Genesis 23
23
Cham ja Sara
1Ja Sara, ajyi sak'anil jun syen jun tajb'e sok juke (127) jab'il, 2ti cham b'a chonab' Hebron it tey b'a slujmal Canaani. Tsa'an yajni ch'ak yok'elta ja Abraham yuj ja cham ja sche'umi, 3ti waj sk'umuk ja hitita jumasa ma' ti' aye tiwi, ti yala yabye'a:
4A'nima tuk chonab' jakelukon a wujilex ja ke'n, chonowik ki xe'n lu'um b'a oj muk ja jche'umi, —xchi ja Abrahami.
5Ti yalawe ja hitita jumasa:
6Niwan ajwalal, ja ke'ntikoni, jpetsaniltikon jel niwan wax kilawa'tikon. Ti'xa muku wa che'um b'a lekil k'e'en jumasa ki'ojtikoni, mi ma' oj yal kujtikon b'a mi oj ja wi'e.
7Ti k'e' tek'an ja Abrahami, jel wax kiswani, 8Ti yal yabye'a:
—Ta yuj k'a meran waxa k'anawex ja ti oj jmuk il ja jche'umi, k'u'lanik jun pabor a'wik yab' sb'ej ja Efron yunin ja Sohari, 9a schonki ja k'e'en b'a Macpela it tey lajan sok ja slu'um ye'n. Alawik yab'i, a schonki chikan janek' ja sts'akoli, b'a jach' oj ajyuk jun k'e'en jb'aj we'n ja b'ayex ja we'nlexi —xchi ja Abrahami.
10Yuj ja ti kulan soke tiw ja Efroni, ti yal yab' tsats ja Abrahami, b'a jach' oj yab' spetsanil ja ma'tik ay ya'tel yuj ja hitita jumasa ti tsomane tiwi:
11—Niwan ajwalal, mi oj chonawi ja k'e'eni, oj k'eb'a wi' sok ja lu'um b'a'yi. Ti wax yabye ja ma ay ya'tel kujtikon yuj wax k'eb'a a wi spetsanili. Muku tiw wa che'umi.
12Jaxa Abrahami, jel wax kiswani, 13b'a sti' sat spetsanile ja ma'tik tey tiwi, ti yala yab' ja Efroni:
—A' wa paborexi, maklayik ja jas oj kal a wabyexi. Ja ke'n oj tup ja janek' ja ts'akol ja lu'um jawi. Wax k'anawi pabor yamaki ja jtak'ini, b'a jach' ti oj b'ob' jmuk tiw ja jche'umi.
14Ti yala ja Efroni:
15—Kajwal, ja lu'umi sts'akol chane syen (400) sakal tak'in. Ja ke'n sok ja we'n mi janek'uk ja tak'in jawi. —I'aj wa che'umi kax muku, —xchi ja Efroni.
16-20Ja janek' ja sts'akol ja lu'umi, jel lek yab' ja Abrahami, jachuk stupu yi ja Efron ja chane syen (400) sakal tak'ini, ja' yi'aje ja jastal wa stupuwe ja ma k'ajyelni wa smanawe lu'umi. Jachuk ja k'e'en sok ja slujmali, sok spetsanil ja jas ayi ye'nxani sb'ajan kan ja Abrahami, ja iti, ch'ak sna'e spetsanil ja ma'tik ay ya'tel yuj ja hitita jumasa.
Yajni b'ob' ja slo'ile'i, ti'xa waj smuk b'a k'e'en jaw ja sche'um ja Abrahami, ja jawi tey b'a Hebron, b'a stojol ja wits Mamre, b'a slujmal Canaan.
Currently Selected:
Genesis 23: YABD
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México 2021
