Mateo̱ 21

Ni̱tjin nga tsasꞌen Jesuu̱ na̱xi̱nanda ꞌñu Jerusalen

(Mr 11.1-11; Lk 19.28-40; Jua 12.12-19)

1Jesuu̱ kjua ja xi kjibakuyáre̱ jichú ngande xi ꞌmí Betfage ku kixincha kꞌi̱a̱ Tjengi Olibo̱, jma je tiñare na̱xi̱nanda ꞌñu Jerusalen. 2Nga jichú kꞌi̱a̱ kua, Jesuu̱ tsichjajo̱ jó ja xi kjibakuyáre̱:

«Tangíjnu kui nga̱nde xi tsejénña sanda kꞌui. Nga fichújnu, kꞌi̱a̱ sitaꞌñu ngu burru chjun, xi sitꞌáre ngu burru chubachí. Chjundújnu ku ndibajújnu kꞌuí. 3Tsa tjinxi kúcha tsújnu, ku̱i̱cha tsubáre̱ chjungíjnu: “Ndia̱jni kjimachjénre; kjatꞌa̱ma tsikjatjinijnu.”»

4Ku̱a̱cha kuma tuxi ma nga tsitjusún én xi kitsú Namiña Diuu̱ nga kitsingiya xi tsuya enꞌen:

5«Ku̱i̱cha tꞌínjnu xu̱ta̱ xi chja̱ Jerusalen:

¡Chaséjnu, kꞌi̱a̱ ndiba xta̱xá tetjúnjnu!

Nimakjua kui,

burru tjisúnre̱ nga ndiba,

ngasún ngu burruchi.»

6Ngiajó ja xi kjibakuyáre̱ kijí ku xukúcha kitsú Jesuu̱ kitsiꞌin. 7Kiju̱ burru chjun kju̱ burruchi, ku yasúnre̱ najñu xi chajá xi incha jatjikja. Kisꞌejñasunre Jesuu̱ ku kijí Jerusalen.

8Kjín xu̱ta̱ xi ꞌyendute najñu xi chajá xi jatjikja ngaya ndiya jma nga faꞌa Jesuu̱. Kjaꞌi xi tsate tjiaꞌe̱ ya ku tekuácha ngaya ndiya ꞌyendu tuxi xu tsjune Jesuu̱. 9Ku ngieje xu̱ta̱-, xi yajatetjúnre̱ kju̱ xu yajatjengíre̱, inchakjindia:

«¡Natsjengíjni̱, jíxi Kjuaꞌiꞌnatsjengíjni!

¡Ngatuchakunné xi ndiba ngajoꞌe̱ Namiña Diuu̱!

Ngu kju̱a̱ndá, ¡ꞌnatsjengíjni, Namiña Diuu̱ xi ꞌñu kꞌa nga ngieje!»

10Nga tsasꞌen Jesuu̱ na̱xi̱nanda ꞌñu Jerusalen, ngieje xu̱ta̱ nga tsanga kꞌui, tsanga jan nga mejénre̱ nga bé, ku ku̱i̱cha inchatsú:

—ꞌYá kui xta̱.

11Ku xi jña tjima Jesuu̱ ku̱i̱cha inchakjengí:

— ¡Jesuu̱ kua, xta̱ xi tsuya Enꞌen Namiña Diuu̱! Nangi Nasare chja̱, nga̱nde xi ꞌmí Ngalilea̱.

Jesuu̱ ku xu̱ta̱ ndetsín xi inchabateñá ngaya ni̱ngu̱xi̱

(Mr 11.15-19; Lk 19.45-48; Jua 2.13-22)

12Nga tsasꞌen Jesuu̱ na̱xi̱nanda ꞌñu Jerusalen, tuxi ni̱ngu̱xi̱ kijí ku tsꞌatsje ngieje xi inchabateña ku inchaꞌbatsé najmi. Kitsikejen yamexa jma inchabasenkajó tao̱n xi chja̱ kjaꞌi na̱xi̱nanda ku tao̱nꞌe̱n ni̱ngu̱xi̱, y tekuácha kitsikejen yamaxaꞌe̱ xi inchabateña tuju. 13Ku ku̱i̱cha kitsúre̱: «Ku̱i̱cha tsú Namiña Diuu̱ ngaya Xu̱ju̱n Enꞌen: “niꞌyaꞌna ku̱i̱cha nikꞌin: ‘Niꞌya jma chjinengi kju̱a̱ndá’.” Tanga jún je ngajoꞌe cheje kinikꞌuyájnu.»

14Jaskan xu̱ta̱ xi tka, kju̱ xi majín ꞌbema, kitsitiñáre yajo̱ꞌe Jesuu̱, ku kitsindaya.

15Ja chanaꞌmi tetjun kju̱ chjine Kju̱a̱kixiꞌe̱ Namiña Diuu̱ tuxi ndá kitsití nga kube kúcha janda makjinjínña nga tsindaya xu̱ta̱, ku nga tsitꞌe nga niskindi inchakjindia tsjua nga inchabetkun Jesuu̱, xi Kjuaꞌikꞌatsjengíña. 16Kui kju̱a̱ nga ku̱i̱cha kitsúre̱:

—A tjinuꞌyéijí én xi inchatsú kui niskindi.

Ku̱i̱cha skengire Jesuu̱:

Ndá tetꞌéna. A faitsjenjínjnu kúcha tichja Xu̱ju̱n Enꞌen Namiña Diuu̱:

“Niskindi xixi,

xi tuku kjindinda ngisa,

séri sún xi betkunri.”

17Jaskan itjúni Jesuu̱ Jerusalen ku nga̱nde xi ꞌmí Betania̱ kijí. Kꞌi̱a̱ jaꞌáre ni̱tje̱n.

Kúcha kitsixí Jesuu̱ ya ingo̱

(Mr 11.12-14,20-24)

18Tuxi tꞌajñú te̱ kijíni Jesuu̱ na̱xi̱nanda Jerusalen. Nga tsuꞌba ndiya kubajóre̱, 19ku kꞌi̱a̱ kube ngu ya ingo̱. Ta̱nga nga je jichú tiña, ngují ingo̱ sakúre xi ma chine. Tu̱ xka̱tse tjínre kui ya. Kui nga ku̱i̱cha kitsúre̱ Jesuu̱: «¡Ngi ngují ni̱tjin nga fajári ingo̱!»

Tekuíni ura, kixí kui ya. 20Ku nga kube ja xi kjibakuyáre̱ najmi xi kuma, se̱n kumáre̱ tsinengiyáre̱ Jesuu̱: —Kúcha kuma nga tuxi kijna kixí kui ya.

21-22Ku̱i̱cha kiskengíre Jesuu̱:

—Kju̱a̱xikjáin najmi xi xinjnu tsanga sꞌejínjnu ku tu jó tu jánjin tjiánjnu nga̱tꞌaꞌe ngaꞌñu xi tjínre Namiña Diuu̱, ngieje najmi xi chjinengijnu nga chjinengíjnu kju̱a̱ndá, ku̱a̱cha kuma̱. Janda ku̱ma nga kuácha siaꞌánjnu xukúcha kitsꞌijúnꞌan ya ingo̱, ku tse najmi ngisa. Tsanga fixújnu kui na̱xi̱: “Tisubaꞌí kꞌui ku tikjaꞌi yajo̱ri ngajin ndachakuu̱n”, ku tsiꞌínjnu xki̱ ndachakún.

Ngaꞌñu xi tjínre Jesuu̱

(Mr 11.27-33; Lk 20.1-8)

23Tsasꞌen Jesuu̱ ngaya ni̱ngu̱xi̱ y tsaꞌangíre̱ nga ikuyáre̱ xu̱ta̱. Já chanaꞌmi xi ꞌñu xáꞌe kju̱ xu̱ta̱ changa xi inchatetjúnre̱ na̱xi̱nanda kitsitiñáre yajo̱ꞌe Jesuu̱ ku tsinengiyáre̱:

—ꞌYá xi kitsjuári ngaꞌñu nga tjiniꞌín ngieje kui najmi. 24-25Ku̱i̱cha kiskengíre Jesuu̱:

—Án tekuácha minengiyamájnu ngu najmi: ꞌYá xi kitsjuáre kju̱a̱ Jua xi Batenda nga xu̱ta̱ batenda. A Namiña Diuu̱ a xu̱ kjaꞌi xu̱ta̱. Tsanga chjungíjnu kui én, ku án xiyájnu ꞌyáxi kitsjuána ngaꞌñu nga tsiꞌinꞌán ngieje najmi xi kuyájnu.

