Miqueas 1
1
Diozen gune yel korchis ke Samarian
1Di'llnin be'e Xanllon Miqueazen be'nnen gurj gan nzi Moréset, na bdixjwere le'e kan gak ke Samarian na rente Jerusalén'na, ke llan llnebia Jotam, Ahaz, na Ezequías gan nzi Judá.
2Yoyte re' yell lewzenay,
na yoyte re' be'nn sjalla latj yell-liw ni lewzenayian.
Gan zu yodao xhirall ke Xanllo nate,
wruera re' dol kere ka'.
3Xanllon lloje'e kwe nez latj gan zoe'en
na yede'e to raw ya'ze.
4To wayonze ya' ka' keten wraje'e rawen,
kellak ke to serdao ket llzen raw yi',
na rach ka' gaken choplare,
ke to nis yewa da lladin le ya' ka'.
5Doxhente dani naken xtol yel wednay ke yell ke Jacoben,
na daxhinj ka' llun be'nn Israel ka'.
¿Ganxha yel wednay ke Jacoben?
Zuten raw yell ke Samarian.
¿Ganxha yodao ke be'nn ka' bi numbie Diozen, be'nn ka' sjalla Judán?
Yell Jerusalén nakse zajzu aken.
6Kelen'na Xanllon ne:
Wachochj walana yell xhen ke Samarian,
na wayaken to yu lix ga gasgan ake' yay uvas.
Guzlasa yaj ka' sjalla yell xhen'na nak rachen,
na waroexheja rane ka'.
7Na yoyte loe lsak ke ake' ka' wxhoxjtinan,
na wzeya yay bchekw xhirall ke ake' ka'.
Le ben aken konen xmell nor ree ka',
na xmell nor ree wayonan dayubre.
Miqueazen bell yiache'e
8Kelen'na walleyrawa na koellyiacha to lljeltatra,
kelen'na ta'a galniaza na galyidza,
na koell yiacha kan llun bekw yiwon,
gusia kan llun ban nzi avestruz.
9Le we gur ke samarian naken da bi wayakse:
bajaxhenen Judán
na ba bllinten Jerusalén,
yell xhen gan sjalla be'nn yell kia ka'.
10Bi wzenlere dani be'nn ka' sjalla gan nzi Gat,
na bi koellre.
Le bixhtul dan lleyllraren
lo bichte ke Bet-le-afrá.
11Re' sjalla gan nzi Safir, le chaj gan wche ake' re',
galyidzre to wayiere're.
Bi llach be'nn ka' zajlla gan nzi Zaanán.
Le llbell ake' gan nzi Bet-ésel,
le nullno llra' akren le ake'.
12Na be'nn ka' lla gan nzi Marot, to llchuken le ake' kanake dan lleyllra aken, to ne'rall ake' wazu ake' wen,
le Xanllon ba benee nench'na llak dakenxhie ke aken,
na llinen llwa reij yo' ke Jerusalén'na.
13Re' sjalla yell gan nzi Laquis,
gukre be'nn wednay kan llun be'nn Israel ka',
xtol daxhinj ke re' kan, bxinj be'nn ka' sjalla Jerusalén'na,
lewatil karret ka' nench'na kuellew kabay ka' len.
14Lewe da zerallre, be'nn Moréset-gat ka'.
Yell xhen ke Acziben aken to da siye
be'nn wnebia ka' sjalla Israelen.
15Xanllon, ne:
Re' sjallare yellen nzi Maresá,
wsela yeto be'nn wadnebia re',
na be'nn ka' llnebia Israelen
chejdo ake' llajkoach ake' lo broj xhen de yajen gan nzi Adulam.
16Na re' be'nn sjalla yell xhen'na nzi Sión,
legundo yidze yichjren kanake dan lljelere,
ke xhi'nnre ka' llebraz nllieren.
Le wchibdo yichjren to waganten yidze kan nak yichj chuden,
le xhi'nnre ka' wche akebe yell zit.
Currently Selected:
Miqueas 1: ZPUPAT
Highlight
Share
Copy
Want to have your highlights saved across all your devices? Sign up or sign in
