Matheyo 8

Olama wa namakokho

1Aakhuruwalaawe vamwaakoni, atthu ancipale yaamutthara Yoowo. 2Namakokho mmoha aamwaattamela Yoowo, anamukokhorela amweerelaka: “Apwiya, mwatthuna, munoowera okilamiha!” 3Yeesu aahookola moono ni aamutava, eeraka: “Kinootthuna. Mulamihiwe!” Woowaakuveya aalamihiwa makokhwaawe. 4Vahoolowaya Yeesu aamweerela: “Mwiiwe, muhaaleele iya akina, mene mwiixoonihere wa musaserdoti* ni mvahe sooveleela aaruminghaawe Moisesi, weera iyo sikhale onamoona wa yaawo.”

Nroromelo na kenturiyoni*

5Yeesu avolowaka oKafarnawu, aarowa wa Yoowo kenturiyoni* mmoha avekelaka ekhavihero, 6amweerelaka: “Apwiya murimeiyaaka ori owaani ahiweraka weetta ni moohaawaxani otokotoko.” 7Yeesu aamweerela: “Miyo nkirowe omulamiha.” 8Aamwaakhula kenturiyoni*: “Apwiya, nkiphwanenle owaakhelelani owannyaka. Muulumetho nsu nimoha paahi, ni murumeiyaaka anaalamihiwe. 9Vano, miyo kookhalano asitokweenaaka kimphwanelaaka owiiwelela. Ni kookhalanotho anakhotto ankiiwelela miyo. Kimmweerela mukina: ‘Orowe!’ ni onoorowa; ni wa mukina: ‘Owe!’ ni onimoowa. Kimmweerela murumeiyaaka: ‘Opake ela!’ ni onoopaka.” 10Woowiiwa seiyo, Yeesu aatikhina, ni aaweerela yaamutthara: “Kinooleelani ekhaikhai: nkimphwannye oYixrayeli mutthu orino nroromelo hiihaawo. 11Miyo kinooleelani weera animoowa atthu ancipale ninkhuma nsuwa ni ninkela nsuwa, ni anookilaathi vameesa vamoha ni Abrahaamu, Isaaki ni Yakobe moomweneni wa wiirimu. 12Yaawotho oororomelihiwa yeera yaakhele omwene, eniivonyeriwe vaate, mpiphini, weiwo onuukhale wiinla ni okhuuriha maino.” 13Yeesu aamweerela kenturiyoni*: “Murowe! Eniyeereiye hiiho ntoko muntthunaanyu.” Ehuhuweene yeele, murumeiyi ole aalamihiwa.

Ikuru sa Yeesu ni minepa soonanara ni iretta

14Yeesu avolowaka empa ya Pedru, aahaaphwanya apwiyamwaanaawe Pedru ereene vabeettini, evoreiwaka oviha wa erutthu. 15Aavaraka Yeesu ni ntatanaya, eretta ele yaamaala. Awo yaavenya ni yaapacera omurumeela Yeesu. 16Wiilalaaya, aawiiheriwa Yoowo atthu ancipale yaarino minepa soonanara, ni Owo aahoomola minepa iye ni nsu nimoha, nitho aahaalamiha aretta ootheene. 17Ti hiiho yaakwaniheriwaaya yeeyo yaahimmwale ni mprofeeti Yesaya: “Owo aakuxa irettasahu ni aathatela ikwereresahu.”

Ti woorika omutthara Yeesu

18Yeesu awoonaka atthu ancipale emurukurenreene, aahaalamulela weera elapuwele okhopela wa ephareiya. 19Vano namawera a nlamulo* mmoha aamwaattamela Yoowo, eeraka: “Muhusiha, miyo kinimoottharani weiwo muneeraanyu murowe.” 20Yeesu aamwaakhula: “Akhwatte aakhalano mapuro ankonaayamo, ni ipalame sa wiirimu sookhalano ipuurusaya, mene Mwaana a mutthu khakhalanne nipuro noowiitthuuwiha muru.” 21Oohusera mukina aamweerela: “Apwiya, mukihiye toko kaavithe atithaka.” 22Vano Yeesu aamweerela: “Mukitthare, ni muhiye mittembo sivithe mittembosaya.”

Yeesu ommaaliha ettheku

23Yeesu aavolowa munikulani, ni oohuseraawe yaamutthara. 24Wootutuxereya, yaapacera ettheku etokotoko mphareiyani, moota wooweera mitekuteku saapacera okhuneela nikula. Wa soothesene, Yeesu eera akonaka. 25Oohusera yaarowa omvenxa, ekhuwelaka: “Apwiya, munivuluxe! Nnooriheya!” 26Yeesu aahaakoha: “Heeni munoovaanyu vancipale, atthu a nroromelo vakhaani?” Vano aavenya, anahiiha epheyo ni ephareiya, ni yaamaaleleya vancipale. 27Axilopwana yaatikhinaxa ni yaakohana: “Taani Ola? Mpaka epheyo ni ephareiya omwiiwelela!”

Woopoliwa wa atthu eeli ni minepa soonanara

28Aphiyaka okhopela wa elapo ya oGadarene, atthu eeli yaarino minepa soonanara, ewaaka omahiyeni, yaarowa okumana ni Yoowo. Awo yaari oonanara moota wooweera khaawo aawera ovira ephiro ele. 29Vano awo yaakhuwela: “Mwaana a Muluku, muntthuna eheeni ni hiyo? Mwaaweenle va onihooxa ehinaaye ophiya ehuhuwaahu?” 30Vakhiviru ni vale aakukhuliwa nakupa a ikhumba sincipale. 31Minepa soonaanara saamudyoonttelela Yeesu: “Nyuwo mwaanoomolaka hiyo, munilamule weera hiyo nivolowe mukhumbani.” 32Yeesu aaweerela: “Mpwaheke!” Iyo saapwaha ni saavolowa mukhumbani. Vano nakupa ootheene aatthimaka akhuruwaka mwaako, amorelaka mphareiyani ni aamireya. 33Awo yaakukhula ikhumba yaatthimakela osidade ni yaathaliha sootheene seiye, nitho yeeyo yeereiye ni asilopwana eeli yaarino minepa soonanara. 34Atthu ootheene a esidade yaarowa okumana ni Yeesu. Emoonaka Yeesu, yaamudyoonttelela, ottimula mwa elapwaaya.

Currently Selected:

Matheyo 8: VMK2021

Highlight

Copy