Genesis 13

Ja Abram sok ja Loti, spila sb'aje

1Yajni el ja Abram b'a Egipto, ti waj b'a takin lu'um k'inal b'a ko'el k'inal. Yi'aj ja sche'um ja yijts'in Lot sok spetsanil ja jas yi'oji. 2Jaxa k'ak'u jaw ja Abrami jelxa ja jastik sb'aji ayxa yi'oj k'anal tak'in sakal tak'in ay yi'oj jitsan wakax.

3Yajni tey b'a takin lu'um k'inal b'a k'o'el k'inali, takal takal waj b'a stojol ja Beteli. B'a skol ja chonab' Betel sok ja Ai, b'ajtanxa ti tojb'el yuj tiw ja yal snaj it tojb'el sok k'u'utsi. 4Ja tiwi, cho stojb'es jun altar b'a oj toyxuk ja sb'i'il ja Dyosi.

5Cho jach'ni ja Loti, ay schej, ay swakax, ay yi'oj jitsan yal na'its tojb'el sok k'u'uts. 6Jelxa jitsan ja chante jumasa yi'oje ja Lot sok ja Abrami, mixax b'ob' ja lajan oj ajyuke'i. 7Mi kechanuka, cho jach'ni ja cananeo sok ja ferezeo jumasa ti' aye tiwi. Jun k'ak'u och k'e'uke ab'al k'umal ja talna chej jumasa sb'a Abram sok sb'a Loti, 8ja'yuj ja Abrami, ti yal yab' ja Loti:

—Ja we'n sok ja ke'n mi sb'ejuk oj k'e'kotik ab'al k'umal, jach'ni ja jtalna chej sok wa b'aj jumasa, jmoj alijel jb'ajtik soke. 9Ay lu'um b'a oj ajyuk ja jas jb'ajtiki, wax k'ana wi jun pabor, tsa'a b'a lu'umil oj wajana, —x'utji ja Loti. Yuj k'a waxa k'ana oj wajan b'a ko'el k'inal ja we'n jaxa ke'n ti oj wajkon b'a k'e'el k'inal, kechan ta yuj k'a waxa k'ana oj wajan b'a k'e'el k'inal ja we'n, jaxa ke'n ti oj wajkon b'a ko'el k'inal. Kechan ojni jpil jb'ajtika.

10Jaxa Loti, ti sk'ela sjoyanal b'a tek'ani, ti yila ja loman yaman jumasa b'a niwan ja' Jordan yuj ja mix tup ja ya'leli. Ja k'ak'u mito sch'aka ja Dyos ja Sodoma sok ja Gomorra, spetsanil ja loman yaman jumasa jawi, man b'a chonab' Soar jel tsamal ja lu'umi, jach' jastal yaljil tek'ul b'a Eden, sok jel lek jach' jastal ja lu'um b'a Egipto. 11Ja'yuj Ja Loti, ja stsa'a spetsanil ja loman yaman b'a stojol wax jak ja k'ak'u, jachuk spila sb'aje ja Abram sok ja Loti. 12Ja Abrami ti kan b'a Canaan, jaxa Loti ti waj kulan b'a loman yaman jumasa b'a Jordan mojan lek sok ja chonab' Sodoma. 13Ja swinkil ja chonab' jawi, jel kistal a, sok jel wa sle'a ja smule' b'a sti' sat ja Dyosi.

14Tsa'an yajni spilata sb'aj ja Abram sok ja Loti, ti alji yab' yuj ja Dyosi:

—Abram, man b'a tek'ana ek'i, lika wa olomi, k'ela b'a k'e'el k'inal sok b'a ko'el k'inali, b'a stojol wax jak ja k'ak'u sok b'a wax mukxi. 15Oj ka'wi spetsanil ja lu'um b'a janek' oj ja laj sk'eljeli. B'a spetsanil k'ak'u a b'aj we'n sok wa wintil jumasa. 16Cho jach'ni jel oj ka pojxuk wa wintil jumasa. Jach' jastal mi ma' oj b'ob' yajtab'en ja sts'ub'il ja lu'umi, jach' mi ma' oj b'ob' yajtab'en wa wintil jumasa. 17Ja ya'n, ka'ax kax b'ejtes ja snajatil sok ja sniwanil ja lu'um yuj ja ke'n wa'non ya'jel b'a wa k'ab'i—.

18Ja'yuj ja Abrami, stulu ja yal snaj sk'u'lunej sok k'u'utsi, ti waj kulan b'a Hebron b'a it tey sok lajan ja Mamre, #13:18 Ja Mamre, sb'i'il jun winik. ja tiwi, stojb'es jun altar b'a oj stoy ja Dyosi.

Currently Selected:

Genesis 13: YABD

Highlight

Copy