Genesis 30

Ja yuntikil ja Jacob sok ja Bilha

1Yajni sna'a k'inal ja Raquel yuj ja mi oj b'ob' yil sat untikaneli, ti och tajkuk sok ja swatsi. Ja'yuj ti yal yab' ja Jacobi:

—Ta yuj k'a mix wa' ajyuk kal ja ke'n. —Oj chamkon, xchi ja Raqueli.

2Jaxa Jacobi, tajki sok ja Raqueli, ti yal yab'a:

—¿Yuj waxa wala Dyosukon ja ke'n? —Ja ma' mi sk'ana oj ja wil sat untikaneli, ye'n ja Dyosi—

3Ja'yuj ti alji yab' yuj ja Raqueli:

—Oj ka'wi ja ka'tijum ixuk Bilha b'a oj ajyuk a wuntikil sok. B'a jach' ke'n oj b'ajuk ja yuntikil oj ajyuki, —xchi ja Raqueli.

4Ja Raqueli, ya'yi ja Jacob ja ya'tijum ixuk b'a oj sche'umuk. Jaxa Jacobi sta'a sb'aj sok ja Bilha, 5Och tukb'uk satk'inal ajyi jun yal skerem. 6Ja Raqueli, ya sb'i'iluk Dan, wa sk'ana yale —Toj lek—, ti yala'a: —Ja Dyosi, jel toj, yila mi jas mi sb'ejuk jk'u'lunej, cho ya'ki jun yal jkerem—.

7Tsa'an ja Bilha, cho tukb'i satk'inal, ajyi pilan yal skerem sok ja Jacobi. 8Ja Raqueli ya sb'i'iluk Neftali ja yal kerem iti, wa sk'ana yale —Wokol—, ti yala'a: —Ja wokol ajyi sok ja jwatsi jel tsats waji, ja stsamalili, ke'n lek elyon, xchi ja Raqueli.

Ja yuntikil ja Jacob sok ja Zilpa

9Yajni sna'a k'inal ja Lea mixa ojto untikanuki, ti yi'aj ja ya'tijum ixuk Zilpa ya'yi ja Jacob b'a oj sche'umuk. 10Ja Zilpa, ajyi jun yal skerem sok ja Jacobi, 11jaxa Lea ya sb'i'iluk Gad, wa sk'ana yale —Lekil swerte—, ti yala'a: —Jel lek ja swerte ki'oji—.

12B'a schab'il majke ajyi pilan yal skerem ja Zilpa sok ja Jacobi, 13jaxa Lea ya sb'i'iluk Aser, wa sk'ana yale —Slekilal— Ti yala'a: —Jel lek wax kila ja ke'n—. —Jach' lek oj cho yil'one ja ma'tik lek wax kila jb'aj soki.

Ja tuk yuntikil ja Jacob sok ja Lea

14Jun k'ak'u ja Rubeni, waj b'a wits, ja k'ak'u jumasa wa stuljel ja sat trigo, b'a witsi, sta'a tuk tek'ul jumasa sb'i'il Mandragora.#30:14 Mandragora: Ja ma mix yila sat untikanel ja najate, sok ja sat ja te' iti, wax koltajiye b'a oj yil'e sat untikanel. Ja'yuj ti yi'aj ochyi ja snani. Yajni yila ja tek'ul jumasa jaw ja Raqueli, ti sk'anayi pabor ja Lea a a'jukyi chab' oxuk, 15jaxa Lea, ti yala'a:

—A japa ki ja jtatami, ¿Jaxa ya'n waxa k'ana oj ja jap ki ja tek'ul yi'a jan ki ja kali?

Jaxa Raqueli, ti sk'apa yi'a:

—Yuj k'a oj ja wa'ki ja tek'ul wax k'ana wi'i, ja ya'n a'kwali, ti oj kan wayuk a mok ja Jacobi.

16Ja a'kwal jawi, yajni kumxi jan b'a ya'tel ja Jacobi, ti waj ja Lea, waj sta' jani, ti yal yab'a: —Ja ya'n a'kwali, ti oj kan wayan jmoka, jlok'owata, ja ka slok'oluk ja tek'ul yi'a jan ki ja kali.

Ja'yuj ja Jacob ja a'kwal jawi, ti'ni kan way soka.

17Ja Dyosi, smakla ja jastal sk'ana ja Lea, jaxa ye'n tukb'i satk'inal ajyi ja sjo'il yal skerem sok ja Jacobi. 18Jaxa ye'n ya sb'i'iluk Isacar wa sk'ana yale —stupulab'il. Ti yala'a: —Ja stupulab'il ya'ki ja Dyos yuj ja ka'yi ja ka'tijum ixuk ja jtatami—.

19Pilan majke cho tukb'i satk'inal ja Lea, ja'xa swakil yal skerem sok ja Jacobi. 20Ya sb'i'iluk Zabulon, wa sk'ana yale —Majtanal. Ti yala'a: —Jel tsamal ja jmajtan ya'ki ja Dyosi—. Ja ya'n jel lek oj yil'on ja jtatam yuj ja wake ja kuntikil soki.

21Tsa'an ja Lea, yila sat jun yak'ix, ya sb'i'iluk Dina.

