Sofonías 3
3
Daxhinj ka' ben Jerusalén'na
1Niachraz ke Jerusalén'na, dan naken yell xhen wednay,
da nak bziw, na da bsakzi yell ka' yela.
2Bi bzenayen xtill Xanllon,
na bi wenlen yeyon nez,
na bi bxenlallen Xanllon,
na bi bayirjen Dios ke'en.
3Xan ake' ka' llusia ake' ka' bell yixe,
na be'nn ka' llun yel korchisen llun ake' ke bekw yiw lla'a latj dach yubill,
le akban bill llkoan akba da gaw akba bateyure.
4Be'nn ka' llayixjwe di'llen, nak ake' be'nn wednay, na bigak wxenlall aklloe,
na bxus ke ake' ka' llrajchekw ake' lo yodao xhirallen,
na bi llun ake' kan nyoj llwa xtill Xanllon.
5Axha Xanllon zoe'e yell xhen'na,
le'e llune dawen, na bi llune da mar.
Gatga zu ni tzir bi llune kan nak yel korchis ke'en.
Axha be'nn wen daxhinjen
nike nombiesre yel sdon.
6Xanllon ne:
Blleyia latj yell-liw ake',
na bachinja ze sib gan lljakoa be'nn ka' llajtap,
na bantacha raw tnez ke ake' ka',
na nullno be'nn sjada rawen.
Yell xhen ke ake' ka' ba badachen,
ni tichgaze be'nn bill zu rawen.
7Bena xbab: Konen ka' Jerusalén'na wzenayen kia,
na gu'n ake' latj yego ake' nez,
na, konen ka' bi wlleyia lo yo' rill aken,
kanake ba bsakzia le aken.
Axha le aken biub'do akre ben ake'
yoyte daxhinj.
8Kelen'na le kwexh nada' llan
yeda wadsakzia re'.
Nada', Xanle, ba bnia ka':
Ba bachuyralla watupa yoyte be'nn wnebia ka' sjalla latj yell-liw ka',
nench'na wsana yel llaklla kian,
na rente yel llruk kian.
Na wzeya dokenak yell-li'on
ke nake ba bchare nada' kwis.
9Keten llin llan gak ka',
guna nench'na yoyte yell ka' wne' ake'
di'll barane', nench'na gak walwill ake' nada',
na yoy akte gun ake' xchina.
10Yechla yeo ka' nbane Etiopían,
yell kian naslasen yed ake' wadyenyiach ake',
na yedwa ake' da werao ake' nada'.
11Ke lla'na yell kia,
bill wayero
ke ni yetich da ka' ba benon,
dan guko wednayen,
nallen waka radjren
be'nn ka' llunxhen kwin, na be'nn yarall ka',
na chras bill wruero yel yarall ko'on
raw ya' xhirall kian.
12Nada' wakoan'rena rwe' be'nn nexjrall ake',
na be'nn xendaze, na wzoa ake' yel nxenlall ke aken konen nada',
13Be'nn ka' bagan ye to chop yell ke Israelen,
bi gun ake' daxhinj,
na bine' ake' di'll wxhiye,
na bi we ake' di'll wenlalle.
Na gat da yaj gaw ake',
na wazirall ake', na nutno wcheb le ake'.
Llul ake' yel llawe ke yell xhen ke Jerusalén'na
14Le gul, re' sjalla yell gan nzi Sión.
Le gusia, na le yawe yell Israel.
Bawere, Jerusalén,
bawere do yichj dorallo.
15Xanllon ba bake'e dan bdichjbie'e dan gak ko'o rwe',
na ba bakoase'e kale be'nn ka' llwiere rwen.
Xanllon, llnebia Israelen zurene rwe' txhen:
Na biteze da mar za' bi sueren wcheben rwe'.
16Na ke lla'na ye ake' Jerusalén'na:
Bi llebo, Sión,
bi weo latj ke tako ka' gatzin.
17Xano Diozen zerene rwe',
Le'en nape'e yelwak xhen, na wazre'e rwe'.
Xanllon soe'e wawere kan lluno rwe'.
Konen yel nllie kena gune' rwe' yelnban kub,
na gan zajze llaweren, na gule'e.
18Ke to lla ga llak lni'.
Kan ba'bi be'nn ka' bchach ake' raw yellen
Kin ne Xanllon:
Nada' wazra rwe' raw da maren llcheb rwen,
na yel zdon nraj'chekw rwen.
19Katen llin lla'na, wayechja
yoyte be'nn ka' llsakzi rwe'.
Na wasra'a be'nn ka' bi llak za wen,
na watupa be'nn ka' ba bniten,
na gunxhen ake' re', na gakre be'nn braw,
raw doxhente yell-li'on,
ke nake dan ba bxhakziren.
20Na keten ba bllin llan
wadxhia re', wadtupa re',
na wayonlaya re',
na guna ka' se ke re', na gap ake' re' baran
raw yoyte be'nn yell ka' sjalla raw yell-li'on.
Nada' Xanle ba bnia ka'.
Currently Selected:
Sofonías 3: ZPUPAT
Highlight
Share
Copy
Want to have your highlights saved across all your devices? Sign up or sign in
