Genesis 29

Ja Jacobi, k'ot b'a Padan-aram

1Ja Jacobi, mini jijli'a man k'ot b'a stojol wax ja k'ak'u yuj ja Canaani. 2B'a witsi, ti yila jun poso b'a wax yu'aj ja' ja wakax jumasa. Ja b'a poso jawi, ti wa'n jijlel ox nole chej jumasa. Ja sti' ja poso makan sok jun niwan ton, 3Kechan ja wax b'ob' yu' ja' ja chej jumasa ja yajni nakaxa ti tsoman yujile ja talna chej jumasa. Tsa'an yajni wax ch'ak yu'e ja'i, wax cho smakawe kan ja sti' ja poso. 4Jaxa Jacobi, ti och mojan sok ja talna chej jumasa tey tiwi. Ti sjob'o b'a' sb'aje'a. Yajni yalwe yab' ti sb'aje b'a Harani, 5ti cho sjob'o jun majke smoj ja:

—¿Wan maxa na'awex sb'a ja we'nlex ja Laban yij ja Nahori?

—Wa'n wax na'a'tikon sb'aj, xchiye.

6—¿Lek ma wa'n ek'el yuj? —xchi ja Jacobi.

—Jaxa ye'nle'i, ti sjak'awe'a:

—Lek ay lek, —xchiye, ja smeranili, ti wax jak ja yak'ix Raquel sok ja schej jumasa.

7Ja'yuj ja Jacobi, ti cho yal yabye'a:

—Ayto lek sk'ana oj ochuk ja k'ak'u— A'wik yu' ja' ja chej jumasa, sok kax a'wik wa'uk b'a job', mokto a lut ex t'ani.

8Jaxa talna chej jumasa, ti yalawe'a:

—Mito oj b'ob' ka'tikon yu' ja'. K'ajyel spetsanil k'ak'u wax ch'ak jmajlatikon wa stsomo sb'aj ja chej jumasa, b'a ti oj jamtikon ja sti' ja poso b'a oj b'ob' yu'e ja'i.

9Ti'to wa'ne lo'il ja yajni k'ot ja Raquel sok ja schej ja stati, yuj ja ye'n ja stalna cheji. 10-12Ja'yuj ja Jacobi, ti waj ya eluk ja ton makan sok ja ti' poso ya yu' ja' ja chej jumasa; ti' yujts'an ja Raqueli, ti och ok'uka. Tsa'an ti yala yab' yuj ja smoj alijel sb'aje'i, ja Laban sok ja Rebeca smoj alijelni sb'aje'a. Yajni yab' ja jastal it ja Raqueli, ti waj ajnel waj yal yab' ja stati.

13Yajni yab' ja Laban b'a'y ja Jacob yal ja yijts'in Rebeca, ajnel waj yile, yajni ch'ak stel sb'aje sok ch'ak yujts'uki, ti'xa yi'aj och b'a snaja. Ti'xa ay tiw ja Jacobi, ti och yal spetsanil ja jas ekta yuji. 14Ja'yuj ti yala ja Labani: —Ja we'n lajan sok jastal kuntikila, xchi ja Labani—

Nupani ja Jacob sok ja Lea cho jach'ni sok ja Raqueli

Yajni tejk'ajita jun ixaw ja Jacobi, 15ti alji yab' yuj ja Labani: —Ja we'n mi oj a'tijanan jmok lom, a'nima kijts'inuka. Ala kab' janek' waxa k'ana oj tup'a, xchi ja Labani.

16Ja Labani, ajyi chab' yak'ix. Ja watsali sb'i'il Lea, jaxa ijts'inali sb'i'il Raquel. 17Ja Lea jel tsamal ja sati, jaxa Raqueli spetsanil ja sb'ak'tel jel tsamal. 18Jaxa Jacobi jel tsamal yilta ja Raqueli, ja'yuj ti yal yab' ja Labani:

—Wax k'ana oj nupanukon sok wa wunin ijts'inali. Ta lek k'a waxa wab'i, oj a'tijukon amok juke jab'il, —xchi ja Jacobi—.

