Sabiduría 18
18
1Ixku ti' itojlel atejklum
tsa' ajñi säkjamañbä isäklel pañämil.
Jiñi egipciojob, che' mach mejl ik'elob mi' yu'biñob it'añ,
che' jiñi mi itijikñesabeñob ipusik'al,
cha'añ ma'añik woliyob iyu'biñ wokol ja'el.
2Jiñi egipciojob tsa' itijikñesayob ibä yik'ot awalo'bilob
cha'añ ma'añik tsi' k'äñäyob jiñi ak'älel
cha'añ mi' iwäläk k'extañob jiñi wokol tsa'bä ak'eñtiyob,
yik'ot tsi' ik'ajtibeyob ja'el cha'añ mi' ip'uñtäñtelob
ti' kaj cha'añ tsi' imeleyob ka'bäl joñtolil ti' tojlelob.
3Jiñi atejklum, ma'añik tsi' yiläyob ik't'oñañlel pañämil,
tsa' awäk'eyob jump'ejl che' bajche' yoyel melbilbä ti k'ajk,
lajaläch che' bajche' ik'äk'al k'iñ, tsa'bä ipäsä majlel bij
che' ya' majlelob ti bijtak machbä käñbil icha'añob
yik'ot ma'añik chuki mi' itumbeñtelob ti ik'äk'al.
4Jiñi egipciojob tsa' käleyob ti ik't'oñalel pañämil,
ti' kaj cha'añ tsi' iyäk'äyob ti tsästbä e'tel awalo'bilob,
jiño'bäch año'bä ti' iye'tel cha'añ
ich'ämob majlel ti' joytilel pañämil
jiñi tijikñabä t'añ icha'añbä axik'ojel.
Itojmulil egipciojob
5Jiñi egipciojob tsi' ña'tayob itsäñsañob
jiñi alp'eñelob iyalobilob ach'ujulbä tejklum,
kojach jiñi Moisés tsa' mejli ti kojlel,
jiñäch tsa'bä bajñel käjyi ya' ti ja' ik'aba' Nilo.
Ti kaj ijoñtolil
jatet tsa' achilbeyob ka'bäl iyalobilob;
tsa' awäk'e ti' pejtelel xjisayajob
cha'añ mi si'k'ob ja' ya' ti chächäkbä kolem ñajb.
6Ixku jiñi lak ñojte'elob
tsa'äch añaxañ wäñ su'beyob
pejtelel chuki mi ikaj iyujtel ti jiñbä ak'älel,
cha'añ mi' itijikñesañob ipusik'al
che'bä tsa' ik'eleyob che' tsa' ats'äktesa jiñi at'añ.
7Jiñi atejklum tsa' ipijta
cha'añ mi' akoltañob jiñi utso'bä
yik'ot cha'añ mi' ajisañ jiñi mu'bä its'a'leñob.
8Yik'ot jiñi itoj mulil
tsa'bä awäk'eyob jiñi egipciojob,
tsa' akoltayoñ lojoñ,
tsa' apäs'eyoñ lojoñ bij cha'añ mij käñet lojoñ.
9Jiñi ch'ujulbä iyalobilob jiñi utso'bä ipusik'alob
tsi' imuku yäk'eyetob tsänsäbilbä majtañäl,
yik'ot tsi' temel aläyob it'añ
cha'añ mi' ts'äktesañob axik'ojel.
Yik'ot cha'añ temel mi' kajelob iyajñel
ti' yorajlel tijikñäyel yik'ot ti iyorajlel wokolil.
Che' ya' woliyob ik'äyob jiñi oñiyixbä ch'ujulbä k'aytak,
10kajpañ tsikil ti u'biñtel iyoñel
yik'ot ich'ijiyemal jiñi xts'a'leyajo'bä,
cha'añ woli iyu'tañob cha'añ tsa' chämi iyalobilob.
11Ti juñlajal tsa' ak'eñtiyob jiñi toj mulil,
yumälob yik'ot jiñi x-e'telob icha'añ,
p'ump'uño'bä yik'ot jiñi año'bä ombä chu'bä añäl.
12Ka'bälob tsa' chämiyob ti jiñbä ak'älel,
jiñ cha'añ ma'añik tsa' mejliyob ti ch'ujñäñtel.
