Mateo̱ 20
20
Xu̱ta̱ xi tsixá jma sindu jnuꞌe̱n tutseje.
1»Tekuácha ma jma kjibatexuma Namiña Diuu̱ xukúcha ma ngu jnuꞌe̱n tutseje. Tuxi tꞌajñú itjú xi tse̱ꞌe nga kikangitsjái ja xi tsixáre̱ jnu tutsejeꞌe̱. 2ꞌYendaju ja xi tsixá nga ꞌbechji ndujure xi ngu ni̱tjin; ku kitsingiyá tsixá. 3Tsatu kjuane ñaján, te̱ kijíni xi ndia̱ꞌe jnu tutseje, ku jma tjián ndetsín, kjínma ja xi áre̱ nga sindu. 4Kitsúre: “Tjainixájnu jan jnu tutseje̱ꞌna, kun ndá ꞌbechjíjnu.” Kuyúre̱ kui ja ku kijitsixá. 5Tsatu kjuane tejó nga nchisen, tekua te̱ kitsiꞌínni xi tse̱ꞌe jnu tutseje; ku tekua kitsiꞌínni nga kjuane ján ngixún. 6Jé kjuane ón ngixún nga te̱ kijíni jma tjián ndetsin xi ndia̱ꞌe jnu tutseje, ku nga tjin ja xiꞌin xi áre̱. Kui nga tsinengiyáre̱: “Mí xá kꞌui tijñanjnu ngieje ni̱tjin ku ngují najmi tjiñaꞌánjnu.”
7»Ku ku̱i̱cha kiskengi kui ja: “¡Nga̱tꞌa najmí xi inchatsjuájni xá!”
»Ku ku̱i̱cha kitsére̱ xi ndia̱ꞌe: “Tjainixájnu ján nangiꞌna̱.”
8»Nga je tsején jñu, xi ndia̱ꞌe jnu tutseje kitsúre̱ xi sian tetjúnre̱ ja xi inchatsixa: “Nukjuairi ja xi kitsixá ku tꞌechjiri, tjún xi jiꞌi kjuetꞌa, ku nga kjuetꞌa xi tjún jiꞌi.”
9»Ku kitsitiña yajo̱ꞌe ja xi jichú nga je kjuane ón ngixún ku ni̱tjin nduju kuchjíre. 10Jaskan, nga jaꞌa ja xi tjun jichú, nga tuxi tꞌajñú, kitsikjao nga tséra machjíre ngisa. Ta̱nga tekuátsecha ngu ni̱tjin ndujútse kuchjíre. 11Nga je kiskabé ton, kui ja tsixá chꞌao tsichja nga̱tꞌaꞌe xi ndia̱ꞌe jnu tutseje. 12Ku janda nga tsichja: “Xi kjuane ón ngixún jichú nga kitsixá, sꞌéitse ngu ura kitsixá, ta̱nga jí tekuácha tjin kꞌuechjiri xuku jín, xi ngu ni̱tjin kinichukjuájni̱ ndaba. Ndáji tjin nga kuacha.”
13»Ta̱nga xi ndia̱ꞌe jnu tutseje ku̱i̱cha kitsúre̱ ngu kui ja: “¡Chaséi amingo̱! Xuku nga án mítsa ndáji tetsꞌijúnra. Tikjaitsjén nga kisꞌeña nga jí nixáiji ku ngu ni̱tjin ndujú ꞌbechjíra. 14Chjabi ton xi kiniꞌínji, ku tꞌáin. Tsijí kju̱a̱ tsanga tekuácha tjin ꞌyechjína ja xi kjuane ón jichú. 15Ma tsꞌijúnꞌan tao̱nꞌna tuxi mejénna. Mí xá ontakín máiji nga ndáju̱ꞌa̱n xu̱ta̱ xi kjaꞌi.”»
16Ku̱i̱cha kitsikje enꞌen Jesuu̱: «Ku̱a̱cha, xi tjún kjatꞌei, kuixi kju̱e̱tꞌá kumá; ku xi kju̱e̱tꞌá kjatꞌei, kuixi tjún kumá.»
Jesuu̱ te̱ tsichjani ngi ngu ndiya nga nikꞌen
(Mr 10.32-34; Lk 18.31-34)
17Nga kjifai Jesuu̱ ngatje̱n Jerusalen, ꞌyetku xi ngitejó ja xi kjibakuyáre̱ ku ku̱i̱cha kitsúre̱:
18«Xukúcha tjiyájnu, Jerusalen kuangíña. Ku án, Kjindiꞌe xu̱ta̱ nga̱sunde, tsikasꞌénna xu̱ta̱ ngaya tsja ja chanaꞌmi xitetjún kju̱ chjineꞌen Kjuakixi. Ngatꞌén kuitsuna kui xu̱ta̱, 19ku tsikasꞌénna ngaya tsja xi tao̱nreꞌán xi kuijnukéna, ku kuaꞌónna ku kru batꞌána nga tsikꞌénna. Ta̱nga xi ma jan ni̱tjin, fixꞌajin ngajónina.»
