Matheyo 6
6
Waakhavihera oohaawa
1Mwiipasoope weera muhipake mitekosanyu sa ororomeleya mwaatthuni weera mooniwe ni atthu. Mwapaka seiyo, khamurwa mwaakhela ntthuvelo wa Atiithi ari wiirimu. 2Vano, mwaavahaka samahala, muhikhuweleleke yeeyo ni mapalapatta ntoko ampakaaya anamwiixeera muSinagogani* ni mmuseweni weera ettottopeliwe ni atthu. Kinoororomelihani weera awo ahaakhelela ntthuvelonaya nootheene. 3Mene nyuwo mwaavahaka yamahala, nihisuwele ntata na moono muthiyana yeeyo nimpakaaya na moono mulopwana, 4weera yamahalaanyu ekhale muxiirini. Atithinyu anoona yeeyo empakiwa muxiirini, eniyootthuveleni.
Nivekelo
5Nyuwo mwaavekelaka, muhikhale ntoko anamwiixeera. Awo antthuna ovekela yeemenleene muSinagogani* ni mapuro oowooneya, weera yooniweke ni atthu. Miyo kinooleelani vekhaikhai weera ahaakhelela ntthuvelonaya nootheene. 6Nyuwotho mwaavekelaka, murowe munkonaanyumo, mwawale mulako ni mwaavekele Atithinyu ari muxiirini. Vano, Atithinyu ari muxiirini eniyootthuveleni. 7Mwaavekelaka, muhitipure ntoko ampakaaya amalapo. Awo anuupuwela weera eniyiiwiwe niwoko na masu mancipale. 8Muhilikane ni yaawo, niwoko Atithinyu ansuwela yeeyo muntthunaanyu muhinaaye ovekela. 9Vanonto nyuwo muvekeleke ha: ‘Atithihu ari wiirimu, Nsinananyu ntteelihiwe, 10omwenaanyu orwe; otthunawanyu opakiwe vathi va, hiiho ntoko wiirimu. 11Munivahe yoocaahu ya khula nihuku. 12Munilevelele sootthekasahu ntoko nnaalevelelaahu yaawo annitthekela. 13Muhinihiye nivolowaka ngweereriwani, mene munivuluxe mwa soonanara.’ 14Mwaalevelela akina anootthekelani, Atithinyu ari wiirimu eniyoolevelelenitho nyuwo. 15Mwaahaalevelelatho akina, Atithinyu ari wiirimu kheerwa yoolevelelani.
Sa otthuka
16Mwaatthukaka, muhikhale ni ekhalelo yoothanana ntoko anamwiixeera, niwoko awo anooceendya ekhovaaya weera atthu akina ewoone weera aatthuka. Miyo kinooleelani vekhaikhai weera ahaakhelela ntthuvelonaya nootheene. 17Mwaatthukaka, muttikitthele makhura muruwaanyu ni musuusule, 18weera atthu ehisuwele weera nyuwo mootthuka, ehikhanle Atithinyu paahi anoona muxiirini. Atithinyu anoona muxiirini eniyootthuveleni.
Mihakhu sa wiirimu
19Muhithukumanye mihakhu sa elapo ya vathi annanarihaayawo atthumpwiha ni murawa, nitho weiwo anamwiiya amvolowaaya ni aniiyaaya. 20Muthukumanye toko mihakhusanyu wiirimu, weiwo ahinnanarihaayawo atthumpwiha ni murawa, ni weiwo anamwiiya ahimvolowaaya ni ahiniiyaayamo. 21Vano, sinkhalaayawo mihakhusanyu, murimaanyutho onuukhale weiwo. 22Maithwaanyu ti onyaari wa erutthu. Maithwaanyu yakhala ooreera, erutthwaanyu yootheene enoosareya waara. 23Maithwaanyu yakhala oonanara, erutthwaanyu yootheene enoosareya epiphi. Vano, waara ori mpuwamwanyu waari epiphi, epiphi ele eniikhale etokotoko! 24Khaawo angwera waarumeela asineene eeli, niwoko mmoha onoomuthanya ni mukina onoomusivela, naari oopacera onoomurumeela ni nthiti, mene anaaveeli onoomuramusa. Nyuwo khamungwera omurumeela Muluku nitho musurukhu.
Sookacamiha sa okumi
25Vano Miyo kinooleelani: muhiixeeteteele ni okumi: eheeni muneeraanyu muce; muwure, naari eheeni muneeraanyu ngwarihe erutthwaanyu. Khoohiyono okumi wootthuneyaxa opwaha yooca, ni erutthu yoopwaha ikuwo? 26Ngwehe ipalame sa wiirimu. Khasinaala, hata khasinghepha, naari khasinthata, wa soothesene, Atiithi ari wiirimu anoociha. Vano, nyuwo khamuhiyono ootthuneyaxa opwaha ipalame? 27Taani a nyuwo, iixeeteteelaka, anaawere waandyeerera ehuhu vakhaani okumaawe? 28Niwoko heeni muneeteteyaanyu ni ikuwo? Ngwehe moota sinunnuwaaya ithutu sa ntuphini. Seiyo khasimvara muteko, hata khasintthava. 29Wa soothesene, Miyo kinooleelani weera, naari Salomoni ni ovuwawawe wootheene, aawara ntoko emoha ya seiyo. 30Muluku awariha hiiha malaxi a ntuphini ari olelo ni omaalo anoovonyeriwa omooroni, Owo kharwa atepaxa woowarihani nyuwo, atthu a nroromelo vakhaani? 31Tivawo, muhiixeeteteele mweeraka: ‘nnice eheeni?’ hoye hoye ‘nniwure eheeni?’ naari ‘nniware eheeni?’ 32Amalapo ti yaawo anghaawano itthusene seiyo. Atiithitho a wiirimu ansuwela weera nyuwo muntthuna seiyo. 33Mwaasaase toko omwene wa Muluku ni opaka otthunawawe, ni itthu seiyo sootheene mmwivahiwe nyuwo. 34Tivawo, muhiixeeteteele ni omaalo, niwoko nihuku na omaalo nnikhaleno sooweeteteelasaya nneenaaya. Khula nihuku nookhalano soonanarasaya soowaatta.
Currently Selected:
Matheyo 6: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