Tsichjasijú xikjin, ku ku̱i̱cha inchatsú: «Tsa chjungíña nga Namiña Diuu̱ kitsjuáre ngaꞌñu Jua xi Batenda, kuitsuna Jesuu̱ nga mí xá kiñaꞌanjínña xki̱. 26Ku ngingu kua, tjitkúnña tsa xu̱ta̱ nga̱sunde kitsjuáre ngaꞌñu bixuña, nga̱tꞌa xu̱ta̱ sꞌejínre nga xi tsuya Enꞌen Namiña Diuu̱ ku kui kitsingiya.» 27Ku ku̱i̱cha kitsú:

—Yajíjni̱.

Ku Jesuu̱ ku̱i̱cha skengire:

—Já tekuácha án xiyajíjnu ꞌyá xi tsjuána ngaꞌñu nga tsiꞌinꞌan ngieje kui najmi.

Tseꞌe ngiajó kjindi xi tjínre ngu xta̱

28Tekuicha te̱ kitsúnire̱ Jesuu̱:

—Mi kju̱a̱kitakun xi baꞌíjnu nga je kinuꞌyájnu en xi xiyamájnu. Ngu xta̱ jó kjindi tjínre, ku ku̱i̱cha kitsúre̱ xi changa: “Kjindiꞌna, tjainixái nga̱jnu tutsejéña.”

29»Ku̱i̱cha skengi kjindi: “¡Faijiꞌa̱n!”

»Ta̱nga jaskan nga isenkajó kju̱a̱kitakunꞌe̱n ku kitsixáni.

30»Ku tekuácha kitsúre̱ kui xta̱ tiꞌe̱ xi chu̱ba̱, nga ngatjaitsixá, ku ku̱i̱cha skengi kui ti: “¡Jun nami, faiꞌa̱n!”

»Ta̱nga kju̱a̱xikjainjin nga kijí. 31Jmá nga ngiajó kjindiꞌe kui xta̱ xi kitsiꞌin najmi xi mejénre kui nga nami.

Já chanaꞌmi kju̱ xi inchatetjúnre̱ na̱xi̱nanda ku̱i̱cha kiskengi:

—Ti xi changa xi kitsiꞌin najmi xi tsinengíre̱ namiꞌen.

Ku̱i̱cha kitsúre̱ Jesuu̱:

—Xi kju̱a̱xikjain én xi xinjnu nga xu̱ta̱ xi xaba, xuku xi faꞌachji ton xi machjitái xá xi ñaꞌánña kju̱ xi yachjin basen, ku tjún xu̱ta̱ xi xaba basen jma batexuma Namiña Diuu̱, tukꞌuajíre̱ nga jun. 32Nga̱tꞌa nga jiꞌi Jua xi Batenda ikuyáre̱ xu̱ta̱ nga najmi xi ndá ngatsiꞌín ku nga ngatꞌeꞌénre Namiña Diuu̱, ta̱nga jun kiñaꞌanjínjnu xki̱. Ku tusá xi faꞌachji ton ku yachjin basen kitsiꞌínre xki̱. Ku jun, ndatsa kuya̱jnu kui najmi, kikasenkajojíjnu kju̱a̱kitakunjnu, ku tutku̱ nga kisꞌejinjínjnu nga̱tꞌaꞌe.

