Mateo̱ 14

Nga kꞌen Jua Xi Batenda

(Mr 6.14-29; Lk 9.7-9)

1Kui ni̱tjin Erode̱ Antipa̱ kjitjián xta̱xá Ngalilea̱. Ku nga tsitꞌe najmi xi inchatsú xu̱ta̱ nga̱tꞌaꞌe Jesuu̱, 2ngu ni̱tjin kitsúre̱ musuꞌe: «Nga xi kju̱a̱xikjain, kui Jesuu̱ a kui Jua xi Batenda, xi te̱ jiyánire̱. A kui kju̱a̱ tjínre ngaꞌñu nga tsiꞌin najmi xi janda sꞌejinjínña.»

3-4Ni̱tjin xi sꞌeima jaꞌa, Jua xi Batenda, ku̱i̱cha kitsúre̱ Erode̱: «¡Ndáji tjin najmi xi tjiniꞌin! Chju̱nꞌen tsꞌejí Filipo̱ ma Erodia̱, ku jí kichjaꞌíri tuxi kuma nga kuí ixantsjaiji̱.»

Kui kju̱a̱ tuxi ꞌñu kitsitiju̱ Jua kui Erode̱, ku kitsiꞌin kjuakixi nga chjaꞌbeꞌñu, nga kadena ꞌbetꞌa ku nduya basen. 5Erode̱ mejénre nga tsikꞌen Jua. Ta̱nga majín kakun nga̱tꞌa tjitsakjúnre xu̱ta̱, nga̱tꞌa kjínma xi sꞌejínre nga xi tsuya Enꞌen Namiña Diuu̱ Jua.

6Nga itsjé sꞌuiꞌe nga kjife nu Erode̱, kité tsakjínꞌen Erodia̱ ngakjáin ngieje xi kinikitꞌe sꞌui. 7Kui nga Erode̱ tuxi ndá kutsjuare̱ kúcha kité tsakjin. Kui kju̱a̱ nga kitsjua enꞌen nga tsjuáre̱ tu najmi xi kuinengire̱. 8Tsitꞌe kui én Erodia̱ ku tsinengíre̱ tsakjinꞌen nga tku̱ Jua xi Batenda ngatinengíre̱.

9Nga tsitꞌe kui én Erode̱, tuxi ngí kumáre̱, nga̱tꞌa jé kitsjua enꞌen nga tsjuáre tu̱ najmi xi mejénre, ku majín tsa tsikitjusunjín én xi je kitsjua ngixku̱n xu̱ta̱ xi kitsikitꞌe sꞌui. Kui nga ngite ngují najmi kumá xi kitsiꞌin, ku kitsiꞌínre kjuakixi musuꞌe nga ngatsjuáre tsakjín najmi xi kjiminengi. 10Kui nga kijí musu jma kjisián nduya ku tsatekja kasín Jua, 11ku ngu tiba ꞌyeya, ku kiju̱re̱ tsakjin. Ku tsakjin tjeꞌñu kicháre̱ naꞌe̱n.

12Ja xi ikuyáre̱ Jua kikjaꞌá yajo̱ꞌe chjineꞌen ku yañajín. Ku kjia kijí nga kitsuyáre̱ Jesuu̱ najmi xi kuma.

Jesuu̱ kjín xu̱ta̱ kitsjuáre̱ xi chine

(Mr 6.30-44; Lk 9.10-17; Jua 6.1-14)

13Nga tsitꞌe Jesuu̱ najmi xi kumataꞌin Jua xi Batenda, tsijín ku tsutsu je ku kijí ngu ngande jma nga ma ꞌbejña suba. Nga kube xu̱ta̱ xi chja̱ ngande xi tiña sindu nga kjifue Jesuu̱ nga̱tjen ndiya kixí kitjengire.

14Itjejenre̱ Jesuu̱ tsutsu jé ku kube nga tuxi kjínma xu̱ta̱ xi kꞌi̱a̱ sindutku. Sꞌei ón skutꞌa kui xu̱ta̱ ku kitsindaya ngieje xi ndáji sindúre.

15Nga je kjamangixún, ja xi kjibakuyáre̱ kitsitiñáre yajo̱ꞌe ku tsichjajo̱ Jesuu̱:

—Ngande kjixu kꞌui, ku je kjimangixún. Kua tixíri xu̱ta̱ nga ngatjai na̱xi̱nanda ku nga̱tꞌatsére̱ xi chine yajo̱ꞌe.

16Tsichja Jesuu̱:

—Najmí mí xá nga fué. Titjuájnu xi chine.

17Ku ku̱i̱cha skengi ja xi kjibakuyáre̱:

—Ta̱nga óntsema ni̱pan xi tjínjni ku jótsema tjio̱.

18Ku̱i̱cha kitsú Jesuu̱:

—Ndibajújnu̱ kꞌui.

