Jua 16

1»Je kixiyájnu kui én tuxi tutsjai nga nisꞌejínjnu nga̱tꞌaꞌna. 2Nga̱tꞌa jún kuangatjengíjnu ni̱ngu̱xi̱ꞌe xu̱ta̱ judio̱; ku fichu ni̱tjin nga xi tsikjesúnjnu sꞌejínre nga kju̱a̱ndá tjitsiꞌínre Namiña Diuu̱. 3Ku̱a̱cha tsiꞌín kui xu̱ta̱ nga̱tꞌa kje bejí ꞌyániꞌan, ku te̱ kje bejí ꞌyá xi Namiña Diuu̱. 4Ta̱nga xiyájnu kui én, tuxi nga ku̱a̱cha kuma, tikjaitsjénjnu nga je kixiyájnu.

Xá xi tsiꞌin Ngaya Asen Tsjeꞌe Namiña Diuu̱

»Kixiyajíjnu kui én janda nga tjutsꞌin nga̱tꞌa tuku jña tjimaña kjiaku̱a̱, 5ta̱nga kjatꞌe nga ꞌbutjiñaꞌan ku jña batejñajunñaꞌa̱n Namiña Diuu̱ xi Namiꞌna, ngují xi minengiyána jmá kju̱a̱iꞌa̱n. 6Ta̱nga je kube nga ngí kumájnu nga kui én texiyájnu. 7Nga̱tꞌa jún, nga xi kju̱a̱xikjain, tse kju̱a̱ndá xi sakujnu nga án xi je kjue. Nga̱tꞌa tsa fuejiꞌan, kui Ngaya Asen Tsje xi basenjúnjnu kju̱a̱ꞌijí; ta̱nga tsa fueꞌan, án tsingiyaꞌan. 8-11»Nga kju̱a̱ꞌi Ngaya Asen Tjse, sku̱e̱ xu̱ta̱ nga̱sunde nga jee tsa sꞌejinjínjnu nga̱tꞌaꞌna. Ku tekuácha kuitsuyájnu nga ngují najmi xi ndáji kitsiꞌinꞌan ku tsje anima̱ꞌna. Ku ku̱a̱cha kuma, Ngaya Asen Tsje baku nga Namiña Diuu̱ xi je skusúnre kúcha tjitsixá xi kjibatexuma kui nga̱sunde ku tsijére. Ku ꞌbutjiñaꞌan jma kjitjián Namiꞌna, ku jún je ngite yajíjnuꞌan.

12»Kjín najmi mejénna xiyájnu, ta̱nga kjatꞌe kje kukjinjínjnu. 13Nga kju̱a̱ꞌi Ngaya Asen Tsjeꞌe Namiña Diuu̱, kui xi kuitsuyájnu najmi xi kju̱a̱xikjain ku tsikjíntakúnjnu, tuxi tutsjai nga ndiya xi kju̱a̱xikjain ꞌbemájnu. Én subaꞌejí xi ku̱i̱chja, én xi kuitsuyáre̱ Namiña Diuu̱, ku kui xi kuitsuyájnu najmi xi kuma.

14Tekuácha kuitsuyájnu ngieje najmi xi tjin nga̱tꞌaꞌna, ku ku̱a̱cha tsubáre̱ nga nimejénjnuꞌan. 15Ngieje najmi xi tjínre xi Nami, tekuácha tsaꞌa̱n; kui kju̱a̱ ku̱a̱cha kixínjnu nga Ngaya Asen Tsjeꞌe Namiña Diuu̱ kuitsuyájnu ꞌyániꞌan.

16»Ngi chubatse ni̱tjin chaja ku jún ngite yajíjnuꞌan. Ta̱nga ngi chubatse ni̱tjin faꞌa ku te̱ yánijnuꞌan.»

Tuxi tsjua kuijñajnu

17Ku yakaꞌa ja xi kjibakuyáre̱ Kjesuu tsinengiya:

«Mí xi mejénre tsú kui én. Tsúña nga ngi chubatse ni̱tjin tje̱n nga ngite yajíña, ta̱nga te̱ tsúni nga ngi chubatse ni̱tjin tje̱n nga te̱ yániña. Ku te̱ tsúña nga kjima ngieje kui najmi nga̱tꞌa je kjuéni jma kitjián Namiña Diuu̱ xi Nami. 18Ta̱nga mí xi mejénre tsú “nga ngi chubatse ni̱tjin”. ¡Ngují najmi makjínña xi tjitsú!»