Manxi ja Jose

22Ja Dyosi, stalna sya'ujlal ja Raqueli, cho smakla yi ja jas sk'ana'i. Ja'yuj ya tukb'uk satk'inal 23-24sok ajyi jun yal skerem. Yajni ajyi ja yal skerem ja Raqueli, ti yala'a: —Ja Dyosi, mi ya jta' jk'ixwel b'a mi oj kil sat untikanel—. Jachuk ya sb'i'iluk Jose, wa sk'ana yale —Ye'n ja Dyos oj ya'ki pilan—, ti cho yala'a: —B'ob'ta ja Dyos oj cho ya'ki pilan yal kal—.

Ja lo'lanel jumasa sk'u'lane ja Jacob sok ja Labani

25-26Tsa'an yajni manxita ja Jose, jaxa Jacobi ti yal yab' ja Labani:

—A'ki ja che'um jumasa sok spetsanil ja kuntikili, yuj ye'nle ja ti a'tijiyon amoki. Ja ya'n jekawonxa b'a jchonab'ili.

27Ti alji yab' yuj ja Labani:

—A' wa pabori mok wajan, wax k'ana oj kanan jmok. Ja Dyosi, sje'a ki yuj ja we'n, ja'yuj jel ja jastik jb'aji. 28Ja'yuj, ala kab' janek' waxa k'ana oj tup'a. Ja ke'n ojni ka'wi ja janek' oj ja k'anki'a, —xchi ja Labani.

29Ti alji yab' yuj ja Jacobi:

—Ja we'n waxa na'a lek jastal jel tsats a'tijiyon amok, sok jel tsamal jtalna wa wakax jumasa. 30Ja mito teyukon a moki, jel ko'el wa jastik b'aji; jaxa ya'n jel wa jastik a b'aji, man julyon ch'ak ya'wi spetsanil ja Dyosi. Jachuk ja ke'n, jel t'ilan wax kab' oj a'tijukon yuj ja kuntikil jumasa, —xchi ja Jacobi.

31Jaxa Labani, cho sjob'oyi pilan majke:

—¿Jasunk'a waxa k'ana oj ka'wi' b'a?

Ti yala stojol ja Jacobi:

—Mok jas a wa'ki. Ja ke'n ojtoni jtalna wa chej jumasa'a, kechan wax k'ana oj ja wi' lek ja jas oj kal a wab'i. 32Ta wan k'axa wala oj ochkon b'a yoj snalan wa chante jumasa, oj ch'ak jpil spetsanil ja chej sok ja chivo b'a tuktukil yelaw ja sts'ujmili, sok ja waw chej jumasa b'a k'ik' muk muk ja stso'otsili. Sok ja jawi, ti wala tupyon lek ja ke'na. 33Yajnix ek' ja k'ak'u, ojni a wile lekni ja jas jk'u'lan a wi'a. Yajni waxa k'ana oj ja k'el b'a'ya jchante jumasa ke'n, oj b'ob' a k'ele. Yuj k'a waxa ta'a jun chej ma jun chivo b'a mey spinto'il ma jun waw chej b'a mi k'ik' muk muk, oj b'ob' a wal yuj kelk'unej a wi'.

34Ja Labani, jel lek yab'i, 35Ja k'ak'u jawi, ch'ak spila spetsanil ja chej jumasa b'a k'ik' muk muki, ja chivo jumasa b'a pinto, b'a ay t'ob'an yaman tuk yelawi, sok ja k'ik'il chej jumasa, ja ya stalna ja yuntikil jumasa. 36Tsa'an ja chante jumasa jawi, najat ch'ak ya wajuk yuj ja b'a ajyi ja Jacobi, chab' tajb'e sok lajune (50) kilometro yiloj sb'aj sok ja b'a sjeka.

Jaxa Jacobi, cho kantoni stalna ja chab' oxe sb'a Labani. 37Ti sk'utsu jujuntik sk'ab' alamo, sk'ab almendro sok ixki lob'al, spats'a ja spatiki, b'a oj ilxuk jun yal sb'i'anal sak. 38Yajni ch'ak spats' ja k'ab' te' jawi, ti sts'apa b'a wax yu'aj ja' ja chej jumasa, b'a jach' ti oj yil'e ja chej jumasa ja yajnix jak yu'e ja'i, jachuk ja yajni wa'n sle'jel swaw ja chej jumasa wax jak yu'e ja'i, 39Jaxa b'a ts'apan ja k'ab' te' jumasa jawi, ti wa sta'a tiw ja swaw ja nan chej jumasa, ja'yuj ay jun yal sjisanil ja sts'ujmil ja yajni wax manxi ja yuntikile'i. 40Jaxa Jacobi, pilan wax ya'a ja yal chante jumasa b'a tuktukil yelawi, jaxa tuk chej jumasa, ti wax ya'a b'a sti sat ja chab' oxe tuktukil yelaw ya'kan ja Labani, jach' och spile, mixa wantox ya sta' sb'aj sok ja sb'a Labani. 41Yajni wax yila ja Jacob yuj wa'n sle'jel swaw b'a tsatsik leki ti wa sts'apa ja k'ab' te' b'a ti oj sta' sb'aje tiwi, 42yuj k'a wa'n sle'jel swaw ja b'a ko'eli, wax ya eluk ja k'ab' te' jumasa jawi. B'a jach' ja oj yi'kan ja Laban ja jaw jumasa, jaxa b'a tsatsi ja oj yi' ja Jacobi. 43Jach' jel ajyi ja jastik sb'a jastal it ja Jacobi, jel jitsan yi'oj ja chej jumasa, ja ya'tijumi, ja ya'tijum ixuki, ay scameyo sok sburro jumasa.

Currently Selected:

Genesis 30: YABD

Highlight

Copy