́ áli ákwabhɔ́ bɛn apriman. Átɛsalé mɛn nɛ́n tɛ́ mɛɛ́n nbrɛn yí mɛn pɔ, lókhɛ́n lephan achɛ mɛn ma, mɛ́n yí ńpɔ nɔn mɛn tɛ́. 31Kasé mɛn ní mɛn nbrɛn ndalefɛ, mɛn bhwe mɛɛ́n tɔ álepɛ thé. 32Lókhɛ́n ápɛ lephan brɛ elí mɛn phɔ ndalefɛ, ló mɛn yɛn salé mɛn phɔ bhwe ántɔ, áli mímí. 33Ɔ́n chɛ néphan lo Jan yé, ló ńni ndalefɛ se ábhwe mímí. 34Mɛn, mɛn nɛn nɛn lephanmi ndalefɛ ábha lí sé mɛn, lókhɛ́n hɔ́n swa hɛ́nthé nɔn mɛɛ́n tɔ ábhwe khúnbrɛn lókɔn. 35Jan lókɔn ɔn, ńtɛsa khanniɛn wo tɔtre khɛ́n efí sé néphan, ló ácí kpɛ́bɛn hromɛn, ɔ́n dɛn li phɔhá mɛ́n yéfí hrómɛn. 36Lókhɛ́n ápɛ ndalefɛ bɛn bháne mɛn mán ní sé mɛɛ́n bɛn nbrɛn, ló ndalefɛ lókɔn, ábanbrɛn Jan ndalefɛ ali mɛn phɔ: mɛn júmán mɛn ni, lóthé nɔn ali sa mɛn Nthe júmán ase mɛn lée mɛn ní, júmán lókɔn ló nbrɛn étɔ mɛn bhwe bhwá, ló élie salé mɛn Nthe chɛ mɛn ma mímí nbrɛn. 37Ló mɛn Nthe khɛ́n achɛ mɛn ma, mɛ́n lɔ ántɔ bhwe bhwá sé mɛn. Mɛn Nthe lókɔn, cíbɛn ɔ́n ka ye mɛ́n tɔ́, saji cíbɛn ɔ́n ka wu mɛ́n hɛ́nmɛn. 38Ɔ́n ne dɛn do mɛ́n bhwetɔ́ ká hɔ́n thɛ́n hrómɛn, átɛsalé ɔ́n ne bhu lephan ńchɛ bha mímí. 39Hɔ́n ekán Yankan hrɔ́, ló hɔ́n ebhú salé lóhrómɛn nɔn ɔ́n ma khɔ́ gɛ ńmɛpɔ́bhá álephú: lókhɛ́n áhrɔ́ lókɔn hɔ́n ekán, lólɔ étɔ mɛn phɔ bhwe! 40Lótɛ khɛ́n ɔ́n ne pɔ sa ɔ́n má mɛn phɔ, ló ɔ́n gɛ ńmɛpɔ́bhá.

41Mɛn nɛn nɛn lephanmi hwalri. 42Lókhɛ́n mɛn yɛn hɔ́n néphan yábhɛ ɔ́n ni, ló mɛn yɛn salé hɔ́n thɛ́n hrómɛn, ɔ́n ne pɛ ápɔ́ bhrií se Yankan. 43Mɛn Nthe nɔn achɛ mɛn ma, lókhɛ́n ɔ́n ne dɛn do mɛn. Lókhɛ́n kasé lephan bɛn bho mɛ́n nbrɛn hɛ́n hrómɛn bha, ɔ́n ma dɛn do-e! 44Ɔ́n pɔ áhwalri khɛ́n ɔ́n ma ya hɔ́n nbrɛn thethé gɛ, lókhɛ́n ɔ́n ne dɛn nɛn áhwalri achan Yankan yé, ló kalósi ɔ́n ma khɔ́ bhú mímí e? 45Ɔ́n ne bhú salé mɛn nɔn mɛn mán sé hɔ́n bhwe mɛn Nthe hɛ́nmɛn, Moyízi lókɔn khɛ́n ɔ́n mo hɔ́n mwasrui khúnbrɛn tre mɛ́n tho, mɛ́n nɔn ánman sé hɔ́n bhwe. 46Kasé mímí nbrɛn ɔ́n mu Moyízi mímí, ɔ́n ma bhú mɛn lɔ mímí, átɛsalé ńtɔ mɛn phɔ bhwe ha hrɔ́ mɛn. 47Lókhɛ́n kasé Moyízi bhwe alrɛ, ɔ́n ne bhu mímí, kalósi ɔ́n ma khɔ́ bhú mɛn bhwe mímí e?

Currently Selected:

JAN 5: ENT96

Highlight

Copy