Amós 4
4
1Lewzenay re' bak xhen ake'
re' zajzu latjen nzi Samaria,
re' nor ake', llsakzire be'nn yach ka',
na llonere sban be'nn ka' bibi sjade ke ake',
na llere'e xhiew re' ka'
le llajxi da yajllo.
2Xanllo Diozen ba bdichjbie'e konen yel xhirall ke'en.
Baza lla ka' nench'na wache ake' re',
wzoa akte to jlew de ya da kwelleo re',
na xhi'nn re' ka' wzoa akebe yiech rew ke dan zen ake' belya ka'.
3Na llach re' chnez raw nez raz ka',
na wachach ake' re' gan sjallaren.
Kan ba bne Xanllon.
To di'll yelyia da llpe
4Lechaj gan nzi Betel, na gan nzi Guilgal,
legun daxhinj, le waslliw dan llakdilren loelljren.
Kete lleni le gut bayix, na le lljeraodo,
na da ka' llwere to raw da chi kwen ka', le lljan ze chonn lla wej.
5Lewzey pan dan binchixh kwa bin'nen nench'na were' yel lluxken,
le chixhjwe gateze kenake llzeyre dan llazarallren,
le dani naken to da llzoa re' nbaraz.
Kan ba bne Xanllon.
Lakse llzakzi Israelen bi llzenksen
6Nada' bena nench'na re' bdere win
raw yoyte yell xhen ke re' ka',
nada' bena nench'na biallj da wej bdao re'
raw yoyte yell ke re' ka',
axha lakse ka', re' bi babire konen nada'.
Kan ba bne Xanllon.
7Lekse ka' bena nench'na biallj yejw ke re'
raw chonn be'o, ke bine warapre.
To yell xhen'na bena yejw, na yeton bi bena yejw,
to yu lixen guk yejw, na yeton bayechen kenake bialljren nis,
8to'to yell xhen ka' biaj be'nn ka' jadirj ake' nis,
na bi ballel akre daxhen, nench'na kwexh yel llbil lall ke aken,
axha lakse ka', re' bi babire konen nada'.
Kan ba bne Xanllon.
9Bsakzia yu lix ke re' ka' konen be la', na konen baria ka',
nada' bena nench'na bkoad yay xhixh ke re' ka', na rente gan sjalla yay uvas ka',
bich'soa ka' bdaw akba yay higos ka', na rente yay olivos ka',
axha re' bi babire konen nada'.
Kan ba bne Xanllon.
10Na bsela da dlleyi, ke da ka' bsela Egipton,
bena nench'na basat biweo ke re' ka' raw wdilen,
na bia latj nench'na be'nn ka' llwiere ren, bxhi ake' kabay ke re' ka',
na bena nench'na bla ziw be'nn wat ka' gan sjallaren,
axha re' bi babire konen nada'.
Kan ba bne Xanllon.
11Bsela da blleyi re'
ke da ka' blleyia Sodoma rente Gomorra,
to nakre ke ba'o da balloj lo yi' barj,
axha re' bi babire konen nada'.
Kan ba bne Xanllon.
12Kelen'na re' be'nn Israel, kayian guna ke re',
na deksde gunan,
lewaze xnid nench'na wadil re' Dios keren.
13Xanllon, le'en bene ya' ka', na bene be,
le'en llroere'e xbab ke'en be'nn nachen,
le'en llune nench'na benin llayaken xchul,
le'en llwe nez latj sib ke yellri'on,
Xanllon, Diozen nap doxhente yelwaken, kan nzi le'en.
Currently Selected:
Amós 4: ZPUPAT
Highlight
Share
Copy
Want to have your highlights saved across all your devices? Sign up or sign in
