Sabiduría 17
17
Ik'ch'ipambä pañämil cha'añ xjoñtolob, isäklel cha'añ tojo'bä
1KCh'ujutat lojoñ,
ñumeñ ñukäch jiñi aña'täbal
yik'ot wokoljäch cha'añ mi' ikäjñel.
Jiñi xjoñtolob ma'añik mi ich'ämbeñob isujm,
jiñ cha'añ mi' chäñ sojkelob iña'täbal.
2Che' tsi' loñ ña'tayob xjoñtolob
ik'äñob ti tsätsbä e'tel jiñi atejklum,
tsa' joy käleyob ti ik'ch'ipambä pañämil,
ñumeñ tam che' bajche' jump'ejl ak'älel ya' ti kächoñib.
Tsa' ñujp'iyob ya' ti iyototob
yik'ot ñajt tsa' käleyob ti akoltaya.
3Tsi' loñ ña'tayob cha'añ jiñi imulilob
mach käñbilik yik'ot mukul mi' ikaj iyajñel,
ixku tsa' kajiyob ipam pukob ibä,
cha'añ woli ibäk'ñañob bi'bitakbä iyejtal wutäl.
4Mach jiñ yälä mi' imujkuñob ibä ya' ti iyototob,
sajtelix yomob ti bäk'eñ;
mi' iyu'biñob bi'bitakixbä yujk'eltak,
yik'ot mi' iyilañob bi'bixbä iyejtaltak.
5Jiñi k'ajk ma'añik ip'ätälel cha'añ mi' ipäs isäklel ti' tojlelob,
mi' jiñikax isäklel ik'äk'al ek'tak
tsa' mejli isäk'esañ jiñi bäbäk'eñbä ak'älel.
6Kojach mejl iyilañob ik'äk'al jump'ejl ñichk'ajk
mu'bä ibajñel lejmel, yik'ot mu'bä ibäk'tesañob.
Che' mi' yajpel jiñi ñich k'ajk,
jiñi ik'elol pañämil ñumeñto ibi'bilel,
yik'ot käläx but'ulo'bix ipusik'al ti bäk'eñ.
7Jiñi iña'täbal joñtolbä xwujtob egipciojobä
ma'añik tsa' k'äjñibäyi.
8Jiñi tsa'bä iyäläyob cha'añ muk'äch imelob koltaya,
tsi' ts'i'buyob ibä ti bäk'eñ.
9Jiñi yuk'el ixämbal bälte'eltak
yik'ot siwikñetakbä iyuk'el iyej chañ,
mach jiñik yälä k'uñtejach,
tsiltsilñeyob tsa' kajiyob ti bäk'eñ.
¡Jiñto tsi' ibäk'ñañob jiñi ik' ja'el!
10Yujiläch jiñi xjoñtolil
cha'añ jiñi joñtolil mi iyäk' bäk'eñ,
yik'ot cha'añ jiñi mulil ma'añik ich'ejlel.
¡Jiñi machbä xuk'ulik ipusik'al
mi' ichäñ ña'tañ chuki machbä uts'atik!
11Jiñi bäk'eñ mi' yäk'eñ ti sajtel lak pusik'al yik'ot lak ña'täbal
12Ixku che' ma'añik xuk'ul lak ña'täbal,
ñumeñ bi'biyäch mi lak ña'tañ jiñi itejchibal wokolil.
13-14Che'bä woliyob ti wäyel jiñi egipciojob,
tsi' ñajleyob cha'añ woli iyajñesäñtelob
ti jiñi iyejtaltak wutäl jämäkñetakbä,
yik'ot jiñi bäk'eñ muk'ix iju'säbeñob ip'ätälel
ya'i ma'añix mi' ichäñ ñijkañob ibä.
Jiñi ak'älel wolibä ijoyob
ma'añik mi che'ik wistäl ip'ätälel,
kome ya'äch tilem ti' yumäñtel chämel
machbä añik ip'ätälel.
15-16Che' weñ bu'tulo'bix ti bäk'eñ jiñi egipciojob,
ti' pejtelelob, temel yik'ot jiñi x-e'telob ti cholel
yik'ot xkäñta täñäme'ob,
tsa' käleyob che' bajche' ñu'p'ulob
ti jump'ejl kächoñib machbä añik ikolobte'lel,
ti' pejtelel baki joy añob.
Kächbilob ti iyik'ch'ipañlel päñämil
yik'ot mach mejlo'bik ti puts'el.
17Ts'itajach chuki mi' iyu'biñob yax woliyob ti bäk'eñ;
mi' ibäk'ñañob che' säjäkña jiñi ik',
ik'ay jiñi mate'el mut,
yik'ot jiñi che' tumlay iya'lel kolem jajpa'.
18Mi ibäk'ñañob che' mi' iyajlel xajlel,
iyajñel aläk'ältak,
iyuk'el jiñi bälte'el
yik'ot che' pojokñetak jiñi che'ñ ya' ti witstak.
19Jiñi yambä juñmojt xchumtälob ti pañämil
säkpojañäch baki añob
cha'añ isäklel ik'äk'al jiñi k'iñ,
yik'ot woliyob ti e'tel bajche' ti' pejtelel k'iñ.
20Ixku ti' tojlel egipciojob
tsa' tili jump'ejl ak'älel ñumeñ ik't'oñañbä.
Yik'ot che' ñumeñ bäbäk'eñtikax jiñi ik't'oñel
ñumeñ bäk'eñtik che' komol mi' yajñelob.
Currently Selected:
Sabiduría 17: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM