JAN 16

1Mɛɛ́n tɔ ábhwe lókɔn sé hɔ́n, ló ɔ́n ne yɔ́ hɔ́n mímíbhú ká oliá. 2Wo bhá tranmán hɔ́n yɛn hɛ́nbhúrɛ si. Ló ácí ebhá, lóka lókɔn, kasé lephan ewɛ́n hɔ́n, ánman mú salé mɛ́n yí lókɔn mɛɛ́n tɛ́, lónɔn ali Yankan júmán. 3Néphan bha tɛ́ hɔ́n áyí yábhɛ khúnbrɛn lókɔn, átɛsalé wo le yɛn mɛn Nthe, saji mɛn lɔ wo le yɛn mɛn. 4Lókhɛ́n mɛn phrɛ mɛɛ́n tɔ ábhwe lókɔn sé hɔ́n yé, ochɛ́sé wo ka wo bhá bhó tɛ́ áyí khúnbrɛn lókɔn, lóka lócí bha sí, ló odi hɔ́n mwanhɛ́n salé mɛn phrɛ ntɔ.

Nánnánmi Créncré júmán elí

– Ásithwá mɛn nɛn phrɛ tɔ ábhwe khúnbrɛn lókɔn se hɔ́n ye, átɛsalé lóka lókɔn mɛn ma hɔ́n thethé ntɔ́nyán. 5Thénthé, mɛɛ́n nó lephan achɛ mɛn ma yé, lókhɛ́n hɔ́n hrómɛn álepɛ lephan brɛ ábhi mɛn lée: “Bánne ɛ́lo?” 6Thénthé ábhwe lókɔn mɛn tɔ sé hɔ́n hɛ́nthé, áchɛ hɔ́n phɔ khúnbrɛn gbɔn. 7Lókhɛ́n mímí mɛɛ́n kranmán hɔ́n: áyɔn se hɔ́n salé mɛn yɔ́ hɔ́n ká no, átɛsalé kasé mɛn nɛn no, ńmɔ́ndɔ́nmánwo bha lé bha gɛ hɔ́n. Lókhɛ́n kasé mɛn no, mɛn mán chɛ anman gɛ hɔ́n. 8Ló lóka ánman má, ánman chɛ́ áthéjinɛ́n khúnbrɛn yɛ́n salé wo li pɔn wo neyítɛ́ hrómɛn, wo li pɔn áyí apriman hromɛn, wo li pɔn Yankan kwabhɔ́ hrómɛn. 9Wo li pɔn wo ne hrómɛn, átɛsalé wo le bhu mɛn mímí, 10wo li pɔn áyí apriman hromɛn, átɛsalé mɛn nó mɛn Nthe yé, ló ɔ́n ma le cu wú mɛn npɔhɔ́n; 11wo li pɔn Yankan kwabhɔ́ hrómɛn, átɛsalé áthéji bhringbi lókɔn, lócí-áan wo bhɔ mɛ́n kwa phu.

12Ácu pɛ bhwe búdúbúdú bháne mɛɛ́n nɛn mɛn tɔ sé hɔ́n, lókhɛ́n thénthé lósi adi, ɔ́n ma lé gɛ hɔ́n ábhwe lókɔn. 13Lóka ábhwe mímí Nánnánmi bha bhá, ánman yalí hɔ́n nó ábhwe mímí hrómɛn. Léli mɛ́n nbrɛn thɛ́n hrómɛn bhwe ánman tɔ, lókhɛ́n ábhwe ńye, lónɔn ánman tɔ, ló ábhwe abha hɛ́nmɛn ebhá, lónɔn ánman tɔ sé hɔn yé. 14Ánman mó nguhá sé mɛn, átɛsalé ábhwe mɛn mán tɔ se lónɔn ánman mó ntɔ sé hɔ́n yé. 15Áyí khúnbrɛn mɛn Nthe pɛ, áli mɛn yí, lóhɛ́nthé nɔn mɛn kranmán hɔ́n lée ábhwe mɛn mán mó sé Nánnánmi, lónɔn ánman mó ntɔ sé hɔ́n yé.

Áphɔgbɔ́n bha jrɛn áphɔhá

16– Ákhakpɛɛ́ ɔ́n ma lé cu wú mɛn npɔhɔ́n, saji ábha mɔ́n kpɛ́bɛn, ɔ́n ma cu wú mɛn.

17Jezwi yíchwɛmán fe ya wo hromɛn ébhi wo bɛn nbrɛn sa:

– Bí bhwe yábhɛ li lókɔn ántɔlé: “Ákhakpɛɛ́ lo bha lé cu wui npɔhɔ́n, ló saji ábha mɔ́n kpɛ́bɛn lo bhá cu wui”, ló ńcu ántɔlé: “Átɛsalé mɛn nó mɛn Nthe yé”. 18“Ákhakpɛɛ́ lókɔn”, lóthé li bí? Lo le yɛ́n lóbhwe yábhɛ ánnɛn antɔ.