Ti' pejtelelob xchumtälob ya' ti Egipto tsa' ujti sajtel.
¡Jiñi ñumeñ ñukbä ik'äjñibal ya' ti jiñi yumäñtel
tsa' jili ti se'b!
13Jiñi egipciojob ma'añik tsi' iñopoyob
chuki tsi' iñaxañ alä Lak Yum,
kome tsi' xuk'chokoyob ipusik'al ti' ixi'bajlelob.
Ixku che' tsi' yilayob ti chämel askuñälo'bä iyalobilob,
tsa' kaji isu'bob cha'añ jiñi Israel jiñäch itejklum Lak Yum.
14Ya' ti iñäch'tälel xiñil ak'älel,
che' laj ñäch'älix jiñi pañämil,
15jiñi p'ätälbä at'añ tsa' lok'i ti pañchañ,
ya' baki añ ñukbä ayumäñtel,
cha'añ mi' jisäñ jiñi joñtolbä tejklum.
Jiñi at'añ woli ich'äm tilel ti' ik'äb
lajal che' bajche' junts'ijt weñ jaybä jek'oñibäl.
16Jiñi ijol mi' itaj pañchañ,
yik'ot jiñi iyok woli it'uchtañ lum,
che' woli iweñ bujt'esañ ti xsajtel
jiñi iyumäñtel Egipto.
17Jiñi egipciojob tsa' kajiyob ti bi'bi'takbä ñajal
yik'ot tsa' bujt'iyob ti bi'bixbä bäk'eñ.
18Yik'ot che' woli iyajlelob ti' pam lum,
che' säm chämeño'bix yilal,
tsi' itsiktesayob chuki ti' ikaj jiñi itojmulil.
19Awilañ, jatet ñaxañ tsa'äch asu'beyob ti' tojlel iñajalob,
cha'añ ma'añik mi' ikajelob ti chämel
che' mach iyujilo'bik chukoch woli iyu'biñob tojmulil.
Jiñi itejklum Lak Ch'ujutat ya' ti tikiñbä pañämil
20KCh'ujutat lojoñ, isujmäch ja'el
cha'añ tsa' awäk'eyob ti toj mulil jiñi atejklum.
Jiñ cha'añ, ka'bälo'äch tsa' chämiyob ya' ti tikiñbä pañämil,
ixku jiñi amich'ajel ma'añik tsa' jale.
21Che' jiñi, tsa' apäyä tilel juñtikil tojbä wiñik,
jiñäch motomaj Aarón.
Aarón tsa' tili ikoltañ atejklum,
tsi' ipulu pom, tsi' icha'le k'ajtiya
cha'añ ma' ñusäbeñob imul ti' tem pejtelelob.
Che'äch bajche' jiñi tsa' itik'i amich'ajel
yik'ot tojäch tsi' mele iye'tel ti motomaj.
22Tsa' mejli itik'e amich'ajel,
mach yik'otik e'tijib cha'añ tsäñsa
mi yik'otik ip'ätälel ibäk'tal,
tsa' mejli ti' tojlel k'ajtiya icha'añ.
Jiñi Aarón tsi' icha' k'ajtesabeyet jiñi xukulbä at'añ
tsa'bä asu'beyob kñojte'el lojoñ,
che' tsa' alaja at'añ awik'otob.
23Che' ka'bälix ichämelob jiñi wiñikob x-ixikob,
jiñi Aarón tsi' imäkta amich'ajel,
cha'añ ma'añik mi ijuñyajlel chämelob.
24Jiñi ipisleltak icha'añ motomaj
añ icha'añ chäñtsojl t'o'olbä xajlel
baki ts'ijbubil ik'aba' lak ñojte'elob,
yik'ot jiñäch iyejtal icha'añ joytilel pañämil.
Jiñi xotolbä pisil ambä ya' ti' jol
jiñäch iyejtal iñuklel ayumäñtel.
25Che' tsa' ik'ele iliyi,
jiñi ángel xjisayajbä cha'añ chämel
tsa' wäläk sujti che' ka'bäl ibäk'eñ,
kome jump'ejl jach iyejtal amich'ajel tsa' jastiyi.
Currently Selected:
Sabiduría 18: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM