Jonás 4
4
Guklla Jonázen
1Na Jonázen, bi biazralle'e kan ben Diozen, llebraz guklleꞌe. 2Na berenee Xanllon diꞌll, na gulle'e leꞌe:
Wyiakero Xana, ki yaꞌnen' bena xbab, kan ne' zua rallan, kelen'na gukralla waxhonjdoa, llintia gan nzi Tarsis, le nezra ke rwe' nako to Dios, beꞌnn nexjrall, beꞌnn llayachrall, na bi llakllazeo, na da xhen kwis nak yel nllie koꞌon, llixhjwero dan llenlo wsakzi'on, na llayull'na llayatro. 3Kelen'na Xana, llatyoera rwe', wakaꞌo yelnban kian, zakllen'na kweyia, kerke yedaleze nenbana.
4Axha Xanllon ballie'e xtille'en lle'e leꞌe:
¿Llakro wen kanake zurizo llakllaꞌon cha?
5Na Jonázen balloje'e yell xhen'na, na jasoeꞌe, kezake gan llra' will, gana' benee to da wkoej leꞌe, na baziralleꞌe gan nak xhan xhuren, llbexhe'e akre gak ke yell xhen'na. 6Na Xanllon bzoe'e to da nak ke lba yit, na benen xhur gan lli Jonázen nench'na bayakxhenleꞌe, na Jonázen llebraz bawereꞌe kwis. 7Axha bateyure ke byenin, Diozen bzoe'e to waraw ba bdaw len, na bchechbaꞌ lban. 8Na ke braꞌ willen, Diozen bzaleꞌe to be la, da zaꞌ gan llra' willen, na Jonázen llebraz gukreꞌe zeye, ke nake bill zu dan gun xhur ke'en, na to llake ke beꞌnn llaj be, to llakralle kweyitegue, na bnee:
Zeralla kweyia, kerke yedaleze ne' nbana.
9Axha Diozen gulle'e Jonázen: ¿Llakro wen kanake llakllao dan ba biech lba yiten cha?
Na bnee Jonázen: To ren kia gut ke nake llakllan.
10Na Xanllon gulle'e leꞌe:
Rwe' llayachrallo kan guk ke lba yiten, na nike guszon, na nike baslliwzon, tlleꞌze blliwten, na bateyuze byiechten. 11¿Bi llakro nadan llayal wayachralla yell xhen ke Níniven? Gan sjalla bde're to gayoa galj mir beꞌnn, bi nez akre cha llun ake' da wen, o cha llun ake' daxhinj, na lekse ka' sjallan ba zan bayix.
Currently Selected:
Jonás 4: ZPUPAT
Highlight
Share
Copy
Want to have your highlights saved across all your devices? Sign up or sign in
