JAN 17

Jezwi éla Yankan sé mɛ́n yíchwɛmán

1Lóka Jezwi tɔ bhwe phu, ńgbɛnɛn tho ló ántɔlé:

– Mɛn Nthe, ácí si phu. Tɛmɛ ɛbhó nguhá sé hɛ Bhi ló hɛ Bhi lɔ obhó nguhá sé hɛ. 2Átɛsalé ɛse hɛ Bhi sɛ́npɛ́ salé mɛ́n mɔ́n oká áthéjinɛ́n khúnbrɛn tho, ló anmó mɛpɔ́bhá álephú sé néphan khúnbrɛn ɛdo se. 3Ló ńmɛpɔ́bhá álephú, lónɔn ali salé wo yɛ́n hɛ, hɛ khɛ́n ɛli Yankan brɛ ali mímí, ló wo yɛ́n Jezwi-Krisi ali lephan ɛchɛ bha. 4Mɛn mo hɛ nguhá thándi nie néphan áthéji. Júmán ɛse mɛn lée mɛn ní, mɛn ni áphu. 5Ló mɛn Nthe, thénthé tɛmɛ ɛchán hɛ nbrɛn yé bhó nguhá sé mɛn, ńguhá lókɔn khɛ́n lócí mɛn phrɛ gɛ lóka wo ka tɛ áthéji.

6Néphan ɛlo áthéji khwɛn se mɛn, mɛn chɛ wo yɛn hɛ. Wo li hɛ néphan, ló ɛkhwɛn wo se mɛn. Wo ji hɛ bhwetɔ́. 7Ló thénthé wo yɛn salé áyí khúnbrɛn ɛse mɛn áchan hɛ yé, 8hɛ bhwetɔ́ ɛbho se mɛn, lónɔn mɛn mo se wo, ló wo dɛn do ábhwetɔ́ lókɔn. Wo yɛn salé mímí nbrɛn mɛn chan hɛ yé, ló wo bhu mímí salé hɛ nɔn ɛchɛ mɛn ma.

9Mɛɛ́n na hɛ sé wo, mɛn nɛn na se áthéjinɛ́n, lókhɛ́n mɛɛ́n na sé néphan ɛkhwɛn se mɛn, átɛsalé wo li hɛ néphan. 10Áyí khúnbrɛn mɛn pɛ áli hɛ ékɛ, saji áyí khúnbrɛn ɛpɛ áli mɛn ékɛ, lóyí khúnbrɛn lókɔn hromɛn nɔn mɛn nguhá khɔ thandi. 11Thénthé mɛn má hɛ yé, mɛn nɛn cu ma áthéji npɔhɔ́n, lókhɛ́n wo-ɛ wo bha áthéji ntɔ́nyán. Mɛn Nthe ali lephan créncré, tɛmɛ ɛbo wo hɛ hɛ́n hrómɛn, hɛ hɛ́n lókɔn ɛbho se mɛn salé wo khúnbrɛn wo khɔ́ lóphɔ lí brɛ, sa lósi mɛn le hɛ ɔ́nmɔn okhɔ li brɛ. 12Lóka mɛn ma wo thethé, mɛn bo wo hɛ hɛ́n hrómɛn, lóhɛ́n lókɔn nɔn ɛbho se mɛn. Mɛn bo wo, ló wo hromɛn álepɛ lephan brɛ alia, kasé áleli lephan lókɔn ali áliá lephan, ochɛ́sé Yankan hrɔ́ bhwe atɔ lóyí khúnbrɛn otɛ́ símɛ́n. 13Ló thénthé mɛn má hɛ yé, lókhɛ́n lóka mɛn ma áthéji ntɔ́nyán, mɛn tɔ ábhwe lókɔn khúnbrɛn, ochɛ́sé wo gɛ mɛn phɔhá khúnbrɛn osímɛ́n. 14Mɛn mo hɛ bhwetɔ́ sé wo, lóhɛ́nthé áthéjinɛ́n ésa wo mɛ, átɛsalé wo le li áthéjinɛ́n, sa lósi mɛɛ́n nbrɛn lɔ mɛn khɔ mɛn nɛn ni áthéji lephan. 15Mɛn nɛn tɔlé ɛkhwɛ́n wo yɛn áthéji, lókhɛ́n mɛɛ́n na hɛ salé ɛbo wo ló áyíléle olé galí wo. 16Lósi mɛn khɔ mɛn nɛn ni áthéji lephan, lósi yábhɛ brɛ nɔn wo lɔ wo khɔ wo le li áthéjinɛ́n. 17Ábhwe mímí hrómɛn tɛmɛ ɛchɛ́ wo lí hɛ néphan, hɛ bhwetɔ́ nɔn ali ábhwe mímí. 18Hɛ si ɛkhɔ chɛ mɛn ma áthéji, mɛn lɔ mɛn chɛ wo lée wo ló áthéji. 19Wo hɛ́nthé, mɛn hɔn mɛɛ́n nbrɛn se hɛ, ochɛ́sé wo lɔ wo hɔ́n wo nbrɛn sé hɛ ábhwe mímí hrómɛn.

20Léli wo brɛ mɛɛ́n na sé wo, lókhɛ́n mɛɛ́n na sé néphan khúnbrɛn ábha khɔ́ wo bhwetɔ́ hrómɛn bhú mɛn mímí. 21Mɛɛ́n na Yankan salé wo khúnbrɛn wo lí brɛ. Mɛn Nthe, tɛmɛ wo bhá lo phɔ, sa lósi ɛkhɔ bha mɛn phɔ, ló mɛn lɔ mɛn ma hɛ phɔ. Tɛmɛ wo lí brɛ ochɛ́sé áthéjinɛ́n obhú mímí salé hɛ nɔn ɛchɛ mɛn ma. 22Hɛ nguhá ɛbho se mɛn, lónɔn mɛn mo se wo, ochɛ́sé wo khúnbrɛn wo lí brɛ: 23tɛmɛ mɛn má wo phɔ, ló hɛ lɔ ɛbhá mɛn phɔ, ochɛ́sé wo khúnbrɛn wo lí brɛ, ló áthéjinɛ́n oyɛ́n salé hɛ nɔn ɛchɛ mɛn ma, ló ɛpɔ́ wo sa lósi ɛkhɔ pɔ mɛn.

24Mɛn Nthe, ɛkhwɛn wo se mɛn, ló mɛɛ́n nɛn salé wo bhá lósi mɛn ma, ló wo wú mɛn nguhá, ńguhá lókɔn ɛbho se mɛn átɛsalé ɛphrɛ pɔ mɛn khɛ́n wo tɛ áthéji. 25Nthe ali lephan apriman, áthéjinɛ́n le yɛn hɛ, lókhɛ́n mɛn-ɛ mɛn yɛn hɛ, ló néphan lókɔn wo yɛn salé hɛ nɔn ɛchɛ mɛn ma. 26Mɛn chɛ wo yɛn hɛ, ló mɛn mán cu chɛ́ wo yɛ́n hɛ npɔ, ochɛ́sé ɛpɔ́ ɛpɔ mɛn, lópɔ́ lókɔn obhá wo phɔ, ló mɛn lɔ mɛn má wo phɔ.

Currently Selected:

JAN 17: ENT96

Highlight

Copy