19Kukjínre̱ Kjesuu nga ja xi kjibakuyare mejénre minengiyáre̱ ngisa. Ku ku̱i̱cha kitsúre̱:

—A xingijún tjichjinengiyájnu mí najmi xi kixiꞌan. 20Kju̱a̱xikjáinni nga jún ngi kuijñajnu ku chikjindájnu; ta̱nga ngingu najmi, xu̱ta̱ xi tu̱ najmi nga̱sunde tsikjo tsjua kumáre. Ku ngi kuijñajnu jún, jaskan ꞌñu tsjua kumanijnu.

21»Nga ngu chjun xi yaꞌa kjindi kjibeꞌe kjindiꞌe, tse kju̱a̱nima faꞌa. Ku nga je kitukja kjindi, chaya ngiejere na kju̱a̱nima xi jaꞌa, ku tsjua mare̱ nga̱tꞌa ngu kjindi xiꞌin jiꞌijú nga̱sunde. 22Ku tekuácha jún ngí tjínjnu kjatꞌei, ta̱nga án te bénijnu ku tuxi tsjua kumajnu, najmí xi kjebaꞌájnu kui kjuatsjua.

23»Nga fichu kui ni̱tjin, jún ngují najmi te̱ chjinengiyájnu ngisa. Kju̱a̱xikjáinni, nga̱tꞌa xu̱ta̱ xi an tebakuyájnu, ngieje najmi xi chjinengitꞌájnu Namiꞌna ku tsjuájnu . 24Janda kjatꞌei, ngují najmi chjinenginejnuꞌan. Chjinengíjnu, ku tsjuájnu Namiña Diuu̱ najmi xi chjinengíjnu; ku̱a̱cha nga tsjua kꞌu̱e̱re anima̱jnu.

Kjesuu kumá xi kitsiꞌínre kju̱a̱xaba xi tjin nga̱sunde

25»Ku kjatꞌei̱ kite kju̱a̱kitakun jíntsa minchandsijínjnu ku teminchandsijinꞌan kju̱a̱kitakun nga techjaju̱jnu. Ta̱nga kjimatiña ni̱tjin nga chjajonaxujnu nga̱tꞌaꞌe Namiña Diuu̱ xi Nami, ku ngite kju̱a̱kitakun jíntse beꞌechuba̱jnu. 26Je ngite machjenjínjnu nga án minengitꞌana Namiꞌna kju̱a̱ndá xi mejénjnu, je jún suba ma chjinengíjnu kju̱a̱ndá, nga̱tꞌa sꞌejínjnu nga̱tꞌaꞌna. 27Tjóre̱ jún Namiña Diuu̱, nga̱tꞌa tjójnu án, ku nga̱tꞌa kisꞌejínjnu nga Namiña Diuu̱ kitsingiyana. 28Jiꞌiꞌan kui nga̱sunde nga̱tꞌa Namiꞌna kitsingiyana, ku kjatꞌei beꞌeñaꞌan nga̱sunde nga̱tꞌa jma kitjian kꞌi̱a̱ faikatejñatꞌanina.

29Ja xi kjibakuyáre̱ ku̱i̱cha kitsúre̱:

—¡Kjatꞌeini nga chan tinukju̱a̱ji, ku ngite tu̱ énjíntse tjiꞌbejnichubaji! 30Janda chjenjínre̱ tsa chuye kútsa tjin xi kuinengiyári, nga̱tꞌa jí xi yi ngieje kju̱a̱kitakun. Ki kju̱a̱ sꞌejínjni nga Namiña Diuu̱ kitsingiyári.

31Ku ku̱i̱cha kitsú Kjesuu:

—A je sꞌejínjnu kjatꞌei. 32Chubatse chaja nga biyujnu ngiejejnu, nga ngu ngujnu, chjabejnu ndiyajnu, ku nikeꞌe subajnuꞌa̱n. Ta̱nga batejña subajiꞌan, nga̱tꞌa kjitjejúnna Namiña Diuu̱, xi Namiꞌna. 33Xiyájnu kui én tuxi ngu ngatumaña ku kju̱a̱xikjain nga tsjua kuijñajnu. Ta̱nga taꞌíjnu ngaꞌñu anima̱jnu: án, je kuma xi kitsiꞌínna ngaꞌñu xi inchabatexuma kui nga̱sunde.

Currently Selected:

Jua 16: MZI

Highlight

Copy