19Jezwi yɛn salé mɛ́n yíchwɛmán énɛn obhi bhwe bɛn, ló ántɔlé:

– Mɛn kranman hɔ́n salé: “Ákhakpɛɛ́ ɔ́n ma lé cu wú mɛn npɔhɔ́n, ló saji ábha mɔ́n kpɛ́bɛn ɔ́n ma cu wú mɛn”. Wú lóbhwe ɔ́n ya hɔ́n hrómɛn hɔ́n ébhi e? 20Mímí mɛɛ́n kranmán hɔ́n: ɔ́n ma thɔ́n hɛ́ndu, ló ɔ́n ma tɛ́ dandan, lókhɛ́n áthéjinɛ́n-ɛ ábha lí phɔhá sé wo. Áphɔ bha gbɔn hɔ́n lókhɛ́n cíbɛn hɔ́n phɔgbɔ́n bha jrɛn áphɔhá. 21Lóka bhie lábhɛ thi khɛ́n anmán hó, átɛ́ áphɔgbɔ́n se, átɛsalé áyí ebhá khui phɔ. Lókhɛ́n lóka ńho yípɔ kalé, mɛ́n yíkhúphɔ bhwe liɛli, ló anní phɔhá yípɔ ńho ka áthéji hɛ́nthé. 22Lóyábhɛ brɛ, hɔ́n lɔ thénthé áphɔ gbɔn hɔ́n, lókhɛ́n mɛn mán cu wú hɔ́n npɔ, ló cíbɛn áphɔhá bha sí hɔ́n thɛ́n hrómɛn, ló áphɔhá yábhɛ lókɔn, álepɛ lephan ábha ló hɔ́n mɔ́n mɛn bhó yɛn.

23– Lócí lókɔn álepɛ ábhwe bhrií ɔ́n ma cu bhi mɛn. Mímí mɛɛ́n kranmán hɔ́n: mɛn hɛ́n hrómɛn, áyí khúnbrɛn ɔ́n ma bhi, mɛn Nthe bha sé hɔ́n. 24Achan cí-áan adi ncɛ́n, ɔ́n ka sa yíbɛn mɛn hɛ́n hrómɛn. Tɛmɛ ɔ́n sá yí, ló ɔ́n ma gɛ, lónɔn ábha chɛ́ hɔ́n phɔhá bha símɛ́n.

Jezwi gɛ mɔ́ndípha áthéji tho

25– Yandran mɛn nɔn mɛn khɔ tɔ ábhwe khúnbrɛn lókɔn se hɔ́n ye. Lókhɛ́n ácí ebhá, lóka lókɔn mɛn man nɛ́n cu khɔ́ yandran mɛn tɔ bhwe, lókhɛ́n lócí lókɔn mɛn mán tɔ mɛn Nthe phɔ bhwe thándi gbée sé hɔ́n yé. 26Lócí lókɔn hɔ́n nbrɛn nɔn ɔ́n ma sá yí mɛn hɛ́n hrómɛn, lókhɛ́n mɛn nɛn tɔlé mɛn nɔn mɛn mán sá yí sé hɔ́n mɛn Nthe yé, 27átɛsalé mɛn Nthe bɛn nbrɛn lɔ pɔ hɔ́n. Mɛn Nthe pɔ hɔ́n, átɛsalé ɔ́n pɔ mɛn ló ɔ́n mu mímí salé mɛn chan Yankan yé. 28Mɛn chan mɛn Nthe yé ma áthéji, ló thénthé mɛn chan áthéji mɛn nó mɛn Nthe yé.

29Ló mɛ́n yíchwɛmán ékrɛnmɛn lée:

– Thénthé ɛphwan ábhwethé khúnbrɛn se lo ye, lo ɛ́le cu khɔ́ yandran mɛn tɔ bhwe. 30Thénthé lo yɛn salé ɛyɛn bhwe khúnbrɛn phu, ló ɛle pɔ salé lephan obhi hɛ bhwe khɛ́n ɛtɔ. Lóhɛ́nthé lo bhu mímí salé ɛchan Yankan yé.

31Ló Jezwi ékranmán wo lée:

– Wú thénthé hɔ́n ebhú mímí? 32Mímí ácí ebhá, ló mɛn mú salé ábha phu, lóka lókɔn hɔ́n khúnbrɛn ɔ́n ma chranmánlé, lephan brɛ ɛpɛ hɛ si ɛ́bha lo, ló ɔ́n ma yɔ́ mɛn míbrɛ ká. Lókhɛ́n mɛn, áleli mɛn míbrɛ mɛn máne, átɛsalé mɛn Nthe bha mɛn phɔ. 33Mɛn phrɛ tɔ ábhwe khúnbrɛn lókɔn se hɔ́n ye, ochɛ́sé ɔ́n khɔ́ mɛn phɔ gɛ ńthɛ́nkhwálé. Áthéji lókɔn hromɛn, áyí bha khú hɔ́n phɔ. Lókhɛ́n tɛmɛ ɔ́n gɛlé ya! Mɛn mɔ́n ka áthéji tho!

Currently Selected:

JAN 16: ENT96

Highlight

Copy