Jua 15

Kjesuu, Namiña Diuu̱ ku tjiujunña

1Kjesuu tuku tsichja ku ku̱i̱cha kitsúre̱ ja xi kjibakuyáre̱:

«Án xi yaꞌe tutseje xi kju̱a̱xikjain, ku Namiña Diuu̱ kui xi tjitsiꞌin xki̱. 2Tsa ngu tjiaꞌna xi bajajíre̱ tutseje, bate Namiꞌna; ta̱nga tsitsje tjiaꞌe ya tuxi ndá bajare̱ tú. 3Ta̱nga jún je kutsjejnu, kꞌuechjire én xi je kixiyájnu.

4»Tsa an mijñatkujújnu, ku tekuácha án batejñajínjnu. Je yájnu nga bajajíre̱ tú tjiaꞌe ya tsa titjaꞌñujinre ya xi je. Tukú ku̱a̱cha ma, jún ngují najmi ma ñaꞌánjnu tsa anjín mijñatkujújnu.

5» Xi tebakuyána ku án tsuꞌbatjengina, ku tekuácha án kjitsuꞌbajunꞌan, xuku ngu tjiaꞌe ya xi ꞌñu bajare̱ tú; ta̱nga tsa tjin xi kjiebaꞌaxín yajo̱ꞌe, ngují najmi kuma xi tsiꞌin. 6Ku xi tiñají tsubatꞌana, ku̱a̱cha kumáre xuku tjiaꞌe ya xi bajajíre̱ tú: bichá, nikjaꞌa ku nga je kixí, ngajin ndiꞌi ꞌbetí.

7»Tsa jún ngutsa kichꞌáña xingiña ku nikitjusúnjnu ngieje én xi ikuyájnu, sakujnu ngieje najmi xi chjinengíjnu Namiꞌna. 8Tsa jún ꞌñu ndá bajájnu tú ku tjimajnu xuku ja xi ikuyána, ku Namiꞌna tsjua kumáre ngatꞌajnu. 9Xukúcha mejénre án Nami, tekuácha mejénna jún. Tutsjai ni̱tjin timejénjnu xingíjnu. 10Tsa ñaꞌánjnu xki̱ ngieje najmi xi kitsingiyájnu, tutsjai nga kumejenna jún, xukúcha nga mejénre án Namiꞌna, nga̱tꞌa tsiꞌinꞌan xki̱ ngieje najmi xi tsú.

11»Xiyájnu ngieje kui najmi tuxi tsjua kuijñajnu xukúcha tsjuatjinna án. 12Ku kui én xi tsingiyájnu: ndsijin timejénjnu xingíjnu, xukúcha nga mejénna jún. 13Najmí xi ku̱a̱cha tsjuá kju̱a̱nitjoꞌe̱ nga̱tꞌaꞌe xu̱ta̱ xi ndá yaꞌa. 14Tuxi ndá yaꞌajnuꞌan, tsa ñaꞌánjnu najmi xi xinꞌan. 15Je ngite musuꞌnajin xinjnu, nga̱tꞌa ngu musu bejí najmi xi tsiꞌin ndia̱ꞌe. Xu̱ta̱ xi ndá yaꞌájnu xinjnu, nga̱tꞌa kixiyájnu ngieje najmi xi ikuyana Namiꞌna.

16»Jun jin xi kichjajínjnuꞌan, án xi jajínjnu. Je kitsjuájnu kju̱a̱ nga mangijnu ku xuku tjiaꞌe̱ ya xi tutsjai nga bajare̱ tú tiaꞌánjnu. Ku ku̱a̱cha, tsjuájnu Namiꞌna ngieje najmi xi chjinengíjnu nga̱tꞌaꞌna. 17Ku kui manda tsjuájnu: Timejénjnu xingíjnu nga ngu ngu jnu.

Ngaskie̱ tjínre xu̱ta̱

18»Xu̱ta̱ xi kuitsa najmi nga̱sunde mandusinre kuí xi chꞌore jún, ta̱nga tikjaitsjénjnu nga án tjún kitsichꞌona. 19Kuí tsitjójnu jún, tsa tekuácha kúnjnu xuku kuí. Ta̱nga jún je ngite kuajícha kúnjnu, nga̱tꞌa án jajínjnu tuxi kuajícha ñaꞌánjnu. Kuí kju̱a̱ nga kuí ja chꞌore jún.

20»A fuetsjénjnu nga kua kixínjnu, ngují musu xi ꞌñu chjeꞌe nga ndia̱ꞌe. Kui kju̱a̱, xu̱ta̱ xi kuí nga̱sunde tsjuáre on kitsikjeyána, tekuácha on tsikjeyájnu jún. Ta̱nga tsa tsiꞌin xki̱ kui xu̱ta̱ én xi xiꞌan, tekuácha tsiꞌin xki̱ najmi xi bixujnu jún. 21Ngieje kui najmi kumataꞌínjnu nga̱tꞌa xu̱ta̱ꞌna jún, nga̱tꞌa xu̱ta̱ xi kꞌui nga̱sunde bejí Namiña Diuu̱, xi kitsingiyana.

22-24»Najmíre̱ jee kui xu̱ta̱ tsakain tsa jiꞌijíꞌan nga tsichjajo̱, kútsa kitsiꞌinjínꞌan ngixku̱n najmi xi kjie ngují xu̱ta̱ mare̱ tsiꞌin. Ta̱nga te̱ kuí xi tukú ku̱a̱cha chꞌore an, ku chꞌore tjiujun Namiꞌna. Nga̱tꞌa xi tíre̱ nga̱tꞌaꞌna, tekuácha chꞌore Namiꞌna. 25Tanga tuxá kuácha kuma tuxi bitjusún kju̱a̱kitakun xi kjitꞌa xu̱ju̱n Enꞌen Namiña Diuu̱: “Yajíre mí kju̱a̱ nga chꞌoreꞌan.”

26»Án tsingiyájnu Asen Tjse xi tsingiya Nami, xi bakuyajnu najmi xi kju̱a̱xikjain. Basenju̱njnu Asen Tsje ku ndá ku̱i̱chja nga̱tꞌaꞌna. 27Ku jún tekuácha ndá sinukju̱a̱jnu nga̱tꞌaꞌna, nga̱tꞌa ngu tjimaña janda nga tjutsꞌin nga̱sunde.

Currently Selected:

Jua 15: MZI

Highlight

Copy