JÚMÁN HRƆ́ 11

Piɛ mɛ́n alɛ Jeruzalɛ́mɛn Yankan-gbemán hɛ́nmɛn

1 Krisi-mranchɛ́mán le hɔnsɛ́nhɔn khɛ́n abha Jude gotho ɔ́nmɔn ye salé néphan aleli Jwifunɛ́n lɔ gɛ Yankan bhwetɔ́. 2Piɛ ka asaji bha Jeruzalɛ́mɛn, krethiɛnmán ali Jwifunɛ́n élɔ nkɛ phɔ, 3ló wo étɔlé:

– Néphan ole jan khɛn hwan nɔn ɛlɛ, ló ɛ́gɛ wo ɔ́nmɔn lí nɛn!

4Ló áyí atɛ, Piɛ lɛ lómɛ́n khúnbrɛn se wo ye, ló ánkranmán nkɔn sa:

5– Mɛn ma Jope khúbhɛ́, lóka mɛɛ́n na Yankan, lónɔn áyí lɛ mɛn mɛ. Mɛn wu áyíbɛn chantho ebhá mɛn phɔ: átɛsa ntɛ́trɛ khóo bɛn okhwɛn lónkpɔ́mɛ́n bhwelí pɛ, áchantho ebhá, ló ábha ádi mɛn njɛ. 6Mɛn sa mɛbhí tre mɛn nɛ́n lóhrómɛn kɔ́nkɔ́nkɔ́n, ló mɛn wu ńbranmán ale nta bhwelí, ábithe nbranmán, wo khɛ́n wo bhó álábhɛ mɛn chuílé le ńkɔ́cran ɔ́nmɔn. 7Lótɛ mɛn ye átɔ́ bɛn édɛn kranmán mɛn sa: “Piɛ, chanfe, ɛwɛ́n ló ɛtha!” 8Khɛ́n mɛn tɔ sa: “Chɛchɛ! Hwánthe, áyí wo dibi le áyí lóphɔ le chan, lóyí khúnbrɛn lókɔn ɔn, brɛ le ka ka mɛn míthé.” 9Khɛ́n átɔ́ cu édɛn npɔ átho lóne sa: “Áyí khɛ́n Yankan nkɛé lóphɔ chan ɔn, ɛle tɔlé lóphɔ le chan.” 10Lóyí lókɔn tɛ nɛn ńdɔn bhwaliá, ló lókhúnbrɛn cu ti lo tho. 11Lóka yábhɛ brɛ hromɛn nɔn, néphan bhwaliá ochɛ yí chan Sezare khúbhɛ́ lɛ ábháthó si mɛn ma. 12Nánnánmi kranman mɛn sa, mɛn gɛ wo ɔ́nmɔn no ló mɛn nɛn sókhú. Hɔnsɛ́nhɔn ákhwá khɛ́n mɛn do ma ɔn, wo nɔn wo lo je mɛn Sezare khúbhɛ́, ló lo khúnbrɛn lo lɛ Khɔnɛ hwan. 13Lósi Yankan-mranchɛ́wo bɛn khɔ ka mɛ́n khúthé, khɛ́n nkɛ krɛnmɛn lée: “Chɛ néphan oló Jope lo do Simɔn óche Piɛ bhá, ńkan lo lóphɔ hwan khúnbrɛn. 14Mɛ́n bhwe ánman tɔ sé hɛ ɔn, lónɔn ábha swa hɛ le hɛ bháthónɛ́n khúnbrɛn ɔ́nmɔn.” 15Mɛn ka mɛn nili mɛɛ́n tɔ bhwe, lóka nɔn Nánnánmi Créncré ka wo phɔ sa lósi ńphrɛ nkhɔ ka lo phɔ a. 16Lótɛ Hwánthe bhwe khɛ́n lócí atɔ ɔn, ádi mɛn mwanhɛ́n salé: “Ńdu nɔn Jan bho ha néphan hɛ́n, lókhɛ́n hɔ́n-ɛ, Nánnánmi Créncré nɔn wo bhá bhó há hɔ́n hɛ́n.” 17Áyí khɛ́n Yankan se lo lóka lo bhu Hwánthe Jezwi-Krisi mímí ɔn, lóyí brɛ nɔn ńse wo lɔ: ló ébí lephan le mɛn, khɛ́n mán gɛ Yankan ɔ́nmɔn swan ɛ?

