Matheyo 5

Sooreelihiwa

1Awoonaka atthu ancipale, Yeesu aawela vamwaakoni, anakilaathi. Oohuseraawe yaamwaattamela, 2ni Owo aapacera waaxuttiha, eeraka: 3“Ooreelihiwa ti yaale ansuwela omuhaawelawaya Muluku, niwoko omwene wa wiirimu ti wawaya. 4Ooreelihiwa ti yaale aniinla, niwoko eniimaalihiwe. 5Ooreelihiwa ti yaale aniiyeviha, niwoko eniiphwanye elapo ya vathi ntoko yoohiyeriwa*. 6Ooreelihiwa ti yaale anghaawelaxa weera yaakhuleliwe ni Muluku, niwoko eniivonihiwe. 7Ooreelihiwa ti yaale ammorela ikharari, niwoko eniimoreliwe ikharari. 8Ooreelihiwa ti yaale ari ootteela murima, niwoko eniimoone Muluku. 9Ooreelihiwa ti yaale ampaka murettele variyari wa atthu, niwoko eniyiitthaniwe anamwane a Muluku. 10Ooreelihiwa ti yaale ansoondiwa mwaha wa opaka otthuna wa Muluku, niwoko omwene wa wiirimu ti wawaya. 11Ooreelihiwa ti nyuwo akina yooruwanakani, yoosoondakani ni yaawuulumelakani soonanara ni soowootha niwoko na Miyo. 12Muhakalale ni musarihiwe ni ohakalala, niwoko ntthuvelonanyu nri ntokotoko wiirimu. Yaahaasoonda mooteene yoowo maprofeeti yaakhala muhinaaye nyuwo.

Maakha ni waara wa elapo ya vathi

13Nyuwo muri maakha a elapo ya vathi. Maakha yamala osivawaya, mmweelele hai weera esivetho? Khaamvareliwa etthu, ohikhanle ovonyeriwa vaate ni onyikaliwawo ni atthu. 14Nyuwo muri waara wa elapo ya vathi. Khoongwereya ovitha esidade eri vasulu vamwaako. 15Navetho khaawo ompattiha onyaari ni anapopheela vathi wa elaata. Ohiyanawaya, oniikaathi vanipuroni na nnene weera waamwaleele ootheene ari mpaani. 16Hiihotho mwaarihe waarawanyu ohoolo wa atthu, weera yooneke mitekosanyu sooreera ni yaavuwihe Atithinyu ari wiirimu.

Yeesu onkwanihera nlamulo

17Muhuupuwele weera kaaweenle omaliha nlamulo, hoye hoye maprofeeti. Nkiweenle omaliha, mene okwanihera seiyo. 18Kinooleelani ekhaikhai: wiirimu ni vathi onuumale, mene hata yooruma, naari nlepo nimoha na nlamulo na Muluku khanimala mpaka sineeraaya sikwaniheriwe soothesene. 19Ootheene ahiniiwelela yakhalaru a malamulo ala ni anaaxuttiha akina opaka moota mmoha, eniyiitthaniwe ooyevaxa moomweneni wa wiirimu. Vaheera ootheene aniiwelela ni anxuttiha malamulo ala, eniyiitthaniwe asitokweene moomweneni wa wiirimu. 20Vanonto kinooleelani weera opakawanyu otthuna wa Muluku waahipwahaxa wa aFarisi* ni anamawera a nlamulo*, khoongwereya hata vakhaani weera nyuwo muvolowe omwene wa wiirimu.

Wiiva

21Nyuwo mohiiwa yeeyo yaahimmwale ni makholowaanyu: ‘Muhiive; ni yoowo aniive, anaathorihiwe.’ 22Mene Miyo kinooleelani weera khula mutthu anaamunyoonyeriwe munneiye, anaathorihiwe. Nitho, akhalaru mutthu anaamuruwane munneiye, anaaronghiwe wa alipa oowuuluma milattu, ni akhalaru mutthu ommweerela munneiye: ‘naanepa!’ omphwanela orowa omooroni. 23Tivawo, nyuwo mooniheraka sooveleelasanyu valtaarini*, ni vaavaawo munuupuwelela weera munninyu ookhalano etthu mmurimani ni nyuwo, 24muhiye toko soovahasanyu vaavaawo valtaarini*, ni murowe weera mwiiraane ni munninyu. Vahoolowaya, muhokoleeleke ni moonihereke soovahasanyu. 25Mwiiwanane woowaakuveya ni mwiittanaanyu atthunaka wooronghani wa alipa oowuuluma milattu. Mpake yeeyo nyuwo nlelo murowaka wa yaawo, niwoko wavirikanawo onimooveleelani wa mphuki, ni mphuki onimooveleelani wa mpilixa, ni nyuwo munoovonyeriwa okaliposo. 26Kinoororomelihani weera nyuwo khamurwa mukhumamo muhinaaye oliva soothesene.

