Génesis 18
18
Tios tukwinwanë tu'uk yë u'unk maay yë Abraham
1Ënet yë Dios ojts nyänyikëxë'ëkyë ma Abrahamën; jam ma ja xoj kepyjyotmën ma txëëwatyën Mamré. Jam ënety yë Abraham y'u'unyë tyëjkwinm jää jëtää nakujkxyëëwën. 2Ko ojts ja Abraham y'ijxë'ëky, ënät t'ijxy nitëkëëk yë ja'ay wyintänëty ye'etyëjk. Ko jëtu'un t'ixy ojts pojën y'ëxwä'ätsë'ëky ets ojts t'ëëwpo'kxy tkajpxpo'kxy. 3Tää t'ënëmaay:
Wintsën tuntë mëyajtën ets ka'ap ënätyë mwinpitëty. 4Tyamës nëjkx yë nëë nyajtsoony ets mkë'ëpuj mtekpyujtëty. Tääts wäänë mwinpo'kxnaxtëty yaa kepypya'tkë'ëy ma nyiktuuyëtyën. 5Oy jëtu'un ko yaa mnaxtë maas yaa n'ity ntsëënën. Nëjkxës n'ëkyajtsoony mëti'ipë nkaaynyaxtëpën, tääts jëtu'un jatëkok mëjaawpëktëty ets jotkujk mtu'upëktëty:
Oy, jëtu'un ojts y'ëtsowtë ja nitëkëëkpë ja ja'ayëty.
6Ënet ja Abraham jap tyëjkëy tëkoty, ma ja wyittëjkën ets t'ënëmaay ja tyo'oxytyëjk Sara:
Pe'tym, mijts ëkni''ijxëkyoj yë tsajpmokway oy i'px tsimën ets xyaj'oyëty yë tsajpkääky.
7Ënet yë Abraham ojts näjyëtu'un pëyi'ikyë nyijkxy ma ja tsyajpkaa tyajtänën ets twin'ijxy yë wäänë ni'kxpë mëti'ipë ënety jamën. Tää tukë'ëtëjkëy ja tyuunpë ets ojts pojën tyaj'oyë ja ka'ayën ukën. 8Yë Abraham oy tsuj ojts tukwintsë'ëkë ja ka'ayën ukën mëti'ipë ënety të nyija'tyën ma ja jyëën tyëjkën, tmooy yë tsi'tsknëë ets ka'ayën ukën. Yë Abraham jëjp'ijxp ënety tyim'ity oy tii t'amëtowa'antëty ja ja'ayëty. Yë'ë ënety tyimkuteempy ja tojkx ets ja uuky jam kepypya'tkë'ëm.
9Ko ojts kyääytyääynyëtë ja nitëkëëkpë ja ja'ayëty, ënät tyajtëëwtë ja Abraham:
¿Ma ja mto'oxytyëjk Sara?
Ënet y'ëtsooy ja Abraham. Tap ja tëkoty, ma wit tëjkën.
10Tää ojts nitu'uk y'ënä'äny:
Jëmëjt jatëkok min nku'ix nkukajpxëtë. Ko jyamëjt'atëty, Sara yë mto'oxytyëjk pyatäämpy tu'uk yë u'unk maay.
E yë Sara, yë Abraham yë tyo'oxytyëjk; taptëm ënety tmëtoow'ity jëxkë'ptsow ma yajnitëkën ja wyittëjk. 11Abraham mëët yë Sara tu'knax mëjja'ay ënätynyë. Yë Sara tëë yë nyixëëw nyijëmëjt nyajxnë ma jeexyë ja u'unk maay tsëmy'ätyën. 12Paaty yë Sara ka'ap ënety t'ëkmëmëtaknë amë'pxy y'itëty. Tääts tukxiky, tyaa ënety myäy tyäjy: ¿Wi'ixëm jëtää u'unk maay tyam n'ëkmëmay n'ëkmëtajëtyës, pën yë nye'etyëjkës ets ëjts tëëjës tu'knax nmëjja'ayënëtë? 13Ënet yë Wintsën t'ënëmaay yë Abraham:
¿Tii tyukxikpy yë Sara? ¿Këtii tmëpëky, ko jëtu'un ijxtëm myëjja'ayëtyën jyaak jyëkyejpynyëm yë u'unk maay tyajmëxu'unk'atëtyë? 14¿Jä'ä jëtää winë mëti'ipë Wintsën tsip jya'awëpë? jajëmëjt jatëkok yaa min nku'ix nkukajpxëtë. E yë Sara jajëmëjt nëjkx tpaaty t'ixy yë u'unk maay.
15Ko ojts jëtu'un tmëtoy yë Sara, ënät ojts wäänjaty tsyë'ëkë, ka'ap tjanikajpxany ko ënety të xyi'iky. Tyaa y'ënäny:
Ka'apës y'ëjtsëty të nxi'iky.
Tä y'ëtsoowë ja Wintsën ja kyukäjpxy:
Ëjts nija'ap ko tëë mxi'iky.
Abraham tnimëpëjktsowë ma Tiosën yë Sodomë kajpn
16Ënet ja në'ëye'epyë tu'uye'epyëty ojts jatëkok tyu'utëkëtë, jam nyëjkxtë Sodomë. Ënet yë Abraham ojts tpatsoony ets jam tu'ujëjpwowëja'any ma mëët nyäjyëëkajpxa'anyën. 17Tä ja Wintsën ojts myäy tyäjy ets y'ënäny: Oy yowë kyopkpëkyëty etsës yë Abraham ntuknijawëty mëti'ipës ntunäämpyën. 18Jä'ä ko teety'ataanp yë'ë ma ja mëjpë ets mëkpë ja naax kajpnën. Yë'ëjës të ntukmëkënu'kxë ja'ayëty ma tu'kë'ëyë naax kajpn ets ma naaxwiinyëtë y'ëwtityën. 19Yë'ëjës të nwin'ixy ets yë'ë t'ënä'ämëty yë y'u'unk y'ëna'k, y'u'unk y'ok, ko tpatuntëty yë n'ijxpëjkënës ets tu'kë'ëyë mëti'ipë oyën ets tëyajtënën. Jëtu'un tjëkyäpëty näjyëtu'un ntunëtyës tu'kë'ëyë, winë mëti'ipës të n'ëwaanën ets tëëpës nikäjpxyën. 20Ënet ojts ja Wintsën y'ënä'äny:
Yë ja'ayëty mëti'ipë juuky'ajtëpën Sodomë ets Gomorra, ëxëëk jyuuky'atë ets pyokyëty mëj këjää të y'awinpijnë. 21Tyam yë'ëjës ninëjkxyp etsës n'ixa'any pën yë pyokyëty mëj oynyë jëtu'un ijxtëmës të nyaj'ënëëmëtën jëtu'un'äämpyës nijawëty yajxon.
22Mäjtsk yë tëjk'ëye'eypëty ojts nyëjkxtë jam Sodomë. E yë Abraham ojts mëët yë Wintsën jyaak wë'ëmy. 23Ënet ojts ni'ikyë tmëwinkony ets tyajtëëy:
¿Wi'ix myajkutëkoyäämpy jëtu'un yë wa'ats ja'aytyëjk mëët tu'knax yë ëxëëk ja'ayëtyë? 24Wä'änxyëp jyajamëty yë wa'ats ja'aytyëjk oy niwëxtyikxymyajkën. ¿Mëët yë niwëxtyikxy majkpë, myajkutëkoyäämpy jëtu'unë, ka'apën xypyokymyä'kxëtyë? 25Ka'ap yowë myëtëyëty ets xyaj'ookëty mëti'ipë ka'ap tii tuuntëkoyën mëët tu'ukyë ja mëti'ipë pokymyëëtën, jëtu'un tä jeexyë tu'knax të pyokytyuntën. Këtii jëtu'unpë xytyuny. Mijts yajkutujkpë yë'ë naaxwiinyëtë apëtsëmy. ¿Këtii xynyipaye'eyä'änyë?
26Ënet yë Dios y'ëtsooy:
Pën npatypyës niwëxtyikxymyajk yë wa'ats ja'aytyëjk ma Sodomë kajpnën, mëët kyëjxmëpë yë niwëxytyikxymyajkpë wa'ats ja'aytyëjk npokymyä'kxtëpës yë'ëjëty.
27Ënet yë Abraham ojts jatëkok y'ënaankojnëpë:
Wintsën ëkmä'kx oy yam mijts jëtu'un n'ëkne'emy. Oy mijts mTiosëty, ëjts nitiijës nkakëjxmëty, naaxwiinyëtë ja'ayës. 28Wä'än jëtää jyaak tëkoy'ity oy nimëkoxkën, tääts kya'pxëty niwëxtyikxymyajk. ¿Ijxtëm mëkoxk tyëkoy'ityën myajkutëkoyäämpy jëtu'un tu'kë'ëyë kajpnë?
Tä yë Dios y'ëtsooy:
Pën mpatypyës niwëxtyikxy mëkoxk yë wa'ats ja'aytyëjk, ka'apës yë nyajkutëkoyëty yë naax kajpn.
29Ënet ja Abraham t'ënëmaaykyojnëpë ja Wintsën: Wä'änxyëp jëtää jap je'eyë niwëxtyikxy yë wa'ats ja'aytyëjk.
Tä ja Wintsën y'ëtsooy: Pën jap niwëxtyikxy, yë naax kajpn ka'apës nyajkutëkoyëty.
30Ënet ja Abraham tjaakmënu'kxtä'äky ja Wintsën ets t'ënëmaay:
Wintsën këtiis xytyukjoot'anpëkëty oy yam mijts jëtu'un n'ëkyajjotkëxy. Wä'änxyëp jëtää jap je'eyë xypyaatëty yë wa'ats ja'aytyëjk ni''i'px majkën.
Tä ja Dios y'ënëmaaykyojënëpë:
Pën janty jap ni''i'px majkën npokymyä'kxëpës yë naax kajpn.
31Ënet ja Abraham jatëkok yë Wintsën t'ënëmaaykyojnëpë:
Wintsën mëpaat xy'ëknamä'kxëty ko yam jëtu'un mijts nyajjotkëxy. ¿Tii jëtää tunëtëp jatëtëp, ko je'eyë xypyaatëty ni''i'px yë wa'ats ja'aytyëjk?
Ënet yë Dios y'ëtsooy, pën npatypyës ni''i'px ka'apës nyajkutëkoyëty yë naax kajpn.
32Ënet ja Abraham y'ënaankojnëpë:
Tunë mëyajtën Wintsën, këtii m'äkëtëty mëët ëjts. Yi'iyës tyaapë njaakajpxäämpy ets täätsës n'ëmonëty. ¿Tii mtunäämpy ko xypyaatëty je'eyë nimajk yë wa'ats ja'aytyëjk?
Ënet yë Dios y'ëtsooy:
Koojës nimajk mpaatëty ka'apës yë naax kajpn nyajkutëkoyëty.
33Ko ojts ja Dios jëtu'un myëtyakta'ay mëët ja Abraham, ënät ojts nyäy'ëxmajtsënëtë. E yë Abraham ojts wyimpijnë ets nyëjkxnë jatëkok ma tyëjkën.
Currently Selected:
Génesis 18: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia Dc en Mixe de Quetzaltepec, Oaxaca México © Sociedad Bíblica de México, A.C.