Jnu̱ tutsejé xi kjimachjitjái xkisá

(Mr 12.1-12; Lk 20.9-19)

33»Nuꞌyájnu xi ngi ngu beꞌechuba̱jnu: Ndia̱ꞌe ngu nangi yaja ngu jnu̱ tu̱ tseje ku ꞌyengaꞌya ngieje ngandaiꞌe̱. ꞌYendá ngu ngande jma ma nindá bino jma nichjen tutseje xi machare, ku isén ngu torre̱ jma janda ma chasére. Ku kjia kitsjuáre kjín ja xi ꞌyechji xkisáre ku kjia kijitsabe.

34»Nga jichú nitjinꞌen nga je kúcha tu̱ tseje, xi ndia̱ꞌe nangi kitsingiya musu, xi kikinengi kúcha tjin mejénre ngieje tuxi kucha. 35Ta̱nga musu xi jichú ndáji kitsikjeyáre̱ kui ja. Ngu xi isénre̱, kjaꞌi xi kitsikꞌén, ku ngingu xi yeꞌére̱ ndi̱ajo̱.

36»Kui nga xi ndia̱ꞌe tusa kjín musu tukꞌuajíre̱ xi tjún kitsingiya, ta̱nga kui ja tekuátsecha ndáji kitsikjeyáre̱. 37Nga jetꞌa, xi ndia̱ꞌe jnu̱ tu̱ tseje tiꞌe̱ kitsingiya, nga̱tꞌa kitsikjáo: “Kui ja sku̱e̱tkun tíꞌna̱.”

38»Ta̱nga nga kube kui ja nga tiꞌe̱ xi ndia̱ꞌe jichú, ku̱i̱cha kitsúre̱ xikjin: “Kui xta̱chii sꞌejñáre̱ jnu̱ tu̱ tseje nga ꞌme xi ndia̱ꞌe. Sikꞌénña; ku tsaña kuma ngieje.”

39»Kui ja skabe xta̱chii, itsjé ngajin jnu̱ tu̱ tseje ku kitsikꞌén.

40»Nga fichú ndia̱ꞌe jnu tu̱ tseje, mí xi tsꞌijún kui ja, kúcha nikjáojnu jún.

41Ku̱i̱cha kiskengi:

— Ngují kju̱a̱ꞌáonchutꞌa kꞌuére xi ndia̱ꞌe nga tsikjesún kui ja xaba. Ku kjia tsjuánire̱ kjaꞌi ja xi ꞌbechji xkisáre xi tsjuáre̱ kúcha tjin tuxi macha mejénre.

42Ku̱i̱cha kitsúre̱ Jesuu̱:

—A faitsjenjínjnu kúcha tjichja Xu̱ju̱n Enꞌen Namiña Diuu̱:

“Ndia̱jo xi kitsijaꞌojí

ja xi kitsindá ni̱ngu̱xi̱

kui xi ndi̱a̱jo̱ tetjun kjatꞌei.

Kui xi tu̱ku̱a̱máña,

Ta̱nga Namiña Diuu̱ xi ku̱a̱cha kitsiꞌin.”

43»Kju̱a̱xikjain xi xinjnu nga kjebaꞌájnu Namiña Diuu̱ kju̱a̱kixi nga sakujnu nga̱nde jma kui batexuma, ku xi tsiꞌinre xki̱ nga ngieje tsjuáre. 44Tuꞌyáni xi ngatensún ngasún ndi̱a̱jo̱ xi kitsichꞌo ja chjine xá chjinde, tu xubaꞌetsé sꞌe̱ndu. Kutsa kui ndi̱a̱jo̱ tjin xi mentjáire̱, tu chajoꞌe̱tse sꞌejña.

45Nga tsitꞌe ja chanaꞌmi kju̱ fariseo̱ xi inchatetjún nga yeꞌechu̱ba̱ ku inchandsijin Jesuu̱ én xi yeꞌe, kukjínre̱ nga kui xi tjitsúre. 46Kui nga mejénre skabeꞌñú, ta̱nga kuꞌñujín kakun. Nga̱tꞌa inchatsakjúnre xu̱ta̱, nga̱tꞌa xu̱ta̱ inchatsikjo chjineꞌenꞌen Namiña Diuu̱ Jesuu̱.

Currently Selected:

Mateo̱ 21: MZI

Highlight

Copy