Oraruwa

27Nyuwo mohiiwa yeeyo yaahimmwale: ‘Muhiraruwe,’ 28mene Miyo kinooleelani: akhalaru mutthu oningwehexexa muthiyana amuhaawelaka, ooraruwano mmurimanimwawe. 29Niithonanyu na moono mulopwana nootthekihani, muzoole ni murihele vaate. Fataari oriha mpatta mmoha wa erutthwaanyu, ohikhanle weera erutthwaanyu yootheene eriheliwe omooroni. 30Ntatananyu na moono mulopwana nootthekihani, mukwitule ni murihele vaate. Fataari oriha mpatta mmoha wa erutthwaanyu, ohikhanle weera erutthwaanyu yootheene eriheliwe omooroni.

Omwalana

31Yaahimmwa: khula mulopwana anaamwalane ni mwaariye ontthuneya weera amvahe ekaratta ya omwalana. 32Mene Miyo kinooleelani weera khula mutthu anaamwalane ni mwaariye, ohikhanle mwaha wa oraruwa, onimukhaliha namararuwa. Vano yoowo onimuthela muthiyana omwalanne, onooraruwano.

Soolipela

33Nyuwo mohiiwatho yeeyo yaahimmwale ni makholowaanyu: ‘Muhihiye soolipelasanyu, mene mukwanihere seiyo nyuwo mulipenlaanyu vamaithoni wa Apwiya.’ 34Mene Miyo kinooleelani: muhilipeleru naari etthu – naari ni wiirimu, niwoko ti ehice ya Muluku; 35naari ni elapo ya vathi, niwoko ti yoonyikalelaawe ya inaawosawe; naari ni oYerusaleemu, niwoko ti esidade ya Mwene Mutokweene. 36Muhilipele ni muruwaanyu, niwoko khamungwera oceendya niihi nimoha weera nikhale nootteela, hoye hoye nooriipa. 37Mweera: “aani,” okhaleke “aani” ni mweera: “hoye,” okhaleke “hoye.” Sootheene simvira mwa yeeyo, siri sa mutakhali.

Muhiinlele ikukuttula

38Nyuwo mohiiwa yeeyo yaahimmwale: ‘Niitho wa niitho, ni niino wa niino.’ 39Mene Miyo kinooleelani: muhimwiinlele ikukuttula mutakhali. Yoowo anoomaneeni nrama na moono mulopwana, mmwinnyereretho nrama nikina. 40Akhala mukina anoorongheni wa alipa oowuuluma milattu weera ooruleeni mukaandyo, mumvahetho ekuwaanyu. 41Mukina anoonyesereriheni weetta ni yoowo vakhiviru, mweetteno ottaiwene. 42Mumvahe yoowo onoovekelani, ni muhimwiimane yoowo onoovekelani wooliha etthu.

Waasivela amwiittana

43Nyuwo mohiiwa yeeyo yaahimmwale: ‘Munsivele mukhwiinyu, ni munthanye mwiittanaanyu.’ 44Mene Miyo kinooleelani: mwaasivele amwiittanaanyu, ni mwaavekelele yaawo anoosoondani, 45weera nyuwo mukhale anamwane a Atithinyu ari wiirimu. Vano, Yaawo anaariha nsuwanaya nnaamwaleela oonanara murima ni ooreera murima, ni animwaarupihela epula oororomela ni oohiroromela. 46Nyuwo mwaasivela paahi yaale anoosivelani, ntthuvelo heeni muneeraanyu mwaakhele? Anamaliviha a musokotho ampaka yeeyo. 47Nyuwo mwawuulumiha paahi axunninyu – mumpaka eheeni yooreera waapwaha akina? Amalapo ampaka hiihaawotho! 48Tivawo, mukhale ookwanela, ntoko Atithinyu ari wiirimu.

Currently Selected:

Matheyo 5: VMK2021

Highlight

Copy