19Ti yala ja Labani:

—Lek ay, a nupanuk a mok we'na, mi lek ja lom tuk ma oj yi'i.

20Jachuk a'tiji juke jab'il ja Jacob yuj ja Raqueli, ja Jacobi, je sk'ana ja Raqueli, ja'yuj jel mojan yab' ja k'ak'u, mi yab' jastal juts'in ek'i. 21Yajni ts'ikwi ja juke jab'ili, ja Jacobi, ti yal yab' ja Labani: —A'xa ki ja Raquel b'a oj nupanukon sok—.

22Jaxa Labani, sk'u'lan jun niwan k'in, sloko spetsanil ja swinkil ja slugari. 23Yajni och ja a'kwali, jaxa Labani, ja yi'aj och ja Lea ya'yi ja Jacobi, jaxa Jacobi sta'ani sb'aj soka. 24Mi kechanuka, ja Labani sk'eb'ayi ja yunin Lea, jun ya'tjum ixuk sb'i'il Zilpa. 25Yajni el ja k'ak'u, ti yila ja Jacobi ja way sok ja Lea, ti waj stajb'a ja Labani:

—¿Jas lom a lo'layon b'a? —Ja ke'n kala wab' oj a'tijukon amok yuj ja oj nupanukon sok ja Raqueli—

26Ti yala ja Labani:

—Mi k'ajyeluk ja oj nupanuk b'ajtan ja ijts'inal yuj ja watsali. 27Ts'iktes jun semana oj ajyan sok ja Lea, yuj k'a waxa k'ana oj nupana sok ja Raqueli, cho a'tijanan jmok juke jab'il smoj.

28Jaxa Jacobi, lekni yab' ja jas alji yab'a, yajni el ja semana ti'xa nupani sok ja Raqueli. 29Ja Labani sk'eb'a yi jun ya'tijum ixuk ja Raqueli, sb'i'il Bilha. 30Jaxa Jacobi, jel wa sk'ana ja Raquel yuj ja Lea, a'nima a'tiji juke jab'il smoj sok ja Labani.

Ja yuntikil jumasa ja Jacob sok ja Lea

31Yuj ja yila ja Dyos mi wa skisa lek ja Lea ja Jacobi, ja'yuj ya yil sat yuntikil ja ye'n, jaxa Raqueli, mi ya yil sat yuntikil. 32Ja Lea, tukb'i satk'inal yila sat jun yal skerem ya sb'i'iluk Ruben, ti yala'a: —Ja Dyosi, yila ja jcham k'ujoli. Ja ya'n wax k'u'an, ojni sk'an'on lek ja jtatama.

33Tsa'an ja Lea, cho tukb'i satk'inal yajni yila sat ja schab'il yal skeremi, ti yala'a: —Ja Dyosi, cho ya'ki ja pilan yal jkerem iti, ja'yuj ja yab' mi sk'anawon ja jtatami—. Ja'yuj ya sb'i'iluk Simeon, wa sk'ana yale —Ja Dyosi, wax yab'i—.

34B'a yox majkil tukb'i satk'inal ja Lea, yajni yila sat ja yal skeremi, ti yala'a: —Ja ya'n mas oj sk'an'on ja jtatam yuj ja oxe xa ja yal jkeremtik soki—. Ja'yuj ya sb'i'iluk Levi, wa sk'ana yale —Sta'oj sb'aj—.

35Ja Lea, cho tukb'i satk'inal pilan majke, yajni manxi ja yal keremi, ti yala'a: —Ja majke iti, oj jtoy lek ja Dyosi—. Jachuk ya sb'i'iluk Juda, wa sk'ana yale —Ts'eb'oj—. Man tiwi, mixa yila sat untikanel.

Currently Selected:

Genesis 29: YABD

Highlight

Copy