Matheyo 7

Waathoriha akina

1Muhaathorihe akina weera nyuwo muhithorihiwe. 2Vano, mooteene yoowo munthorihaanyu, nyuwo munoothorihiwa, ni muringo mumvarelaanyu muteko, onoovareliwatho muteko wa nyuwo. 3Niwoko heeni mungwehaanyu ekokhola eri muniithoni na munninyu, mene khamunoona mukhukulu ori muniithonimwanyu? 4Mungwera hai omweerela munninyu: ‘mukihiye kivenxeke ekokhola eri muniithonimwanyu,’ nyuwo mureeneno mukhukulu muniithonimwanyu mwaneenaanyu? 5Namwiixeera! Muvenxe toko mukhukulu muniithonimwanyu, ni vahoolowaya munimoona nnenesene weera mvenxe ekokhola eri muniithoni mwa munninyu. 6Muhaavahe itthu sooreera alapwa, niwoko anoorukunuwa yoolumekeni. Muhivonyere itthu sooreera ikhumba, niwoko sinoonyikalasa.

Ovekela moota woovilela

7Muvekele, ni mmwivahiwe. Mwaasaase, ni mmwiphanye. Mmane nsele, ni mmwihuleliwe. 8Vano, ootheene amvekela, animwaakhela; ootheene anaasa, anoophwanya; ni wa yoole ommana nsele, anaahuleliwe. 9Taani a nyuwo, mwaninyu avekela yooca, onoomvaha nluku? 10Hoye hoye, avekela ehopa, onoomvaha enowa? 11Wakhala weera nyuwo mureene anamattheka moosuwela waavaha itthu sooreera anamwanaanyu, wootepaxa Atithinyu ari wiirimu eniyaavahe itthu sooreera yaawo anaavekela! 12Mwa soothesene, mwaapakele akina yeeyo muntthunaanyu weera yoopakeeni. Vano, ela ti ekwanihero ya malamulo ni maprofeeti.

Mulako woophureya ni mulako woothanuwa

13Muvolowe mulako woophureya, niwoko mulako woothanuwa ni ephiro yoothanuwa enrowa omooroni, ni ancipale ti yaawo amvolowa mwa yoowo. 14Mulakotho woophureya ni ephiro yoophureya enrowa wa okumi! Yaawo amphwanya, ari vakhaani.

Mwiri ni soowiimasaya

15Mwiipasoope ni maprofeeti oolokottha. Awo angwa wa nyuwo ewanreene ixapala sa ikhondoolo, mene mpuwa ari miici soolumaxa. 16Nyuwo mmwaasuwele ni soowiimasaya. Atthu anoowera orukula iwuuva* mwa nyiri sa nyiiwa, hoye hoye ifiigu mwa malaxi? 17Hiihotho nyiri sooreera sootheene siniima soowiima sooreera, mene nyiri soonanara siniima soowiima soonanara. 18Mwiri wooreera khooniima soowiima soonanara, naari mwiri woonanara soowiima sooreera. 19Nyiri sootheene sihiniima soowiima sooreera, sinoothikiliwa, ni sinoovonyeriwa omooroni. 20Hiihaawotho, nyuwo mmwaasuwele yaawo ni soowiimasaya. 21Khaahiyono ootheene ankeerela ‘Apwiya, Apwiya!’ eniivolowe moomweneni wa wiirimu, mene paahi yaawo ampaka otthuna wa Atithaka ari wiirimu. 22Ancipale eniikeerele nihuku nenno: ‘Apwiya, Apwiya, khanilaleiye mwa Nsinananyu? Ni mwa Nsinananyu khanoomonle minepa soonanara, ni khanipanke sootikhiniha sincipale? 23Vano Miyo nkaaleele nnenesene: “Nkinoosuweleni. Mususe wa Miyo, nyuwo mumpaka sootakhala.”

Namiruku ni mutthu oohileeleya

24Tivawo, yoowo oniiwa maswaaka yaala ni oniiwelela, ori ntoko namiruku otenke empaawe vamwala. 25Yaarupa epula, saasareya nyooloko, yaahoopa epheyo ni ikuru, emanaka empa ele, mene empa ele khayunttungwe, niwoko yaalipihiwa ni mwala. 26Vaheera yoowo oniiwa maswaaka yaala ni ahiiwelela, ori ntoko mutthu oohileeleya otenke empaawe vamuhaavani. 27Yaarupa epula, saasareya nyooloko, yaahoopa epheyo ni ikuru, emanaka empa ele, ni empa ele yaapittuwa, ni emorelowaaya yaari etokotoko.” 28Yeesu amalihaka ohima itthu iye, atthu yaatikhina ni oxuttihawawe, 29niwoko Owo aahaaxuttiha ntoko Mulopwana ookhalano ikuru, ohikhanle ntoko anamawera a nlamulo*.

Currently Selected:

Matheyo 7: VMK2021

Highlight

Copy