Génesis 17

Ja nätsyujkën ets ja käjpxytyu'unën

1Ko ënety yë Abram yë jyëmëjnë majkta'px majkmokx majktaxk, ënety yë Wintsën nyänyikëxë'kë ma yë'ëjën ets y'ënëmaayë:

Ëjts jëtu'un Tios'ajtp. Ëjts nmëët'ajtypyës yë mëk'ajtën ets mjuuky'atëty wa'ats, m'itëty oy tsuj ëjts nwintum. 2Ntunäämpyës yë käjpxytyu'unën mëët mijts ets xymyëët'atëty may yë m'u'unk m'ok.

3Ënet ojts yë Abram nyäkyoxtënaaytyä'äkyë, tyukpatyp yë wyimpok yë naax, tam ënety yë Dios kyäjpxy:

4Yë'ë ya'atë käjpxy tyu'unën'ajtp mëti'ipës ntuunpyën mëët mijts. Mijts mteety'atëp ma tu'kë'ëyë naaxwiinyëtë ja'ayën. 5Ets ka'ap xy'ëkxëëwajtnëty Abram, jä'ä tyam mxëëwajtnëty Abraham. 6Jä'ä ko mijts tyam mpëjktäkpy teety ma tu'kë'ëyë naaxwiinyëtë ja'ayën ets ma mijtsën pëtsëmtëp yë ënä'ämpë yajkutujkpë, ma naax kajpn yë mëjjëtypë. 7Yë käjpxytyu'unën mëti'ipës ntuunpyën mëët mijts ets mëët yë m'u'unk m'ok. Yë'ë koos jëtu'un mijts xyTios'ataanpës ets tu'kë'ëyë m'u'unk m'ok ets ja y'u'unk y'okëty näjyëtu'un. 8Mijts ets yë'ëjëty nmo'ojantëp yë naaxwiinyëtë jampë Canaán ma mijts tyam mtsëënën ets yë'ë tkuma'ayën'atëty, etsës ëjts nTios'atëty.

9Tää ojts yë Abraham yë Dios jyaak'ënë'ëmxëty:

Mijts kuuytyun yë nkäjpxytyu'unënës ets näjyëtu'un yë m'u'unk m'ok tkuuytyuntëty. 10Yë'ë ya'atë käjpxytyu'unën mëti'ipës yam ntuunpyën mëët mijts. Oy y'oyëty ko m'u'unk m'ok tuntëty. Tu'kë'ëyë mëti'ipë ja'ay ijtp ma miitsëtyën, oy kyopkpëkyëty ko yajnatsujk'ëwtitëty ja ye'etyëjkajtën. 11Kopkpëky ko xynyitsujktu'utëty ja ye'etyëjk'ajtënëty. Yë'ë jëtu'un ijxpäjtën wë'ëmëp koos yë käjpxytyu'unën ntuny mëët mijts. 12Tyam tso'ontä'äky ets tyu'uye'eyëty yë xëëw jëmëjt; tu'kë'ëyë yä'äy ëna'k jënu'un yajpaatyën ma miitsëtyën. Ko tyuktujkxëëwpätëty ma ënety të myinyën naaxwiiny, jää yë ye'etyëjkajtën nëjkx yë nyi'ak yajnëtsuky, jëtu'un yë jaaypyaat jaaypyo'kxy ets y'u'unk y'ëna'k mëti'ipë myajmëtuunpyën ets wä'än timpyënëty. 13Nitu'uk ets ni pën mëpaat kyaninaxy yajtsukëty yë nyi'ak. Jëtu'unës yë nkäjpxy tyu'unën wyë'ëmëty ets nyikëxë'ëkëty ma miitsëty yë mkë'ëmxixyëtyën ijxtë mapaat mjuuky'atë. 14Pën ka'ap ja ye'etyëjkajtën yajnitsujktu'uty, kopkpëky ko yajwijtspëtsëmëty ma miitsëtyën. Jä'ä ko ka'ap ënety ja nkäjpxytyu'unënës të twinkutsë'ëkë.