18Lóka wo ye bhwe lókɔn, lótɛ wo khúnbrɛn wo lethíí, wo élri Yankan hwa, ló wo étɔ sa:

– Mímí, Yankan chɛ néphan ale li Jwifunɛ́n ojrɛn wo yítɛ́, ló wo gɛ mɛpɔ́bhá mímí.

Yankan-gbemán abha Anthiɔ́su khúbhɛ́

19Ethiɛ́nɛn ka wo wɛn ɔn, lóka nɔn wo chan wo élri néphan gbre, áchɛ́se krethiɛnmán chranmanlé. Wo hromɛn néphan fe lo ka Fenisi, Chiphre le Anthiɔ́su khúbhɛ́ ɔ́nmɔn-áan, khɛ́n Jwifunɛ́n pán nɔn wo tɔ Yankan bhwe se. 20Lótɛ khɛ́n krethiɛnmán fe achan Chiphre le Sirɛnɛn ɔ́nmɔn lo Anthiɔ́su khúbhɛ́, ló wo tɔ Ábhwe Bhwábhwá ali Hwánthe Jezwi phɔ bhwe se néphan aleli Jwifunɛ́n. 21Khɛ́n Hwánthe sɛ́npɛ́ bha wo phɔ, áchɛ́se néphan búdúbúdú bhu mímí, ló wo sa hɛ́nmɛn nrwɛn Hwánthe.

22Lóbhwe lókɔn ka Jeruzalɛ́mɛn Yankan-khúthénɛ́n njɛ mɛn, ló wo chɛ Banabási lo Anthiɔ́su khúbhɛ́. 23Mɛ́n ka ńdi lóne khɛ́n ńwu lósi Yankan khɔ bhɔ krethiɛnmán ndu ɔn, átɛ phɔhá khóo se, ló ńkhɔ́nman nkɔn khúnbrɛn phɔ, sa nkɔn thɛ́n okhɔnman, ló nkɔn lí mɛ́nbrɛ sé Hwánthe.

24Banabási li lephan bhwá, Nánnánmi Créncré bha mɛ́n phɔ, ńpɛ mímíbhú, ló wo gɛ néphan búdúbúdú se Hwánthe.

25Lómánji Banabási lo Tási énɛn Sɔ́lu. 26Mɛ́n ka ńgɛ nkɛ, ńdo nkɛ ɔ́nmɔn ma Anthiɔ́su. Wo mɔ́nmɔn wo gɛ Yankan-gbemán ɔ́nmɔn chre lóne áli ápá nbrɛn, wo lie néphan búdúbúdú yí mímíbhú hrómɛn, ló Anthiɔ́su khúbhɛ́ nɔn wo bhɔhɛ́n che yíchwɛmán hɛ́n krethiɛn.

27Lóka lókɔn nɔn, bhwetɔ́trémán chan Jeruzalɛ́mɛn lo Anthiɔ́su. 28Nánnánmi ka bhwetɔ́tréwo khɛ́n óche Agabúsi phɔ, ńchánfe, ló ántɔlé, áko khóo bɛn ebhá di áthéji si khúnbrɛn. (Khankhan mímí, Klóde ka ali ákhúbhɛ́-óthe bhrɔ́khó nɔn áko lókɔn di). 29Yíchwɛmán sri tre salé, lephan brɛ, hɛ yí ɛpɛ ɛbhó bhá, ló wo bhá bhó dɔnmán hɔnsɛ́nhɔn abha Jude gotho mɔ́n. 30Wo bɔn lóyí, ló wo khwɛn se Banabási le Sɔ́lu ɔ́nmɔn lo se mrɔ́khómán abha Jude lóne.

Currently Selected:

JÚMÁN HRƆ́ 11: ENT96

Highlight

Copy