Judit 10
10
Judit ti' itojlel Holofernes
1Che'bä tsa' ujti ipejkañ Iyum Israel, 2Judit tsa' tejchi ch'ojyel ya' ti lum, tsi' päyä tilel jiñi x-ixik iyaj e'tel icha'añ, tsa' ju'bi majlel ya' ti iyotot ba' mi' ñusañ k'iñ che' ti yorajlel k'aj oj yik'ot che' ti' yorajlel ñukbä k'iñijeltak. 3Judit tsi' jocho jiñi jaykexambä pislel läpbilbä icha'añ, tsa' kaji ti ts'ämel yik'ot tsi' boño ibä ti xojokñabä bojñibäl. Tsa' ixibañ ijol, tsi' kächä ti jump'ejl ñejt'il joläl yik'ot tsi' läpä jiñi ipislel tsa'bä ik'äñä che' kuxulto iñoxi'al ik'aba' Manasés. 4Che' ja'el tsi' läpä ixäñäb yik'ot pejtelel ich'äjlil. Tsi' weñ ch'älä ibä che' bajche' jaxäl tsa' mejli icha'añ, cha'añ majki jachbä wiñik mi' sujtel ik'el cha'añ it'ojoljaxba x-ixik. 5Che' jiñi, tsa' kaji ibut' jiñi bälñäk'äl yik'ot tsijib kaxlañ waj ti jump'ejl mukujk. Che' ja'el tsi' ch'ämä majlel jump'ejl uk'um iya'lel ts'usub yik'ot jump'ejl cha'añbä aceite. Che' jiñi tsi' iyäk'ä jiñi x-ixik iyaj e'tel icha'añ, cha'añ mi ch'äm majlel.
6Che' jiñi tsa' majliyob ti iti' jiñi tejklum, ya'i tsi' itempayob ibä yik'ot jiñi Ozías yik'ot Cabris yik'ot Carmis jiñäch jiñi año'bä iye'tel ya' ti tejklum. 7Tsa' toj sajtiyob ipusik'al che'bä tsi' k'eleyob jiñi Judit cha'añ it'ojlel, tsa' kaji isu'beñob:
8—¡La' iyäk'eñet Iyum lak ñojte'elob chuki wolibä ak'ajtiñ! ¡La' ujtik che' bajche' tsa' aña'ta, cha'añ che' jiñi mi' k'ejlel ti ñuk jiñi Israel yik'ot cha'añ mi taj itijikñäyel jiñi xchumtälo'bä ti Jerusalén!
9Judit tsi' ch'ujutesa Lak Ch'ujutat, che' jiñi tsi' su'beyob:
—Yom la' wäk' la' t'añ cha'añ mi' awäk'oñla ti lok'el majlel ti tejklum. Che' jiñi joñoñ mik kaj kmel pejtelel chuki tsa'bä la' wälä.
Che' jiñi tsa' iyäk'äyob it'añ cha'añ mi' jamob jiñi ochibal tejklum. 10Jiñi Judit yik'ot jiñi x-ixik iyaj e'telbä icha'añ tsa' lok'iyob majlel. Pejtelel wiñikob tsi' k'eleyob che' wolix iju'bel majlel ya' ti wits, k'äläl jiñto che' wolix ik'otel majlel ya' ti joktäl tsi' käyäyob ik'el.
11Che'bä jiñi Judit yik'ot iyaj e'tel icha'añ woli ik'axelob ñumel ya' ti joktäl tsi' itajayob juñmojt xjisayajob Asiriojob. 12Jiñi xjisayajob tsi' chukuyob jiñi Judit yik'ot iyaj e'tel, tsa' ik'ajtibeyob Judit:
—¿Majkiyet? ¿Baki ch'oyolet? ¿Baki mi kaj amajlel wäle? —Che'ob.
