Sabiduría 16
16
Chuki tsi' mele Lak Ch'ujutat ti' itojlel Israel yik'ot Egipto
Jiñi xchälältak
1kYum lojoñ,
jatet tsa' ak'äñä jiñi bälte'eltak
yik'ot ichäñiltak mate'el
cha'añ mi' awäk'eñob jiñi egipciojob
itojmulil tsa'bä ichobejtayob.
2Ixku ti' itojlel atejklum Israel,
ma'añik tsa' awäk'e itoj imulil,
tsa' apäsbeyob awutslel.
Cha'añ mi' alajmesabeñob iwi'ñal,
tsa' awäk'eyob ik'uxob xchälältak,
imut mate'el machbä käñälo'bik icha'añob.
3Jiñi egipciojob,
che' woliyob iyu'biñob wi'ñal,
mach yomo'bix ik'uxob iwaj
cha'añ bi'biñeyix ipusik'al
che' tsi' ik'eleyob jiñi bi'bitikaxbä bälte'el
tsa'bä achokbeyob tilel ti' tojlelob.
Ixku jiñi atejklum,
che' tsa'ix iyu'biyob wi'ñal,
tsi' mulañ k'uxuyob
jiñi ñumeñ sumukbä bälñäk'äl.
4Jiñi egipciojob ñumeñ yomäch che' mi' iyu'biñob wi'ñal,
ti' kaj cha'añ tsa' ajk'iyob ti tsätsbä e'tel jiñi atejklum;
che'äch bajche' iliyi, jiñi atejklum tsi' k'eleyob
bajche' tsa' awäk'eyob iyilañob wokol jiñi xts'a'leyajob ti' itojlel.
Jiñi xk'ajbasajk' yik'ot jiñi lukum melbilbä ti tsuku tak'iñ
5KCh'ujutat lojoñ,
jiñi atejklum tsa' iyilayob wokol
che' tsa' tiliyob ti' tojlel bi'bi'takbä bälte'el.
Ka'bäl tsa' chämiyob che' tsa' k'uxleyob
ti lukum ambä ichämibäl.
Awilañ, jiñi amich'lel ma'añik tsa' weñ jale.
6Jatet tsa' ak'uñte bäk'tesa jiñi atejklum,
cha'añ mi' ich'ämbeñob isujm,
ixku ti wi'il tsa' awäk'e jumpejl iyejtal
cha'añ mi' itaj ikoltäñtel
yik'ot cha'añ mi' ichäñ k'ajtesañob jiñi akäñtesa.
7Jiñi iyejtalbä jiñäch junkojt lukum melbilbä ti tsuku tak'iñ,
jiñi tsa'bä ik'eleyob tsa' k'ok'ayob.
Ixku ma'añik tsa' k'ok'ayob cha'añ tsa' ik'eleyob jiñi chañ,
tsa' k'ok'ayob cha'añ jatet woli ats'äkañob,
kome jatetäch jiñi xkoltaya ti' pejtelelob.
8Che'äch tsa' apäsbeyob xts'a'leyajob
cha'añ kojach jatet ma' lok'sañoñ lojoñ ti' pejtelel joñtolil.
9Jiñob tsa' chämiyob
che' tsa' k'uxleyob ti sajk' yik'ot ti xchax,
che' jiñi ma'añik tsi' tajayob ts'äk cha'añ mi' its'äkäñtelob,
kome che'äch tsi' ichobejtayob ichämel.
10Ixku jiñi awalo'bilob ma'añik tsa' jisäñtiyob
ti' tojlel lukumtak ambä ichämibäl
kome jiñi awutslel tsi' käñtayob yik'ot tsa' kojliyob.
11Mi tsa' k'uxleyob, se'bjach mi' ts'äkäñtelob ik'uxtäl
cha'añ mi' k'ajtiyel icha'añob jiñi at'añ
yik'ot cha'añ ma'añik mi' ñajäyel icha'ñob akoltaya.
12Ma'añik tsa' ilajmesayob yik'ot jiñi ts'akbä pimel
mi ti yambäyik ts'äktak;
kojach tsa' ikoltayob yik'ot ip'ätälel jiñi at'añ.
13KCh'ujutat lojoñ,
añäch ap'ätälel ti' kuxtälel yik'ot ti' chämel,
yik'ot mejlet acha'añ achilbeñ yik'ot acha' sutk'iñ.
14Isujmäch cha'añ añäch jiñi joñtolo'bä wiñikob
mejlbä itsäñsañob ipi'älob;
ixku jiñob ma'añobik ip'ätälel
cha'añ mi' icha' kuxtesañob jiñi sajtemo'ixbä.
