Luka̱ 2

Nga kitjukja Jesuu̱

(Mt 1.18-25)

1Ngindeꞌe̱ nga kje tjukjají Jesuu̱, Augusto̱ xi xta̱xá xi kjitjián ngieje nangi Roma̱, itsjé ngu xu̱ju̱n ngaꞌñu nga ngu senso̱ nikisitjén, xi mejénre tsú nga ngu xu̱ju̱n ninda jmá ꞌbedutꞌa jínꞌen ngieje xu̱ta̱ xi sindu nangi jma nga kjibatexuma Ndabaxá Roma̱. 2Kui ni̱tjin, Kirinio̱ ꞌmí xi tjián xitetjún xi chja̱ Siria̱, ku kuí kisasentetjúnre̱ nga kinikisitjén kui senso̱ xi tjún kunda nangi xi chja̱ Palestina̱.

3Ngieje xu̱ta̱ nga̱nde jma chja̱ xi xu̱ta̱ꞌe ma kꞌi̱a̱ tsubáre kijí, tuxi ma nga ngútse xu̱ju̱n sꞌendutꞌa jínꞌen. 4Xu̱ta̱ tjeꞌe̱ Ndabi̱ chja̱ Kuse. Ku nga Nasare kjitjián Belen tsubáre nga kijí tuxi kꞌi̱a̱ sꞌetꞌa jínꞌen, nga̱tꞌa kui nga̱nde kitjukja ni̱tjin changa Ndabi̱ xi Xtaxá Tetjun kumá. 5Jña kijí Maria̱, chjunꞌen, xi kjindi yaꞌa kui ni̱tjin.

6Nga jichú Belen, kjiama tsejénre Maria̱ nga kitjukja 7kjinditjunꞌe̱n. Tanga kisakujíre nga̱nde jma ꞌbendufe kui ni̱tje̱n, kui nga jma ꞌbendútse chu̱ xi tjínre xu̱ta̱ kisakúre̱ nga̱nde. Nga kitjukja kjindi kitsikjatjikjá najñu Maria̱ ku kajo xi nikjienyá chu̱ yaya. 8Kui ni̱tje̱n tiñare Belen tjima ja xi inchatsikjién chu̱tsa̱ngaꞌe. 9A tu̱ trátse ngu kjinditsjeꞌe Namiña Diuu̱ ikúre yajo̱ꞌe ku jatꞌai ngandaiꞌe̱ jma tjima, ngaꞌñuꞌen Namiña Diuu̱. Ku tuxi ndá kitsakjún kui ja, 10ta̱nga kitsúre̱ kjinditsje: «Nga tu̱ tkunjínjnu. Ngu én xi ndá kjitsuꞌbaju̱jnu xi tsjua kumáre anima̱jnu: 11¡Belen kju̱a̱tjukja ma xi jajin Namiña Diuu̱ nga ꞌBatsjengiña! ¡Kuí xi ꞌBatsjengiña, Ndia̱ña! 12Niꞌinjín yájnu ꞌyá nga̱tꞌa ngaya kajo jma nikjienyá chu̱ kjife, ku najñu xi fanchuꞌan niskindi jatjikja.»

13Trátse tuxi kjínma kjinditsje xi kutsejen ndiu̱jmi ku inchabetkun ku inchatsitsjua Namiña Diuu̱ nga inchasére:

14«¡Ngatuya je Namiña Diuu̱ ndi̱u̱jmí,

ku ngatꞌére kju̱a̱chꞌan nangi

ngieje xi tjáore Namiña Diuu̱!»

15Ku nga je kijíni kjinditsje ndiu̱jmi, xi inchatsikjién chu̱ꞌe ku̱i̱cha kitsúre̱ xikjin: «¡Kuiyúña nga tjáiña Belen, tjaichaséña kjindi xi tjitsuyaña Namiña Diuu̱!»

16Kui ja xi inchatsikjién chu̱ꞌe tjeꞌñu kijí kijna kijna Belen, ku kꞌi̱a̱ sindu Maria̱ kju̱ Kuse, ku ngaya kajo jma nikjienya chu̱ kjiya kjindi. 17Ku nga itju kui nga̱nde, itetsajo én xi kitsúre̱ kjinditsje nga̱tꞌaꞌe kjindi. 18Ngieje xu̱ta̱ xi kꞌi̱a̱ sindu kuse̱nre̱ nga tsitꞌe kui én.

19Maria̱ tuxi ngaya anima̱ꞌen jaya ngieje najmi xi kjima, ku tuxi ndá kitsikja̱o. 20Kui nga kijíni kui ja xi inchatsikjién chu̱tsa̱nga̱ꞌe. Ku ngunduju ndiya inchabetkun Namiña Diuu̱ ku inchatsjuáre nikꞌuechji nga̱tꞌaꞌe najmi xi kube ku tsitꞌe. Ngieje nga ku̱a̱cha kumá xukúcha kitsúre̱ kjinditsje.

21Nga je xi jin ni̱tjin nga kitjukja kui kjindi, kichjunjen tjiuxin yajo kjaꞌe ku Jesuu̱ kikꞌetꞌajínre. Nga̱tꞌa kuácha tsinengi xi tsixatꞌare Namiña Diuu̱, nga kitsuyáre̱ Maria̱ nga kjindi ꞌbére.

Jesuu̱ ku Simeo̱n

22Nga je xi yachán ni̱tjin nga kitjukja Jesuu̱, kiju̱ ni̱ngu̱xi̱ xi chja̱ Jerusalen xi na xi nami kumáre̱, nga kikaku ngixku̱n Namiña Diuu̱. 23Ku̱a̱cha tjichja kju̱a̱kixi xi kitsjua Moise: «Nga xiꞌin bitju kjindi xi tjún tjukja, tsubáre nga Namiña Diuu̱.» Nikasꞌenxkire̱ 24Ku tekuácha batexuma kju̱a̱kixi nga Namiña Diuu̱ ꞌbesúnre̱ yamexa jó kjindiꞌe tu̱ni̱ña̱ kutsa jó tuju.

25Kui ni̱tjin kisꞌejña na̱xi̱nanda Jerusalen ngu xta̱ xi ꞌmí Simeo̱n xi tꞌeꞌénre Namiña Diuu̱ ku tuxi tjóre. Kui xta̱ tjikuyáre̱ nga Namiña Diuu̱ tsixan Israe. Ngayaꞌa̱sen xi Tjse kjitjenjún Simeo̱n, 26xi kitsúre̱ nga tjún béma nga tjukja xi jajin Namiña Diuu̱ nga ꞌBatsjengiña ku kjiátse ꞌme, kui xi kitsúre̱ Namiña nga faꞌi.

27Kui ni̱tjin Ngayaꞌa̱sen xi Tsje, kitsiꞌínre manda Simeo̱n nga kijí ni̱ngu̱xi̱ jmá bitju sꞌui.

Nga tsasꞌen ngaya ni̱ngu̱xi̱ xi nami xi na mare̱ Jesuu̱ kju̱ kjindi, nga inchafué tsikitjusún xukúcha tsú kju̱a̱kixi, 28Simeo̱n tsakꞌa kjindi, kitsitsjuaju̱ ku kubetjun Namiña Diuu̱ ku ku̱i̱cha kitsú:

29«Kjatꞌe, Namiña Diuu̱ꞌna,

je ma nga baꞌíni kju̱a̱ nga chꞌan beyaꞌan.

»¡Je kinikitjusín én xi kitsaꞌí!

30»Xkunꞌan ma

je kube xi jajin Namiña Diuu̱ nga ꞌBatsjengiña,

31xi kiningiyéji

ku ngieje na̱xi̱nanda tsubáre nga sku̱e̱.

32»Kuí xi kꞌu̱ya ndiꞌi

xi tsitsejénre

ngieje na̱xi̱nanda xi tjin,

ku kuí xi ndá kju̱a̱ꞌakja jínꞌen

ngaya na̱xi̱nandari Israe.»

33Kuse ku Maria̱ tuxi tsjuá kumáre̱ anima̱ꞌen ngieje én xi tjichja Simeo̱n nga̱tꞌaꞌe kjindi.

34Ku kitsichakún Simeo̱n ngiaján kui xu̱ta̱, ku ku̱i̱cha kitsú Simeo̱n nga tsichajo Maria̱: «Namiña Diuu̱ kitsingiya kui kjindi tuxi kjín xu̱ta̱ xi chja̱ Israe bitjungi, ku kjín xi maje̱re. Kuí xi tsuya najmi xi kuma, ku tuxi kjín kuma xi ndáji ku̱a̱ꞌa. 35Ku̱a̱cha yáre mí xi inchatsikjo nga kju̱a̱xikjain nga ngu ngu xu̱ta̱. Ku jí Maria̱ ngieje najmi xi kuma tuxi ón kumáre anima̱ri xuku nga miti ningikja anima̱ña.»