Judit tsi' jak'ä:
—Joñoñ xch'okbä iyalobiloñ jiñi hebreojob. Wäle woliyoñ ti puts'el lok'el ya' ti Betulia cha'añ mik bajñel koltañ kbä, kome woli kubiñ cha'añ jatetla mi' kajel alaj jisañob. 13Wäle kom majlel ti' tojlel jiñi Holofernes jiñi iyum xjisayajob cha'añ mik su'beñ bakibä bij yom mi' päy majlel pejtelel jiñi xjisayajob, cha'añ mi' mejlel ich'äm ti itojlel jiñi witstak, ya'i ma'añik mi juñtikilik ijisayajob mi' kajel ichämelob —che'eñ.
14Che' woli ti t'añ Judit, jiñi xjisayajob tsa' toj sajtiyob ipusik'al cha'añ it'ojläwel. Che' jiñi tsi' su'beyob:
15—Wäle koltäbiletix cha'añ pejtelel wokol ti atojlel, kome tsa' tiliyet ba'añ Holofernes, jiñi kyum lojoñ. Yom ma' xäñ majlel k'äläl ba'añ iyajñib. Lamital ili xjisayajob sam ikäyetlaj ya' baki jijlem jiñi kyum lojoñ. 16Che' ya'ix añet ti' itojlel mach yomik ma' cha'leñ bäk'eñ, yom ma' su'beñ pejtelel tsa'bä ujti asu'beñoñ lojoñ, che' jiñi uts'atax mi' kaj iyutsbiñet, —che'ob.
17Che' jiñi tsi' yajkayob jo'k'al xjisayajob cha'añ mi' pi'leñob majlel ti xämbal jiñi Judit yik'ot jiñi x-ixik iyaj e'telbä icha'añ k'äläl ya' baki añ iyajñib jiñi Holofernes.
18Che' tsa'ix k'otiyob tsa' pam pujki jiñi t'añ, jiñi xjisayajob tsa' kajiyob ti tilel ti' tojlel. Jiñi Judit tsa' wa' käle ti' ipat jiñi pisilbä otot ba'añ jiñi Holofernes. Tsa' majli ti' su'beñtel jiñi Holofernes cha'añ ya'añ jiñi x-ixik ik'aba' Judit. 19Ti' pejtelelob tsa' toj sajtiyob ipusik'al che'bä tsi' k'eleyob weñ it'ojol jax jiñi x-ixik. Tsa' kaji isu'beñob ibä: «¿Bajche'to yom mi lak jisañ jiñi israelitajob che' weñ it'ojoltak jax jiñi x-ixikob ti jiñi tejklum bajche' ili x-ixik Judit? Weñ bäbäk'eñ jax, mi tsa' laj käyä juñtikil cha'tikil israelitajob, kome mi' kajel ilotinoñlaj cha'an mi' ijisañob pejtelel pañämil».
20Pejtelel jiñi xkäñtayajob icha'añ jiñi Holofernes yik'ot jiñi ñuktako'bä iye'tel tsa' lok'iyob majlel cha'añ mi' yochel ti t'añ jiñi Judit ya' baki añ ilejchempat jiñi Holofernes. 21Jiñi Holofernes woli ti k'aj oj ya' ti' wäyib ch'älbilbä ti k'äñlemanbä tak'iñ yik'ot ti chäkojambä pisil yik'ot ti xajlel yäx-elambä ti k'elol. 22Tsa' majliyob isu'beñob jiñi Holofernes cha'añ woli ipijtañ jiñi Judit. Che' jiñi, tsa' lok'i tilel itaj majlel, jiñi iyaj e'telbä icha'añ chukbil tilel icha'añob iyajñib k'äk'al melbilbä ti säsäk tak'iñ cha'añ mi' k'iñtañ ibijlel. 23Che' tsa' k'oti Judit ti' tojlel jiñi Holofernes yik'ot ti' tojlel jiñi x-e'telob icha'añ tsa' toj sajtiyob ipusik'al kome weñ it'ojol jax iwut. Jiñi Judit tsi' ñokchoko ibä ti' tojlel, ixku jiñi x-e'telob icha'añ Holofernes tsi' bäk' techeyob ch'ojyel.
Currently Selected:
Judit 10: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM