Hechos 8

1Oy ja Saulo tja'awëy ko ja Esteban tyaj'o'ktë.

Ko ja Saulo tpajëtijtä'äky ja mëpëjkpëtëjk

Jä'ä xëëw yajpajëtijtaktë ja mëpëjkpëtëjkëty, mëti'ipë ja Jesús myëpëjktëpën jampë tsyëënëtën Jerusalén. Ni'ëmukë, yi'iyë ja Jesús ja y'ijxpëjkpëtëjkëty ojts ka'ap yajpaatë, jä'ä ko ojts ënätyë ye'eywya'kxta'atë, ets nyëjkxtaaytyë maajaty ja Judea ets Samaria y'itjotmën. 2Tam jënaakën mëti'ipë ja Dios myëpëjktëpën, yë'ë yajnaaxtëjkëtyë ja Esteban ets tnijëëy tniyaxtë. 3Tääts ja Saulo tpajëtijtäky ja mëpëjkpëtëjk winjëën wintëjk ets atsip tyajpëtsëëmy tyëkoty, wä'än ye'etyëjk to'oxytyëjkëty ets pujxn tëkoty tpëjktaktaaytyë.

Ko ja Kristë ja y'aaw y'ayuk yajkajpxwä'kxy jam Samaria

4Ja mëpëjkpëtëjk mëti'ipë pëtsëëmtën jam Jerusalén, jä'ä ojts tnikäjpxy tnimëtya'aktë ja Dios ja y'aaw y'ayuk maajëty nyëjkxtën. 5Ja Felipe, ojts kyëtä'äky jam Samaria kajpnjotm. Ënet ja Kristë ja y'aaw y'ayuk ojts tkajpxwa'kxë. 6Nimay ja ja'ay myiintë ets t'amëtoow'ijtë ja aaw ayuk mëti'ipë ja Felipe kyäjpxypën ets t'ijxtë ja mëj'ajtën mëti'ipë tyuunën. 7May ja ku'oypyë t'ixkejxy ja Felipe. Ayaxp ajojkp pyëtsëëmtaaytyë ma ja ja'ayëtyën. Näy tsoktaaytyë ja kë'ëxujxpë tekyxyujxpë ets ja ja'ay tekymya'atëtypë. 8Paaty ja ja'ay jam xyoontaktë ma tääpë kajpnën.

9Näy jam Samaria ijty tu'uk ja ye'etyëjk mëti'ipë xyëëwajtypyën Simón, mëti'ipë xëëwmääpyën. Mëj ijty kë'ëm nyäpyëjktä'äkyë ets ja ja'ay tukmëpëky mëti'ipë tyuunpyën. 10Ni'ëmukë mëj mutsk t'amëtoow'ijtë ja ja'ay wi'ix ja Simón y'ënä'änyën. Jëtu'un y'ënantë ko ja Simón tmëëtëty ja Dios ja myëk'ajtën.

11Yë'ëts ja xëëwmääpyë ja jyä'ä pyatuunëtëp, jä'ä ko tëë ënety kanaak jëmëjt wyin'ëënëtë. 12Ko ja Felipe ojts nimëtyä'äky ja aaw ayuk oypyë mëti'ipë ja Dios kyutujkën'ajtypyën ets näjyëtu'un nimëtyäky ja Jesús ja jyä'ä, tääts tmëpëjktë mëti'ipë ja Felipe kyäjpxypën ets nyëëpäjtë ye'etyëjk to'oxytyëjk. 13Näyjyëtu'un ja Simón ojts myëpëjknë ets nyëëpejty ets ja Felipe ojts tmëjwa'kpety ko t'ijxy ja ijxpät ets ja mëj'ajtën mëti'ipë ja Felipe tyuunpyën. 14Ko ja ijxpëjkpëtëjk tnija'awëtyë, mëti'ipë jam jaakwë'ëmtën Jerusalén, ko tam ja Samaria mëti'ipë myëpëjktëpën ja Dios ja y'aaw y'ayuk, tää ja Pedro yajkäjxtë mëët ja Juan. 15Ko jam jyajtë, ënät tuknija'amyäjtsëtë ja samaariëtë ja'ayëty ja Dios ets t'ëxajëtëty ja Kënu'kxymyëkajtën. 16Jä'ä ko ka'anëm ënety ja Kënu'kxymyëkajtën tyukmin tyukja'tëtë ja samaariëtë ja'ayëty, je'eyë ënety të nyëëpätë Wintsën Jesús xyëëwkyëjxm. 17Tääts ja Pedro ets ja Juan ja ja'ay ojts tkë'ënixajtë, ets ja Kënu'kxymyëkajtën ojts t'ëxajëtë.

18Ko ja Simón t'ijxy ko ja ja'ay t'ëxajëtë ja Kënu'kxymyëkajtën ko ja ijxpëjkpëtëjk kyë'ënixajëtë, ënät ja meeny ojts t'ëwaanë, 19ets y'ënëmaayëtë:

Mooykyës näjyëtu'un yë mëk'ajtën mëti'ipë mmëët'ajtypyën ets näjyëtu'un tpaatëty ja Dios ja myëjaaw myëk'ajtën koos pën nkë'ënixäjëty.

20Tääts ja Pedro y'ëtsoowë:

Poky mijts m'itëty mëët yë mmeeny ëyoowtaknjoty, jä'ä ko xywyinmay xyjyuyä'äny mëti'ipë ja Dios nyayäjkpyën. 21Ka'ap ya'atë tuunk mpaatyë, jä'ä ko ka'ap yë m'aaw mjot y'oyëty ma Tiosën. 22Jootwinpit ets ya'atë ëxëëk winma'any xy'ëxmatsëty. Ja'amyäts ja Wintsën ets mpoky yajnimä'kxëty mëti'ipë m'aaw'ajtyp mjot'ajtypyën. 23Jëtu'unës n'ixy ko yowë näjyënaxë xyjyawë ko ja poky myaj'ityë tsumy matsy.

24Tääts ja Simón y'ëtsooy:

Tuknija'amyäjtsëtëkës ja Wintsën etsës ka'ap jëtu'un njatëty ijxtëm mijts të m'ëna'antën.

25Ko ja Pedro ets ja Juan tnimëtyaktaaytyë ja Wintsën ja y'aaw y'ayuk, ënät wyimpijnëtë ets nyëjkxnëtë jam Jerusalén, tkajpxwa'kxtë ja Dios ja y'aaw y'ayuk maajëty ja kajpn ënety tuknaxtën jam Samaria y'itjotm.

Ko ja Felipe mëët nyäpyäätyë ja Etiopíë ja'ay

26Tääts ja Felipe ojts tu'uk ja Wintsën ja y'anklës nyë'ëmxëty:

Nëjkx ëpa'tkë'ëmtsow, ma të'ëts'itjotmën, mëti'ipë tu'u najxpën jam Jerusalén ets nyijkx Gaza.

27Tääts tsyo'ony ets jam tu'u'am tpaty tu'uk ja Etiopíë ja'ay mëti'ipë ënety ja Dios ojts të t'ëwtatyën jam Jerusalén. Ya'atë ja'ay mëj tuunk ënety nyëkëjxm'ajtyp, yë'ë tyuunk'ajtyp ja meenykyoonë'k ma ja yajkutujkpën, ja to'oxytyëjk jampë y'ën'emyën Etiopíë. 28Kyajpnjotm ënety ja ja'ay nyëjkxnë kepywyintëkäämjoty ets jap tkäjpxy ja noky mëti'ipë ja Dios ja kyäjpxynyajxpë Jeséas jyääyën.

29Ënet ja Kënu'kxymyëkajtën ja Felipe y'ënëmaayë:

Ninëjkx ya'atë kepy wintëkäämpë winkon.

30Ko ojts tninëjkxy ets tmëtooy ko ja noky tkäjpxy mëti'ipë ja käjpxynyajxpë Jeséas jyääyën. Ënet tyajtëëy:

¿Mwinja'ap tääpë xykyäjpxyënë?

31Tää y'ëtsooy ja noky kyajpxpë:

¿Wi'ixës nwinjawëty? ka'apës pën xytyukwinkumëtyaakë wi'ix nyiwijyën.

Ënet ja Felipe t'ënëmaay ets yajpätëtëty pujxnwintëkäämpë këjxm ma ënety jam y'u'unyën.

32Yë'ë ënety kyäjpxyp ma ja Dios ja y'aaw y'ayuk y'ënä'änyën:

Jëtu'un jä'ä ijxtëm ja kupixyny yajmënejkxyën ma y'o'ktaknën;

ets ijxtëm ja kupixyny u'unk amonyë tkupëkyën ko yajknikeepy,

ni tuk'aaw ojts kyakäjpxy.

33Jëtu'un ja ja'ay yaj'amutsk'ajtë

ets kä'äp ojts oy yajpaye'ey;

¿Pën jëtää nikajpxëtëp ko jam ja y'u'unk y'ok?,

jä'ä ko ojts ja ja'ay yaj'ookyë yaa naaxwiiny.

34Tääts ja Felipe ja etiopiiyëtë ja'ay yajtëëwë:

Tun yë mëyajtën, nikajpx, ¿tii nyimëtyäkpy, kë'ëm nyätyijyë, ëkë wiinkpë nyimëtyäkpyë?

35Tääts ja Felipe tuk'ijxpëjktso'ony mëti'ipë ënety ja ja'ay kyäjpxypën ets tukmëmëtyäky ja oy aaw oy ayuk, ja Jesús ja jyä'ä. 36Jëtu'un tyu'uye'eytyë, ënät ja nëë tpatë ets ja Etiopíë ja'ay y'ënäny:

Tyaa nëë, ¿ka'ap jëtää y'oyëty koos nnëëpätëtyë?

37Tää ja Felipe y'ëtsooy:

Pën mmëpëjkpy yë Jesús ëmuumtu'ukjot, oy mnëëpätëty.

Tää y'ëtsoowinpijty:

Nmëpëjkpës ko Jesús Dios y'u'unk'atyë.

38Ko jëtu'un y'ënäny, tää ja kepy wintëkäämpë tyajwa'ak'o'oyëtë ets nimäjtsk ojts nyëjkxtë nëëjotm. Jamts nyëëpejty ja Etiopíë ja'ay. 39Ko pyëtsëëmtë nëëjoty, ënät ja Felipe ja Wintsën ja Jya'awën wiinktsow yajnëjkxë; ni kä'äp ja Etiopíë ja'ay t'ijxy maa ojts ja Felipe nyijkxy e yë'ë akujk jotkujk ojts jatëkok tyu'utëkë. 40Jam ja Felipe ojts yaj'ixy ma ja kajpn txëëwatyën Azoto. Kajpnkajpn ijty tkajpxwä'kxy ja aaw ayuk oypyë koonëm jyä'äjty jam Cesarea.

Currently Selected:

Hechos 8: QUETZMIXE

Highlight

Copy