Jiñi maná
15Ma'añik majki mi' imejlel ti puts'el ti ak'äb.
16Jiñi xjoñtolob
machbä añik tsa' iñopoyob ikäñetob,
tsa' ajk'iyob iyilañob wokol ti' p'ätälel ak'äb.
Tsa' täkläñtiyob ti bi'bixbä chäk ik'lel
yik'ot tuñil ja'al mu'bä ilaj jisañ;
jiñi k'ajk tsi' laj pulbeyob ibäkt'al
yik'ot tsa' isutk'iyob ti abäk'lel.
17Jiñi ja' mi' imejlel iyäpe' jiñi k'ajk,
ixku jiñi ja' tsa'to iñumeñ lejmisa.
¡Jiñi kuxulbä pañämil tsi' icha'le koltaya
ti' tojlel jiñi tojo'bä!
18Bixeltik jiñi k'ajk tsa' ju'bi ip'ätälel
cha'añ ma'añik mi' jisañ jiñi bälte'eltak
tsa'bä achokbeyob tilel ti' tojlel xjoñtolob.
Jiñi tsa' k'äjñi cha'añ mi' ich'ämbeñob isujm jiñi xjoñtolob
cha'añ jiñi itojbä meloñel Lak Yum, woli itsäkleñob.
19Ti yañtakbä k'iñ,
jiñto ya' ti ixiñil ja'
jiñi ik'äk'al k'ajk tsa' lejmi yik'ot ip'ätälel,
cha'añ mi' laj jisäbeñob iwut ipäk'äb
ya' ti ilumal xjoñtolob.
20Ixku jiñi atejklum, tsa' achokbeyob k'äläl ti pañchañ
iwaj mejlixbä ik'uxob tsa'bä ilaj mulayob.
¡Jiñi waj mejljach ik'uxob jiñi ángelob!
21Ti tojlel jiñi bälñäk'äl tsa'bä awäk'eyob
tsa' apäsbeyob iyutslel apusik'al,
kome che' tsi' ik'uxuyob, ti jujuñtikil tsa' iyu'bibe
isumuklel muläbilbä icha'añ ibälñäk'ob.
22-23Ixku jiñi bälñäk'äl
läk'äl lajaläch bajche' iña'al tsäñal,
ma'añik tsa' ulmäyi ti jiñi k'ajk.
Che'äch bajche' jiñi, jiñi k'ajk tsa' kaji isäte' ip'ätälel
cha'añ jiñi utso'bä mi' mejlel ik'uxob iwaj.
Ixku jiñi k'ajk, ti jiñi jachbä k'iñ ja'el,
lemlaw bajche' chajk yik'ot xu'chajk
cha'añ jiñi ip'ätälel chäk ik'lel
mi' ijisañ iwut ipäk'äb jiñi xts'a'leyajob.
24Ti' ichajp ti' ichajp melbilbä ti pañämil
mi' yajñelob ti' atojlel,
kome jatetäch yumälet icha'añ.
Jiñi ti ichajp ti' ichajpbä
mi' iñumeñ mich'añob ti' tojlel xjoñtolilob,
ixku mi' icha' uts'añob cha'añ mi' ikoltañob
jiñi mu'bä iyajñelob ti' atojlel.
25Jiñ cha'añ jiñi kuxulbä ti pañämil
tsa' ik'extä ibä ti' pejtelel
yik'ot tsa' kaji imel iye'tel ti' awustlel,
Che'äch bajche' jiñi tsa' kolta jiñi atejklum.
26KCh'ujutat lojoñ,
jajet tsa' awäk'ä cha'añ mi' ilaj yujtel iliyi
cha'añ mi' akäñtesañob jiñi k'uxbibilbä awalo'bilob
cha'añ mach jiñik iwut ipäk'äbob
mu'bä we'sañob jiñi wiñikob,
jiñäch at'añ mu'bä yäk'eñob ikuxtälel
jiñi año'bä ipusik'al ti' atojlel.
27Jiñi k'ajk ma'añik tsi' ijisa jiñi maná,
ixku iliyi mi' iyulmañ ti ñaxañbä ik'äk'al jiñi k'iñ;
28che'äch bajche' iliyi jiñi atejklum tsa' k'oti ikäñob
cha'añ yom sebto mi' ch'ojyelob che' maxto pasem jiñi k'iñ,
cha'añ mi' yäk'eñetob wokolix awälä
yik'ot mi' läk'tesañob ibä ti atojlel.
29Ixku jiñi ipijtaya xjoñtolob
mi' iyulmañ bajche' iña'al tsäñal
yik'ot mi' bejkel bajche' jiñi ja'.
Currently Selected:
Sabiduría 16: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM