Luka̱ 18

Chjun kꞌan ku xu̱ta̱ Nai

1Ngu én cha ꞌyénijmire xu̱ta̱ xi kjibakuyare Jesuu̱, nga tsubáre ꞌbetsjua ngieje ni̱tjin ku tuxi tsikjajendaji. 2Ku̱i̱cha kitsúre̱:

«Ngu na̱xi̱nanda kisꞌejña ngu nai xi kitsakjunjínre Namiña Diuu̱ ku kubetkunjín xu̱ta̱. 3Ku ngu chjun kꞌan kitjian kui nga̱nde, xi tutsjai mangitsjai ku ku̱i̱cha tsúre: “ngu kju̱a̱ndá, tiꞌín xi tsubáre niꞌín tseꞌe xi ndá ngasakuna kju̱a̱kixi.” 4-5Nga tsaꞌangire, xta̱ nai mejénre̱ tsiꞌin xki̱ chjun kꞌan xi kꞌien xinꞌe̱n. Ta̱nga jaskan kitsikjao: “Kui chjun kꞌan xi je kꞌien xinꞌe̱n tuxi ndá tsitiña. Ndatsa tsakjunjínna Namiña Diuu̱, ku ndusinjínna xu̱ta̱, tekuixi basenjunꞌan. Tsanga kuajícha tsiꞌinꞌan , najmí ni̱tjin nga tsjuentꞌana nga tsitína.”»

6Ku̱i̱cha kitsú ngisa Jesuu̱:

«Chaséjnu kúcha kitsú kui xu̱ta̱ nai. 7A yajíjnu nga Namiña Diuu̱ ꞌbatsjengi xu̱ta̱ xi kui jajin, xi tꞌajñu ku ngixun minengire kju̱a̱ndá. A matsére nga kjengire a bixujnu jun. 8¡Ta̱nga junjín, tjeꞌñu nga tsiꞌinre xki̱! Ta̱nga nga án, Kjindiꞌe xu̱ta̱ nga̱sunde, kjuaꞌiñaꞌa̱n kꞌui nga̱sunde, a bixujnu jun nga sakúna xu̱ta̱ xi sꞌejínre Namiña Diuu̱.»

Xta̱ xi kꞌakakun ku xta̱ xi ni̱ma̱kju̱a̱

9Ngu ndiya, Jesuu̱ tsichjajo yákaꞌa xu̱ta̱, kui xi tjeꞌñu ndá basére yajo̱ꞌe ku tutsjai tón ꞌbé xu̱ta̱ xi ngisa. Kui xu̱ta̱, Jesuu̱ yeꞌére kui chu̱ba̱:

10«Jó ja kijí ni̱ngu̱xi̱ nga kikinengire̱ kju̱a̱ndá Namiña Diuu̱. Ngu xi fariseo̱ ku ngu xi faꞌachji taon xi machjitjai xá xi ñaꞌan.

11»Xta̱ fariseo̱, kjisian kixi ku ku̱i̱cha kjiminengi kju̱a̱ndá: “Namiña Diuu̱, tsjuára nikꞌuechji nga̱tꞌa kuajícha kunꞌan xuku xu̱ta̱ xi ngisa. Xaba ku cheje kui xu̱ta̱, ꞌbanachajo yachjinꞌen ku kjaꞌi yachjín ꞌbemajun. ¡Ku kuajícha kunꞌan xuku kui xta̱ xi faꞌachji taon xi machjitjai xá! 12Jó ndiya tsikjaꞌa kjindia yajoꞌna̱ nga ngu xumana ku tsjuaꞌan te̱ nga uchan ngieje taon xi tsiꞌinꞌan.”

13»Ku xta̱ xi faꞌachji taon xi machjitjai xá xi ñaꞌan, tusa, nga̱tun kisꞌejña. Janda mejínre menkꞌa ngakjáin nga base ndiu̱jmí, ku tjiungu kjibeꞌere nginisinꞌen ku ku̱i̱cha kitsú: “¡Namiña Diuu̱, ngatuni̱ma̱riꞌan, ku tichatꞌaina ngieje najmi xi ndáji tjin xi je kitsiꞌinꞌan!”»

14Nga je kitsuya ngieje kui najmi, Jesuu̱ ku̱i̱cha kitsúre̱ ngieje kui ja: «Kju̱a̱xikjáin én xi xínjnu, nga jichúni niꞌyaꞌe xta̱ xi faꞌachji taon xi machjitjai xá, Namiña Diuu̱ je kitsichatꞌánire̱; ta̱nga xta̱ fariseo̱ kje tsichatꞌajíre̱. Nga̱tꞌa xi inchatsú nga kui xi ꞌñu chjiꞌe nga xu̱ta̱ xi ngisa, kui xi ngisa chjiꞌeji ngakjáin Namiña Diuu̱. Ta̱nga xu̱ta̱ xi ꞌñu chjiꞌére Namiña Diuu̱ kui xi ni̱ma̱kju̱a̱.»

Jesuu̱ kitsichakunne niskindi

(Mt 19.13-15; Mr 10.13-16)

15Yakaꞌa naꞌen niskindi kijure Jesuu̱ tseꞌe xi batjaire tsja ngasun tku̱ ku chichakunne. Nga kube ja xi kjibakuyare Jesuu̱ kitsitiju yachjín xi jichuju kjindiꞌe. 16Jaskan Jesuu̱ tsichjare niskindi, ku ku̱i̱cha kitsúre̱ ja xi kjibakuyare: «Titjuájnu ngande niskindi nga ndibakúnna. Nga tu̱ nitijujíjnu, nga̱tꞌa jmá kjibatexuma Namiña Diuu̱ xukútse kui niskindi kun. 17Kju̱a̱xikjáin, nga xu̱ta̱ xi sꞌejinjínre Namiña Diuu̱ xukúcha tsiꞌin xi niskindi, kumajín basꞌen jma kjibatexuma Namiña Diuu̱.»

Xta̱ xi tjínre taon

(Mt 19.16-30; Mr 10.17-31)

18Ngu xta̱ xi sian tetjunre xu̱ta̱ judio̱ jichutꞌare Jesuu̱ ku tsinengiyare:

—Jí, nga ngu xu̱ta̱ chjine ndaji, tixuyéina, mí xi ma tsiꞌinꞌan tseꞌe xi sakuna kju̱a̱mijñachun nguxikaꞌa.

19Jesuu̱ ku̱i̱cha kitsúre̱:

—Míxa ku̱a̱cha bixi nga án xi ndáꞌan xu̱ta̱. Tusáni Namiña Diuu̱ xi ndá. 20Jí, ndá yiji̱ manda xi yeꞌe Namiña Diuu̱: Ngatu chꞌanacheji ngaya kju̱a̱bixantsja, ngatu̱ xu̱ta̱jí nikꞌein, ngatu chejeji niꞌin, ngatu kju̱a̱ndesují nukju̱a̱i nga mejénri nga xu̱ta̱ niꞌoinri, Nuꞌye̱i̱ én ku chaseiri xi na xi nami mári.

21Ku ku̱i̱cha kitsú xta̱ xi sian tetjúnre̱ ja judio̱:

—¡Je kitsikitjusunꞌa̱n ngieje kui kju̱a̱kixi janda nga niskindi kumaꞌán kumaꞌa̱n!

22Kiskengi Jesuu̱:

—Ngi ngútse najmi chajári: Tateñéi ngieje najmi xi tjínri, ku xu̱ta̱ xi ni̱ma̱ titjuéri kui taon. Ku ku̱a̱cha kuma nga tsjuári kju̱a̱ndá Namiña Diuu̱ jan ndiu̱jmí. Ku nga je kumá kjia ndibitjengina.

23Kui nga tsitꞌe xi sián tetjúnre̱ na̱xi̱nanda, tuxi ngí kumáre̱, nga̱tꞌa ꞌñu tse taon tjínre. 24Tsasére̱ Jesuu̱ ku ku̱i̱cha kitsúre̱:

—¡Tuxi niꞌin nga ngu xu̱ta̱ xi tjínre tao̱n basꞌen jma kjibatexuma Namiña Diuu̱! 25Nga kju̱a̱xikjáin, ngisa niꞌinjín nga ngu kameyo basen ti̱xa̱ꞌe̱ nindu, tu̱kꞌu̱a̱jíre̱ tsa xi tjínre taon basen jma batexuma Namiña Diuu̱. 26Xu̱ta̱ xi kꞌi̱a̱ sindu ku tsitꞌére Jesuu̱, tsinengiya:

—Ku ꞌyá xi bitjungi tsani.

27Ku̱i̱cha skengire Jesuu̱:

—Xu̱ta̱ nga̱sunde majínre̱ kui najmi, ta̱nga ngieje nga mare̱ tsiꞌin Namiña Diuu̱.