Najmi xi tsinengíre- Jesuu̱ naꞌe̱n Santia ku Jua
(Mr 10.35-45)
20-21Naꞌe̱n Santia ku Jua, xi ja xi kjibakuyáre̱ Jesuu̱ ngiajó, kiju̱ tjiujún kjindiꞌe nga kichjajú. Nga jichú, isén tkuꞌe xi na̱ ngakjáin Jesuu̱ nga̱tꞌa ngu kju̱a̱ndá tsinengíre̱. Ku tsinengiyáre̱ Jesuu̱:
—Mí xi mejénri.
Ku̱i̱cha kitsú naꞌen kui ja:
—Tiꞌíntse kju̱a̱ndá, nga tiꞌín kjuakixi, nga je tijniyéi yaxileꞌe jma nga ji batexumai, nga kjindiꞌna tutsjái nga jma mijni ngatꞌendutꞌári, ngu xi ngandá ku ngu xi ngaskun ngatꞌejñatꞌári.
22Kiskengí Jesuu̱:
—Xuku nga jun yajíjnu najmi xi tjichjinengíjnu. A chukjuajnu ngieje kju̱a̱ꞌón kju̱a̱nde xi kjueyána.
Ku kiskengí ngiaján kui xu̱ta̱:
—Jun, kjuichukju̱a̱jni.
23Ku̱i̱cha kitsúre̱ Jesuu̱:
—Xi kju̱a̱xikjain nga tekuácha kjueyájnu xuku án. Ta̱nga namiꞌna xi ku̱i̱tsu̱ ꞌya xi ꞌñu chjiꞌe ngaya jma nga kui tjitsiꞌin kju̱a̱texuma. Najmi xi tjichjinengíjnu, anjín xi bé najmi xi ku̱ma.
24Nga kube ngieje xi ngite ja xi ikuyare̱ Jesuu̱, kitsitiju̱ Santia ku Jua. 25Kui nga Jesuu̱ tsichjáre̱ ngieje ku ku̱i̱cha kitsúre̱:
«Jun najmi xi yájnu nga xi sindugínre̱ na̱xi̱nanda xuku xi kui ndia̱ꞌe tsikjeyáre̱, ku xu̱ta̱ xi ꞌñu kꞌa xá xi tjínre kuixi tsiꞌin kju̱a̱ꞌñure kjuakixi xu̱ta̱ na̱xi̱nanda. 26Ta̱nga ngajínjnu tsuba̱jíre̱ nga ku̱a̱cha kuma. Tusáni tsa tjin xi mejénre ngajínjnu nga kui xi ꞌñu chjiꞌe, kuixi tsubáre̱ nga tsiꞌin xki̱ xi ngisa. 27Tsa tjin xi mejénre nga kuixi tetjun kuma, tsubáre̱ nga musuꞌe xi ngisa tsikꞌuya yajo̱ꞌe. 28Án, Kjindiꞌe xu̱ta̱ nga̱sunde, ku̱a̱cha tetsiꞌinꞌan. Jiꞌijiꞌan kui nga̱sunde tsa ñaꞌánna xki̱, tusáni án xi tsiꞌinꞌan xki̱ xi ngisa. Jiꞌiꞌan nga kjuaꞌitsikasꞌenꞌa̱n kju̱a̱mijñachunꞌna tuxi kjínma xi bitjungi.»
Nga jó xu̱ta̱ xi tka kitsindaya Jesuu̱
(Mr 10.46-52; Lk 18.35-43)
29Nga itju Jesuu̱ na̱xi̱nanda xi ꞌmí Jeriko̱ kju̱ ja xi kjibakuyáre̱, kjínma xu̱ta̱ xi kijitjengíre̱. 30Kꞌi̱a̱ tsꞌua ndiya jóma xu̱ta̱ xi tka sindu. Nga tsitꞌe nga Jesuu̱ xi kjifaꞌa, ku kiskindia: «¡Ndia̱jni, jíxi Kjuaꞌiꞌnatsjengíjni, chei nimatakínjni ku tisinjínjni!»
31Xu̱ta̱ xi tjima kitsitiju̱ ja xi tka, ta̱nga tusama ꞌñu kiskindia: «¡Ndia̱jni, jí Kjuaꞌiꞌnatsjengíjni, tiniꞌmai takín yajo̱ri nga̱tꞌajni ku tisinjínjni!»
32Kui nga kisasen Jesuu̱, tsichjáre̱ ja xi tka ku tsinengiyáre̱:
—Mi xi mejénjnu nga tsiꞌinꞌan nga̱tꞌájnu
33Ku̱i̱cha kiskengi ja tka:
—Ndia̱jni, tiꞌin nga te̱ ngatutsején nijni̱.
34Kunima takúnre̱ Jesuu̱ ngiajó kui jatkia, ki skinajúnre̱ xku̱n. Tekuíni chu̱ba̱ kutsejénnire̱ ku kitjengire Jesuu̱.
Currently Selected:
Mateo̱ 20: MZI
Highlight
Share
Copy
Want to have your highlights saved across all your devices? Sign up or sign in
México © Sociedad Bíblica de México, A.C. AÑO
