San Lucas 20

Yelarne'abe'a ki Jesús

(Mt 21.23-27; Mc 11.27-33)

1To dza, tzalaka Jesús zee lo yo'o sdo'o rse'adiene ka bene, le'an rguixaje'e rson wen, bchhinka xanka bxozi le'an ka muestro ki xhba'a, tzaxhen le'an ka bene waka, 2na gochhike le':

—¿Nono be'ana lataj tan rhonlo ten? ¿Noxha be'ana kio' yelarne'abe'a ni?

3Jesús bochhie':

—Le'aksikan ne'adia snabeda lén. Leyochhi'i: 4¿Noxha gsela Juan desie'e lo ka bene, a Diozo achen bene lichhileyo'?

5Gzolhoke rhebeajniake te rhe'a leza'ake: «Chen yochhi'irha Diozo gsele le', te sne': ¿Nobixhkia' labiguiajelhene ye'a? 6Te labi gaka sne'arha bene, le'a ka bene wagotike rho'o le'an guiaj, le'a yogoke nezekene Juan goke to bene btzalaje laza Diozo.» 7Nakan bochhike labi nezekene nono gsela Juan desie'e loka bene. 8Na'arhe Jesús bochhie':

—Le'aksikan ne'adia labi kixaje'eda lén noga za yelarne'abe'a kia' tan rhonha ten:

Xhkodza didza kika bene we'anchhin malha

(Mt 21.33-44; Mc 12.1-11)

9Dena'a gzolho Jesús rtzalaje le'an ka bene, na gdixaje'e xhkodza didza ni:

—«To bene goze' to koe bedzolhi, te gdilaje balaka bene kinda gonchi'ike, na le' guiaje zito. 10Nan bchhin tiembo ki gsecho, gsele to we'anchhin zajnabe kika bene rhonchi'ike chhin kie', troa'a gsecho tan rdole; na le'ake bgagodza'ake le' na beselake le' kazoe'. 11Na'arhe xan bedzolhi gsele yeto' we'anchhin; le'aksikan gochhidza'ake bene ni, bgagodza'ake le', te beselake le' kazoe'. 12Gselake yetoe', bene nolanke chhin ni, le'aksikan be'anke le' we'a na bebeajke le' tzala'alha.

13»Tayelhalhe xan yo' ni gne': "¿Nobi gonha? Selaka xhi'inha rhe'akieda; nakalha gonke le' balan." 14Te kati bene rhonchi'ike chhin, ble'ekene le', gochhi leza'ake: "Bene ni yega'anlhe'anhe banheza ni; dogotie', kinda banheza ni yega'an kro'o." 15Nakan bebeajke le' lo bedzolhi, na be'atike le'.

»¿Na nobi rhe'akielhe lén gon xan bedzolhi ni kie'ake? 16Tzeaje te go'otie bene blanke chhin kie', na gde' bedzolhi na kika bene yobilha.»

Nan benkene ten, gne'ake:

—¡Ten labibata gaka kan!

17Te Jesús byoe' le'ake, na gne':

—Na'arhe ¿nobi rhe'anhe sne'a tan rne'a lo guichi ga' rtzalaj xhtidza Diozo?:

"Guiaj biguio'olhachhika ka bene rkoake ze'e

chibeyaka guiaj yajlo."

18Notite'azi sladzo lo guiaj na, yega'an bixhajdinaj; na chen guiaj ni sladzo ga' ze'a to bene, bixhtezi yake.

19Xanka bxozi le'an ka muestro ki xhba'a go'onkene senke Jesús lagazi tina'a, le'a guiajniekene kati btzalaje xhkodza didza ni kie'ake rne' kan. Te rdzebike bene yechhi.

Rnabekene ki wekixhaj domi

(Mt 22.15-22; Mc 12.13-17)

20Gselake balaka bene, rhonke zi bene wen, na koe'ajkene Jesús didza kinda chexaje lo taze'adi, kinda gzoake le' xhania'a gobiarne ki Roma. 21Le'ake gnabekene le':

—Muestro, nezeto tan rtzalajlo kan rse'adielho naka tali, te labi rguilhajlho gonlo ka' rhe'anke bene. Loe' rsloelho tabalha neza ki Diozo. 22¿A naka wen kixhajto domi lo gobiarne ki Roma, achen labi?