28Ku tsichja Pe:

—Tikjaitsjéin nga ji̱n kikꞌendújni ngieje najmi xi tjínjni, ku ji tjimatjengíri.

29Ku̱i̱cha skengire Jesuu̱:

—Tsjuájnu énꞌna tsanga tjin xi ꞌyendu niꞌyaꞌe̱, yachjiꞌen, xi tsꞌe̱ xi ndichja, xi namiꞌen xi naꞌe̱n, kútsa kjindiꞌe, nga̱tꞌa inchatꞌeꞌénre jma kjibatexuma Namiña Diuu̱, 30ngují kju̱a̱ndesu tjin nga tse sakúre kꞌui tukꞌuajíre̱ najmi xi yeꞌe. Ku nga ꞌme, tutsjai nga Namiña Diuu̱ jña ꞌbendu.

Te tsichjani Jesuu̱ nga nikꞌién

(Mt 20.17-19; Mr 10.32-34)

31ꞌYetku suba Jesuu̱ ja xi tejóma xi kjibakuyáre̱ ku ku̱i̱cha kitsúre̱: «Kjatꞌei kjuachꞌangíña ndiyaña nga kuangíña Jerusalen. Kꞌi̱a̱ jma kuitjusún én xi kitsuya xi tsuya enꞌen Namiña Diuu̱, najmi xi kumataꞌínꞌa̱n, nga Kjindiꞌe xu̱ta̱ nga̱sundeꞌa̱n. 32Nga̱tꞌa kꞌi̱a̱ Jerusalen tjin xu̱ta̱ xi tsikasꞌénna ngaya tsja xu̱ta̱ xá xi chja̱ Roma̱. Kuijnukéna xu̱ta̱ romano̱, chꞌao ku̱i̱tsúna ku ku̱a̱tetére̱ ngakjáinꞌan. 33Ku kuaꞌónna ku tsi̱kꞌénna, ta̱nga nga faꞌa xi ján ni̱tjin kju̱i̱xꞌajín ngajónina.»

34Ja xi kjibakuyáre̱ kukjínjínre̱ én xi kitsú Jesuu̱. Makjinjínre̱ kui najmi ndatsa ndá inchatsikjao.

Jesuu̱ kitsindaya ngu xta̱ xi tki̱a̱

(Mt 20.29-34; Mr 10.46-52)

35Jesuu̱ je tiñare na̱xi̱nanda Jeriko kjifichu. Kꞌi̱a̱ tsꞌua ndiya kjitjián ngu xta̱ xi tki̱a̱ xi kjiminengi chje̱. 36Nga tsitꞌe xta̱ tki̱a̱ nga sii kjima nga inchafaꞌa xu̱ta̱, ku tsinengiya:

—Mí xi kjima.

37Kitsuyáre̱ xu̱ta̱:

—Kꞌi̱a̱ ndiba Jesuu̱, xi chja̱ nga̱nde Nasare.

38Kui nga kiskindia xta̱ tki̱a̱: «¡Jesuu̱, jí xi jajinri Namiña Diuu̱ nga Kjuaꞌiꞌnatsjengi xu̱ta̱, on chutꞌaini ku tisinjínni!»

39Xi yajatetjún inchatsitiju̱ xta̱ tki̱a̱ tuxi ngite kjindiaji, ta̱nga tusátse ꞌñu skindia: «¡Xi jajinri Namiña Diuu̱ nga ꞌNatsjengi xu̱ta̱, on chutꞌaini ku tisinjínni!»

40Kisasen Jesuu̱ ku kitsiꞌin manda nga mangijúre̱ xta̱ tki̱a̱, ku tsinengiyáre̱:

41—Mí xi mejénri nga tsꞌijúnra.

Ku̱i̱cha kitsú xta̱ tki̱a̱:

—Ndi̱a̱ꞌna̱, ¡mejénna nga te̱ matsejénnina!

42Ku̱i̱cha kitsúre̱ Jesuu̱:

—¡Ndátjin, je ma Chaséi! Kundayei nga̱tꞌa kisꞌejínri nga̱tꞌaꞌna.

43Tekuíni chu̱ba̱ kutsejénre̱, xta̱ xi tki̱a̱ ku kitjengire Jesuu̱, ku kiskindia kjua tsjua nga ndá Namiña Diuu̱. Ngieje xu̱ta̱ xi kube najmi xi kuma, tekuácha kiskindia tsjua nga ndá xu̱ta̱ Namiña Diuu̱.

Currently Selected:

Luka̱ 18: MZI

Highlight

Copy