Amós 3
3
Dan lleyal gun be'nnen llayixjwen
1Israelitas, lewzenay kan ne Xanllon lle'e be'nn yell ka' bachache Egipton:
2Tuze ren biazralla
raw doxhente yell da sjalla raw yellri'on.
Kelen'na wazia re' kuent
raw yoyte daxhinj ka' ba benlen.
3Cha' chop be'nn zajze ake' txhen, llroen xtillksen ba be ake',
4cha' bell yixen llusiaba lo yixtawon, llroen ke nolljen ba bxhemba,
na cha' bell yixda'on llumba snia lo broj de yajen, llroen ke ba bxhemba to bayixen,
5cha' byinen ba bdolba, le dekse to da bxhen leban,
na cha ba bxhit dan llzen'na, llroen ke nulljen ba bdol,
6cha' ba bkoell ake' trompeten raw yell xhen'na, be'nn ka' sjalla rawen to zu'ze llak ake',
cha' bi da maren llak raw yell xhen'na, llroen ke Xanllon ba bne kan gaken.
7Chras bitbi llun Xanllon,
cha bine chixjwere be'nn ka' llayixjwe lloa xtillen.
8¿Noxha bi xhiztit yel llebze ket bell yixen llusiaba?
Cha llne' Xanllon, deksde ne' be'nn ka' llayixjwe lloa xtillen.
Kweyi Samarian
9Lechixjwe dani lo yo' raw ke Asdod,
na lo yo' raw ke Egipton.
Leda raw ya' ke Samarian,
lewia ke da yelwan'na llak rawen kenake
llalleyrao ake' dan llakdilren loellj aken.
10Na Xanllon ba bne:
le aken bines akre gun ake' da nak dalixheje,
ngochaw ake' lo yo' raw ke aken dan jalan ake' gan jasakzi aken.
11Kelen'na ba bne Xanllo Diozen:
To be'nn llwiere re', chechje latj yellri'on gan nbanleren,
na wachinje ze war ko'o ka',
na kwan ake' dan sjanllare lo yo' raw keren.
12Kan ne Xanllon:
Kan llun to gup xhir llajsre'ba lo llwa bell yixen,
na lladolre chop niaba kaze o cha rat nayba,
doxhente ka' gak ke be'nn Israelitas ka'
be'nn ka' zajzu Samarian,
be'nn ka' llazirall raw siy na kam dazerao nak nbaraz ke Damascon.
13Xanllon nap doxhente yelwaken, ba bne:
Lewzenay yoyte re', na le wzene xhi'nn xhasoa Jacoben,
14keten llin lla wsakzia be'nn Israel ka', ke daxhinj ka' llun aken,
na wachinja bkuy ka' benchaw ake' gan nzi Betel,
na wchuya lus bkuy ka',
na llajyiet akten raw yu.
15Wachinja yo' ka' gan sjacha aken keten llak zeyen, na keten llak zayen,
lekse ka' wachinja yo' nbaraz ka' nakchaw konen dan nzi marfil,
na wachinja yo' raw xhen ka'.
Kan ba bne Xanllon.
Currently Selected:
Amós 3: ZPUPAT
Highlight
Share
Copy
Want to have your highlights saved across all your devices? Sign up or sign in