Jesuu̱ ku chjine Enꞌen Namiña Diuu̱ xi ꞌmí Aná

36Tekuácha kꞌi̱a̱ kjitjián ngu chjun xi je changa, xi chjine Enꞌen Namiña Diuu̱. Aná ꞌmí kui chjun, tsakjinꞌen Penue xi nangiꞌe̱ Ase chja̱. Nga xungu kumá Aná yatu nu kisꞌejñajun xiꞌin, 37ta̱nga kjatꞌei je chjun xꞌan xi kꞌen xꞌinꞌe̱n tsꞌuya ku ichate kateñujún nu tjínre. Ni̱tjin ku ni̱tje̱n nga ni̱ngu̱xi̱ jmá matku xu̱ta̱ judio̱ tsuꞌba, nga kjindiá tsikjaꞌa yajo̱ꞌe, nga minengi kju̱a̱ndá nga betkun nga tsitsjua Namiña Diuu̱.

38Nga je tsichja Simeo̱n, kitsitiña yajo̱ꞌe Ana̱ ku kitsitsjua Namiña Diuu̱, ku kitsuyáre̱ ngieje xu̱ta̱ nga̱tꞌaꞌe kjindi xi ꞌmí Jesuu̱, kui xu̱ta̱ xi inchakuya nga tsixán Namiña Diuu̱ Jerusalen.

39Kuse kju̱ Maria̱ kitsikjitjusún xukúcha tsu kju̱a̱kixiꞌe Namiña Diuu̱ ku kijíni ngandeꞌe xi ꞌmí Nasare, nangi xi chja̱ Ngalilea̱.

40Kjindi xi ꞌmí Jesuu̱ xukúcha kjifaꞌa ni̱tjin tekuácha kjimakꞌa ku kjiꞌbere ngaꞌñu ngayaꞌa̱senꞌen, ku tuxi tsjuátjinre Namiña Diuu̱ ngatꞌaꞌe.

Nga jichú Jesuu̱ ngaya ni̱ngu̱xi̱

41Kuse ku Maria̱ xki̱ nu fué na̱xi̱nanda Jerusalen nga ma sꞌuiꞌe Paskua̱. 42Nga jichú tejó nu Jesuu̱ kju̱ kui kijí Jerusalen.

43Nga je sꞌui, xi na̱ xi namire Jesuu̱ kijíni niꞌyaꞌe̱; ta̱nga kubejí tsanga kisꞌejña Jesuu̱ na̱xi̱nanda Jerusalen. 44Ngu ni̱tjin nduju kisꞌema Kuse ku Maria̱ nga tsangitsjai Jesuu̱ tsatuꞌa nga tsuꞌbajinre xu̱ta̱ xi jña tjima ndiya. Jaskan nga tsangitsjai tseꞌe xu̱ta̱ xi xikjin ma kju̱ tseꞌe xi bejin, 45ta̱nga sakutsjaijíre. Kui nga te̱ kijíni Jerusalen nga kikangitsjai.

46Janda xi ma nganchajún sakutsjáire Jesuu̱ ngaya ni̱ngu̱xi̱ jma tjijín basénre chjine Kju̱a̱kixiꞌe̱ Namiña Diuu̱. Jesuu̱ tuxi ndá tjitꞌe ku kjiminengiya. 47Ngieje xu̱ta̱ nga se̱n inchamáre̱ nga ndá kju̱a̱kitakunꞌe̱n ku nga mare̱ kjengi nga tjin najmi xi chjinengiyáre̱.

48Tukua kumáre̱ naꞌe̱n, namiꞌen nga kube, ku kitsitiju̱ naꞌen:

—¡Kjindiꞌna! Mí xá ku̱i̱cha kiniꞌínji. Namiri ku án tuxi ndá tjiminchitsjáiri. Tuxi ndá kundusínjni nga̱tꞌari.

49Ku ku̱i̱cha kiskengi Jesuu̱:

—Ku mí xá tjiminchitsjáijnu. A yajíjnu nga niꞌyaꞌe̱ Namiꞌna tsubáre nga batejñaꞌan.

50Ku Kuse ku Maria̱ kukjinjínre̱ mí xi mejénre kitsú.

51Kui nga kijúni Jesuu̱ xi na̱ xi nami máre janda Nasare, ku ngieje nga tꞌeꞌénre.

Naꞌen tuxi ndá kitsikjo ngieje najmi xi kuacha kumá.

52Ta̱nga xukúcha jaꞌa ni̱tjin kjimachá Jesuu̱, kjimakꞌa ku tjisakure kju̱a̱kitakún. Tuxi tsjua sindúre ngieje xu̱ta̱ kju̱ Namiña Diuu̱ nga̱tꞌaꞌe, ku ngieje nga mejénre̱.

Currently Selected:

Luka̱ 2: MZI

Highlight

Copy