15Ënet ojts näjyëtu'un Dios t'ënëëmë yë Abraham:

Yë mto'oxytyëjk ka'ap t'ëkxëëwatanë Sarai, tyam ets nyëjkxëty yë xëëw yë jëmëjt jä'ä txëëwajnëty Sara. 16Tyamës nkënu'kxa'any ets nmo'ojäämpy tu'uk yë u'unk maay ma yë'ëjën, jëtu'un nkënu'kxäämpyës yë'ë. Yë'ë taak'atëp ma tu'kë'ëyë naaxwiinyëtë ja'ayëtyën. Yë'ë y'u'unk y'ok yajkutujkpë nëjkx y'itë ma nyaax kyajpnëtyën.

17Ënet ojts yë Abraham nyäjyijtä'äkyë tyimtukpat yë wyimpok yë naax. Tää tukxiky ets myäy tyäjy: ¿Wä'än jëtää ja'ay tyeety'atëty mëti'ipë jyëmëjnën mëko'pxë? ¿Wa'an jëtää Sara u'unk tmëët'atëty ets majkta'px majk yë jyëmëjnë? 18Ënet yë Abraham t'ënëmaay yë Dios:

Yë'ëpëk jeexyë Ismael t'ëkmëwë'ëmy mijts yë mkënu'kxën.

19Ets Dios y'ëtsoowë:

Mëti'ipë mijts ntuk'ënëmääpyën yë'ë ko mto'oxytyëjk tu'uk yë u'unk tyajmina'any naaxwiiny ets xyëëw xypyëjtakëty Isaac. Mëët yë'ë ntuknikajpxpejtypyës yë n'oyajtënës ets yë'ë myëët'atantëp yë y'u'unk y'ok. 20Näyjyëtu'un yë Ismael ijxtëm mijts të m'ëna'anyën: tyamës nkënu'kxa'any. Myëët'atäämpy may yë u'unk ëna'k ets nimayëjantëp yë'ë y'u'unk y'ok. Ismael yë'ë teety'ataanp ma ja nimajkmäjtskpë ja'ayëtyën mëj'äämpyë ets tu'uk yë mëj kajpn nyajkoja'anyës mëët yë'ë. 21E yë n'oyajtënës yë'ëjës yë Isaac ntukmëët'atäämpy, yë mëti'ipë Sara yajminäämpyën naaxwiiny jajëmëjt.

22Ko ja Dios myëtyaktaay mëët yë Abraham, ënät ojts jam tsyo'onë. 23Jä'ä xëëw ma ënety jëtu'un të myëtyä'äkyën yë Abraham mëët yë Dios. Jä'ä xëëw ojts ja y'u'unk Ismael tnatsujk'ëwtijtë ja ye'etyëjkajtën ets ojts näjyëtu'un ja tyuunpëtëjk tnatsujk'ëwtijtaayë ja ye'etyëjk'ajtën, jënu'un ënety të myëxu'unk'atën jap ma tyëjkën. Ets jënu'un ënety të tjuuypyën mëët yë kyë'ëm wit kyë'ëm meeny, ojts yajnatsujk'ëwtijta'atë ja ye'etyëjk'ajtënëty ja nyi'ak jëtu'un ijxtëm ënety yë Dios të tni'ënä'ämën. 24-25Abraham jä'ä ënety yë jyëmëjt majkta'px majkmokx majktaxk, e y'u'unk Ismael jä'ä ënety yë jyëmëjt majktëkëëk, ko ojts yajnatsujk'ëwtitë ja ye'etyëjk'ajtënëty. 26Abraham mëët ja y'u'unk Ismael, nimäjtsk tuuntë ja nätsyujkën jä'ä xëëw. 27Tu'ukyë mëët ja tyuunpëtëjk mëti'ipë jap ijtëpën ma tyëjkën, mëti'ipë ënety të tjuyën ets mëti'ipë jap të myëxu'unk'atën.

Currently Selected:

Génesis 17: QUETZMIXE

Highlight

Copy