19Nga je kitsiꞌin kjuakixi nga ꞌbendu xu̱ta̱ ngajín ndexichu, skabe Jesuu̱ xi ón nipan kju̱ xi jó tji̱o̱, tsase ngakꞌa ku kitsjuáre nikꞌuechji Namiña Diuu̱. Jaskan nga kjín itsjé nipan ku kitsjuáre ja xi kjibakuyáre̱, tuxi ngatsikabíre̱ xu̱ta̱:

20Ngieje nga tsakjien ku ngieje nga kitsere. Ku nga jaya ja xi kjibakuyáre̱ ngieje xuba xi tsꞌangi, tejó ni̱si̱n kumá. 21Kumára̱ ón mi ja xiꞌin xi tsakjien, kjaꞌi xi yachjin ku kjaꞌi xi niskindi.

Jesuu̱ kisꞌebixisún ngasún ndijua

(Mr 6.45-52; Jua 6.16-21)

22Nga je jaꞌa kui kju̱a̱, kitsiꞌinre̱ manda ja xi kjibakuyáre̱ Jesuu̱: «Tijínjnu tsutsu je ku ngundá chincha tangijnu. Án kꞌui batejña nga tsiꞌinma xki̱ xu̱ta̱ nga inchafué, ku sꞌeima ku̱re̱ fichutje̱ngijnu.»

23Nga je kijí ngieje xu̱ta̱, na̱xi̱ tsijín suba Jesuu̱ nga kikinengíre̱ kju̱a̱ndá Namiña Diuu̱. Kꞌi̱a̱ kisꞌejña nga tsinengi kju̱a̱ndá janda nga kujñú.

24Ku tsutsu je, je tuxi kjin kjitjensúnre̱ tꞌande; kjibeꞌe ngakjainre tjao nga tsuꞌbajín ngajin ndijua ku tuxi ꞌñu inchamentꞌare tjiaon.

25Tuku jñu ngisa nga kitsitiñáre yajo̱ꞌe Jesuu̱ jma kjifué tsutsu je. Kjitsuꞌba ngasún ndijua. 26Kube ja xi kjibakuyáre̱, ta̱nga kubejí tsanga kui. Ngimajínre̱ tkun nga kiskindia:

—¡Ngu se̱n! ¡Ngu se̱n!

27Ku tjeꞌñu tsichjajo̱ Jesuu̱:

—¡Xuxuña! ¡Án kua! ¡Ngatu tkunjínjnu!

28Ku̱i̱cha skengi Pe:

—Ndi̱a̱ꞌna̱, tsanga kjáin nga jí, tiꞌín kjuakixi nga tekuácha ngatumána mangisún ndijua ku fuetjengira jma tsutja̱i.

29Ku kitsúre̱ Jesuu̱:

—¡Jabí!

Tjeꞌñu jajenre̱ Pe tsutsu je. Kijí ngasún ndijua jma ngatje̱n tsuꞌba Jesuu̱. 30Ta̱nga nga kubere̱ yajo̱ꞌe ngaꞌñuꞌen tjao̱, kitsakjún. Tekꞌiáni je kjifué nginda, ku skindia:

—¡Ndi̱a̱ꞌna̱, ꞌnatsjengina!

31Kui nga skexinga ngasuꞌe Jesuu̱ ku skabe Pe ku ku̱i̱cha kitsúre̱:

—Pe, tjeꞌñu chubátse nga sꞌejínri nga̱tꞌaꞌna. Mí xá jóján kikꞌejníri anima̱ri

32Ku nga inchamijín ngiajó ngaya tsutsu je, tsendáni tjo. 33Ngieje xi sindu ngaya tsutsu je inchatꞌáre tkuꞌe Jesuu̱ ku ku̱i̱cha kitsúre̱:

—¡Kjáinni, jí xi kjindiꞌe Namiña Diuu̱ji!

Nga kitsindaya Jesuu̱ xi ndáji sindúre jma ꞌmí Jenesare̱

(Mr 6.53-56)

34Jesuu̱ ku ja xi kjibakuyáre̱ tsꞌatiukjá chincha janda nga jichú janda jma ꞌmí Jenesare̱. 35Nga kube na̱xi̱nanda nga Jesuu̱ xi jichú, kitsuyasún ngieje kui nangi. Kui nga xu̱ta̱ kiju̱ ngieje xi ndáji sindúre jma kjitjián Jesuu̱, 36ku ꞌyetsꞌuare̱ nga ngatsjuáre kju̱a̱ nga kjingajun najñu xi yajá. ¡Ku ngieje xu̱ta̱ xi ndáji sindúre xi skingajun najñu xi yajá Jesuu̱, kundaya!

Currently Selected:

Mateo̱ 14: MZI

Highlight

Copy