23Jesús, gokiebene pensarhe malha rhonke, gochhie le'ake:

24Legsloe' ne'adia to domi denario. ¿Nono lo' kan lawe zua ni?

Bochhike:

—Ki César.

25Jesús gochhie le'ake:

—Legde ki César ta naka ki César, na ki Diozo ta naka ki Diozo.

26Nito' tan gne' loka bene labi bdzelhalachhike bi gdekene le' te xhche'ake le', nakan gokiekene banachhi ka bochhie' na bse'ayaj rhoake.

Rnabake ki tan yasayebanrha lo yelagoti

(Mt 22.23-33; Mc 12.18-27)

27Dena'a, balaka saduceos, guiajke yajyoke Jesús. Saduceos ni labi rheajkeneye'a tan bene goti yeyasayebanke, tanka bzoake kie' taze'adi ni:

28—Muestro, Moisés bka'anhe ta nozoaje, chen to bene notzagane' gatie' le'an labi gola' xhi'inhe le'an nigolha kie', bichi bene gotie' rhala yezie'e nigolha weze'abi kinda gde' xhi'in bichie' gotie'. 29Kan xha, tzania'a gzoake gachhi bichike, te bene nerho btzagane', na gotie' labi bka'anhe nito' xhi'inhe. 30Bene grope 31le'an bene gyone bezi'ike lee, na kanksi be'anka bene yebalake, te sgachhikate' gotike labi bka'anke xhi'inke. 32Te yelhalhe le'aksikan goti nigolha na. 33Kan xha, kati yeyasayebanke, ¿noxhalha bene ni gaka nigolha kie', nigolha ni, chen sgachhikate' btzaganake le'an lee?

34Jesús bochhie':

—Lo yelanaban ni, bene bguio' le'an nigolha rtzaganake; 35te Diozo sne' noxha rdola soa chhia'a tzawe lo yelanaban ziza'a kan yeyasayeban, nakake bene bguio' o nigolha, labirhe gtzaganake, 36le'a labirhe gatike, gakake ka angle, na gakake xhi'in Diozo tan beyasabebanke. 37Kuin Moisés, nan glabarha ga' to chhigo' be'asiga'a rhe'agui, rsnisiene rho'o ka bene goti rheyasarhebanke. Na' rne'a nake Diozo ki Abraham, ki Isaac kan ki Jacob. 38¡Na le' labi nake Diozo ki bene goti, nake Diozo ki bene ban, kie' le' yogote' nabanke!

39Balaka muestro ki xhba'a, gochhike le':

—Chhia'a gne'alho, Muestro.

40Na labirhe berhogüekene snabekene le'.

¿Noxha rhaka xozixhto Xhi'in Diozo?

(Mt 22.41-46; Mc 12.35-37)

41Jesús gnabene le'ake:

—¿Nobixhkia' rne'ake David nake xozixhto Xhi'in Diozo? 42Kuinksi David, lo guichi ki Salmos, rne':

"Diozo gochhie Diozo kia':

Gre'e tzala'a lhi' kia',

43nan gzoate'arha xhania'alho bene birhajxenkene loe'.

44¿Nonaka Xhi'in Diozo rhaka xozixhtoe David, la kuin David rhoe' lawe Diozo?

Jesús rhoekoenda ka muestro ki xhba'a

(Mt 23.1-36; Mc 12.38-40; Lc 11.37-54)

45Yogote'a bene rze'anagake, te Jesús gochhie bene lachhile'anke le': 46«Leguio chhia'adi ka' rhonka muestro ki xhba'a, rdankene slachhike le'an xhake tona, na rhe'ankene gonke le'ake balan lo laweye'aya. Rbekene bango yajlo lo yo'o ga' rhedobike kan lataj chhia'arhe nan rhagoke yeta; 47na rguie'alake yo'o kika nigolha weze'abi, na kinda bigaka be'a rhonke tona nan rledzake Diozo. Le'ake wazi'ike mazirhe yelarzakaya'a.»

Currently Selected:

San Lucas 20: ZAALuk

Highlight

Copy