Genesis 24

Ja Isaac sok ja Rebeca

1Ja Abrahami, ayxa lek sk'ujol, jaxa Dyosi ch'akto ya'yi spetsanil ja jastik jumasa. 2Jun k'ak'u ja Abrahami, yala yab' june ja ya'tijumi:

—A kajan wa k'ab' b'a yib' kechmali, ay jas jel t'ilan oj ja wal kab' oj ja k'u'lki'. 3-4A'nima ti ayukon sok ja cananeo jumasa, oj ja wal kab' b'a sti sat ja Dyos b'a satk'inal sok b'a lu'um b'a mi oj wa nupanuk sok jun ixuk sb'a Canaan ja kunin Isaaki. Tila waj b'a jlumal ke'n sok ja jmoj alijel jumasa tixa le'a yi tiw ja sche'umi.

5Ti yala ja ya'tijum jawi:

—¿Jas oj k'u'luk ta yuj k'a mi sk'ana oj jak jmok ja ak'ix b'a jchonab'iltik b'a? ¿Oj ma ki'och wa wunin b'a ye'n oj sle' b'a? —xchi ja a'tijum jawi.

6Jaxa Abrahami, ti yal yab'a:

—Ja jachuki, mok a k'u'luk— 7Ja k'ak'u yala kab' ja Dyos b'a satk'inal oj ka'kan ja snaj ja tat sok ja niwan chonab' b'a ajyiyoni, toj lek yala kab'i, ja lu'um iti, ja' oj ya'yi ja kintil jumasa. Ja'yuj ye'n oj sjeka wi jun yanjel oj wajuk a mok, b'a oj waj a le' yi ja sche'um ja kunini. 8Kechan ta yuj k'a ye'n mi sk'ana oj jakuk a mok ja ak'ixi, ja we'n ti'xa wax ch'ak tiw ja jas a walunej oj ja k'u'luki. —Kechan ja b'a mi oj ka' wi'i, ja oj ja wi' och ki ja kunini.

9Ja a'tijum jawi, yala yab' ja yajwal Abraham oj sk'u'l spetsanil ja jas yaluneji, 10tsa'an yi'aj lajune cameyo sb'a yajwali, cho yi'aj jitsan jas lek oj sk'eb'e, ti'xa waj ja b'a schonab'il ja Nahor it tey b'a Mesopotamia. 11Yajni och ja k'ak'u, ja winik jawi, ti ya jijluk ja scameyo jumasa b'a mojan sok ja poso it tey b'a ti chonab'i. Ja wax ch'ak k'otuke ja ak'ixuk jumasa wax waj yi' ja ya'ale'i. 12Jaxa winik jawi, jach' sk'uman jastal it ja Dyosi:

—Dyos yuj ja kajwal Abraham, wax k'anawi pabor je'a yi ja slekil wa k'ujol ja kajwali; ja jas oj k'u'luk ja ke'n a el slekil. 13Tixa k'elawon b'a poso iti, ja ya'n oj jak yi'e ja' ja ak'ixuk jumasa, 14A' wa pabori, ja ak'ix ma oj kal yab' oj ya ku' t'usan ja ya'lel ja sch'ub'i, mi kechan ke'n oj ya' ku' cho jach'ni ja cameyo jumasa. B'a jach' oj na' yuj jel leka sok ja kajwali, cho jach'ni ja ixuk jawi yujni ye'n a tsa'a b'a oj yi' ja Isaac ma spetsanil k'ak'u wa sk'u'an ja jas waxa wala.

15Mitox ch'ak sk'umuk ja Dyos ja winik ja k'ot ja Rebeca, k'echan yuj ja sch'ub'i. Ja ye'n ja stat ja Betueli, jaxa Betueli, ja snan stat ja Milca sok ja Nahor smoj alijel ja Abrahami. 16Ja Rebeca jel tsamal, sok mitoni sta'a winika. Ko' ja b'a poso, sb'ut'u ja sch'ub'i, yajni elumxa k'eni, 17ti waj ajnel ja winiki, waj sta'e ti yal yab'a:

—A wa pabori, a'ki t'unuk ja ya'lel wa ch'ub'i.

18Jaxa Rebeca ya ko'uk ja sch'ub'i, ti yala'a:

—Uk'an, —xchi.

Ye'n syama yi ja ya'al yu'aji. 19Yajni ch'ak yu' ja winiki, ye'n cho yala ja ak'ixi:

—Jaxa ya'n ja oj ka el ya'al wa cameyo jumasa, a yu'e ja janek' wa sk'ana oj yue'i.

20Juts'in sjamakan ja sch'ub' b'a wax yu'aj ja' ja chante jumasa, cho waj ya' elk'en tuk b'a oj ya yu' ja' spetsanil ja cameyo jumasa. 21Jaxa winiki, kechan wa'n sk'eljel mi jas wax yala kechan wa sk'ana oj sna' ta yuj ja'xa wa'n koltajel yuj ja Dyos b'a oj sta' jun sche'um ja Isaaki.

22Yajni ch'ak yu' ja' ja cameyo jumasa, ja winiki ya ochyi jun aniyo b'a toj k'anal tak'in b'a sni' ja Rebeca, ja yalal ja aniyo jawi wake gramos. Mi kechanuk ja jawi, cho ya' ochyi chab' smocholab'il b'a chab'il ja snuk' sk'ab' b'a toj k'anal tak'in, ja yalali ek'el yuj ja jo' tajb'e gramosi (100). 23Ti sjob'o yi'a:

—A' wa pabori, ala kab'i, ¿Machunk'a wa tati? ¿Wa'n a maxa na'a ta oj b'ob' kankotikon ja ya'n a'kwal b'a snaji?

24-25Ti yala ja Rebeca:

Ja ke'n ja jtat ja Betueli, jaxa ye'n, ja snan stat ja Milca sok ja Nahori. Ja b'a jnajtikoni ayni b'a oj kananik ja ya'n a'kwala, cho jach'ni, ay ki'ojtikon jitsan swa'el ja cameyo jumasa.

26Ti'xta'a ja winik jawi, ko' nujan ya'yi ts'akatal ja Dyosi. 27Jach' yala jastal iti:

—Dyos yuj ja kajwal Abraham toyob'ala lek. —Yujni jel lek sok jel toj ay sok ja kajwali. —We'n a je'aki jastal k'otyon ja man b'a'ye ja smoj alijel jumasa—

28Yajni yab' ja jastal iti, ja Rebeca ajnel waj b'a snaj waj yal yab' ja snan ja jas ch'ak yili. 29-30Yajni yila ja snu' Laban ja yaniyo sok ja smochab'il snuk' sk'ab' ja Rebeca, sok ja jas yala yuj ja winik jawi, ti el ajnel waj sle' ja winik jawi, titoni sta'a mojan b'a poso sok ja scameyo jumasa'a. 31Yajni yila, ti yala ja Labani:

—Jel lek julya—. Ye'n ja Dyos lek yi'aj jan man ili. La' jmok b'a jnaj mok ti' kanan b'a jwera, —chapanxa kuj b'a oj jijlani, cho jach'ni wa cameyo jumasa—.

32Ja winik jawi, waj sok ja Labani, yajni k'otye b'a snaj ja Labani, ya'yi ja' sok ja smoj jumasa b'a oj noxuke. Jaxa cameyo jumasa ya'we ko'yi ja yijkatsi, sok ya'we yi swa'el. 33Yajni ya'we ek' yi ja swa'el ja winik jawi, ti yala'a:

—Mi oj wa'kon t'ani, oj kal b'ajtan jas yuj ja ti' ayon ili.

Jaxa Labani, ya k'umanuk, 34Ja winik jawi, ti yala'a:

—Ja kajwal Abrahami 35jel ja jastik sb'aji, Dyosni jel lek wa'n iljel yuj ja. A'jiyi jitsan schej, swakax, sakal tak'in, k'anal tak'in, ya'tijum winik sok ixuk, scameyo, sburro jumasa. 36Mi kechanuka, ja ye'n sok ja sche'um Sara ajyi jun yal skereme jach' jastal ayxa lek k'ujole, ja yunin jaw ja kajwal Abrahami, ch'ak ya'yi spetsanil ja jastik sb'aji. 37Jaxa ke'n ya kale, b'a mi oj ka nupanuk sok jun ixuk sb'a Canaan ja yunini. 38Yala kab' ti oj jakon ja b'a'y ja smoj alijel jumasa b'a oj jle'yi ja sche'um ja skeremi.

39—Ja ke'n job'oyi: ¿Jas oj k'u'luk ta yuj k'a mi sk'ana oj jak mok ja ak'ix b'a? 40Ja kajwali, ti yala'a: —Ja ke'n spetsanil k'ak'u wax k'u'an ja jas wax yala ja Dyosi, ja'yuj ye'n oj sjek a mok jun yanjel oj smojtaya b'a lek oj ek'uk a wuj ja b'a wajuma. Ja we'n yujni t'ilan ti oj ja le'yi ja sche'um ja kunin b'a yojol ja jmoj alijel jumasa'a. 41Kechan ta yuj k'a ye'n mi sk'ana oj ya'we a wi', ti wax ch'ak tiw ja jas a walunej kab' oj ja k'u'luki —xyutajon.

42—Ja wa'xa yajni julyon b'a poso, jach' jk'uman jastal it ja Dyosi:

—Dyos yuj ja kajwal Abrahami, yuj k'a we'n jach' waxa k'ana jastal iti, a ek' lek ja b'a wajumoni. 43K'elawon ti tek'anon ek' b'a poso iti, yuj k'a wax jak jun ak'ix oj jak yi' ja', jaxa ke'n oj k'anyi t'unuk ja ya'lel ja sch'ub' b'a oj ku'e, 44jaxa ye'n yuj k'a ya'ki, cho ya' k'a elyi ya'al ja cameyo jumasa, ti' oj jak jk'ujol tiw yuj ye'n ja ma a tsa'ata b'a oj sche'umuk ja yunin ja kajwali—.

45—Mitox ch'ak jk'umuk ja Dyos ja k'ot ja Rebeca k'echan yuj ja sch'ub'i. Ko' ya' eluk ja ya'ali, jaxa yajni jk'ana yi t'unuk ja ya'al b'a oj ku'i, 46Ti ya ko'uk ja sch'ub'i, ya' ki', cho jach'ni sk'u'lan yi ja cameyo jumasa'a. Yajni ch'ak k'u' ja ja'i, 47Ti job'oyi machunk'a stati, jaxa ye'n yal kab'i, ja b'i stat ja Betueli, ja Betueli, ja snan stat ja Milca sok ja Nahori.

—Ti'xa ka ochyi jun aniyo b'a sni'i, sok smocholab'il schab'il ja snuk' sk'ab'i; 48ti'xta'a ko'yon nujan och jtoye, och jta' ti' tsamal ja Dyos yuj ja kajwal Abrahami, yuj ja tojxta yi'ajon och ja b'ay ja yij ja smoj alijel ja kajwali, b'a oj ki' och yi b'a oj sche'umuk ja yunini. 49Ja ya'n lek ay, alawik kab' ta wan k'axa k'anawex toj oj ajyanik sok ja kajwali, yuj k'a waxa k'ana oj ja wil'ex leki, ma miyuki, alawik kab'i, b'a jach' oj jna' ja sb'ejil oj ki'a, —xchi ja winik jawi.

50Ja'xa Laban sok ja Betueli, ti yalawe'a:

—Spetsanil ja iti, yujni jach' wa sk'ana ja Dyosi, ja'yuj ja ke'ntikoni, mi jas oj b'ob' kaltikon ta lek ma mi lekuk 51Itul ja Rebeca, oj b'ob' a wi'e, a nupanuk sok ja yunin wa wajwali, yujni jach' wa sk'ana ja Dyosi.

52Yajni yab' ja lo'il jastal it ja ya'tijum ja Abrahami, ti snujts'in ja s'olomi, man sta'a ja lu'um ja spatani, och sk'an yi ts'akatal ja Dyosi. 53Ti'xa ya eluk ja ujal jumasa b'a toj k'an sok ja sakal tak'in b'a yi'oji, ja k'u' juna'al jumasa ya'yi ja Rebeca. Jach'ni, ja smoj alijel sok ja snani ay jas jel niwak sk'eb'ayi. 54Tsa'an yuj ja jawi, ja winik jaw sok ja smoj jmasa, ti'xa och wa'uke'a, cho ti'ni kanye tiw ja a'kwal jawi.

Yajni el ja k'ak'u, ja ya'tijum ja Abrahami, ti sjob'o ta mi ojxa b'ob' kumxuk b'a snaj ja yajwali, 55Jaxa smoj alijel sok ja snan ja Rebeca ti yalawe'a:

—A' kan jmoktikon chab' oxuk k'ak'u ja ak'ixi, tsa'an ti'xa xwaja.

56Jaxa winik jawi, ti sk'ana pabora:

—Mokxa a tim'onex. Ja Dyosi, yalata kab'i lekxa ay ja jas jak jk'u'luki, ja'yuj a'wikxa kumxukon b'a snaj ja kajwali.

57-58Jaxa ye'nle'i, ti spayawe ja Rebeca, ti sjob'owe yi'a:

—¿Wa'n a maxa k'ana oj wajan sok ja winik iti?

Yuj ja yala ja Rebeca oj wajuki, 59sjekawe sok ja ixuk it ma' a'ji k'i' yuji, lajanxa ch'ak wajuke sok ja winik, sok ja smoj jumasa ja winik jawi. 60Jaxa smoj alijel jumasa jak k'umajuk kan yuj, jach' jel tsamal yalawe jastal iti:

—Jmoj alijel jex k'anawatikon,

wax k'anatikon a pojxuk

jitsan lek wa wintil jumasa,

sok ye'n oj yi'e kan

ja schonab'il jumasa ja ma' mi lek a wila a b'ajex soki.

61Ti'xa stulu sb'aj ja Rebeca sok ja ya'tijum ixuk jumasa, k'eye ja cameyo jumasa, snochowe ja ya'tijum ja Abrahami, jach' i'ji och jastal it ja Rebeca.

62Ti kulan ja Isaac b'a takin lu'um k'inal b'a ko'el k'inal, jaxa och k'ak'u jawi, k'ot man b'a sat ja', jach' sb'i'il yujile jastal iti, —Ja poso sb'a Dyos sak'an leki, sok wax ch'ak yil spetsanil. 63Eli, waj paxyalanuk jan b'a wits. Wajto yile ti jakum chab' oxe cameyo. 64Jach'ni ja Rebeca cho yilani och najat ja Isaaki, ti'xa ko' ja scameyo, 65ti sjob'oyi ja ya'tijum ja Abrahami:

—¿Machunk'a winik ti jakum jan b'a yoj job' jakum sta'otik b'a?

Ti yala ja winik jawi:

—Ye'n ja kajwali, xchi.

Ja'yuj ja Rebeca yi'aj jun k'u'uts smaka ja sati. 66Tsa'an ja winik jawi, ti ch'ak och yal yab' spetsanil ja Isaac ja jas ch'a ek' yujili, 67Jaxa Isaaki, yi'aj och ja Rebeca b'a snaj ja Sara snani, ti'xa nupani soka. Jach' nupaniye jastal jaw ja Isaac sok ja Rebeca, ja Isaaki jelni syajta ja sche'uma. Sok ja iti jel koltaji yuj ja Isaac b'a ch'ay sk'ujol ja jastal cham ja snani.

Currently Selected:

Genesis 24: YABD

Highlight

Copy