Zacarías 3

Bredawra ba bacha ake' xha Josuén

1Xanllon broere nada' bxus Josuén, ze'e raw ankl ke Xanllon, na take'e chawe ke Josuén ze daxi'on, llzoa xbene Josuén nake be'nn wen daxhinj. 2Na ankl ke Xanllon gulle'e daxi'on: Diozen nlliere Jerusalén'na, gunle rwe' snia, le be'nn ni nake ka to bao da llalnin da le babajte'e lo yibarj. 3Josuén nak xharanen bziw kwis, kanake ze'e raw ankl ke Xanllon. 4Na anklen gulle'e be'nn kaꞌ llakren le'en, le wayalj xharane bziw kaꞌ naken, bayullna le gullte'e Josuén: Bwiakero, dani llenen nen' ba bazixhena daxhinj ko'on. Na' guna ke yewak ake' xharano da nak nbaraz. 5Na le gullte'e be'nn kaꞌ llakren le'en, le wxoa to rall yall yichjen. Na le bxoa akten, na le boak akte xharanen kanake zella anklen kwit aken. 6Bayullna ankl ke Xanllon gulle'e Josuén: 7Kin ne Xanllon nap doxhente yelwaken: Bda raw xnezan, na ben yeolol da ka' ba bnia gunon. Cha guno kan ba bnian, na gak rallnao yodao kian. Na gapon rente latj kena, na guna' to da guno gan lla ankl kaꞌ llun xchinan. 8Bzenayian, Josué, rwe' nako bxus, na wzenay rente be'nn kaꞌ nako txhen gan llwere diꞌll ke bxus kaꞌ, yeololte re' nakre kaꞌ to da llroe, da ze gak: Yedrena be'nn wenllin kian, nzi da lla'ga. 9Nada' ba bzua raw Josuén to yaj da zu gall rawe, na nadksa wzoja to da wzoja rawen. Wayullna tllaze wazixhena da mar ke latj yell-li'on. 10Keten llin llan, wak gun yexh loelljre, na chare nbaraz gan lla yay xhixh keren, na si're banez da kaꞌ kwia rawen. Nada', Xanle napa doxhente yelwaken, ba bnia ka'.

Currently Selected:

Zacarías 3: ZPUPAT

Highlight

Copy