Matheyo 13

Yoolikanyiha ya namwaala

1Nihuku nenenenne Yeesu aavenya owaani ni aakilaathi mukerekhere wa ephareiya. 2Yaathukumana mukhwipimwawe atthu ancipale, moota wooweera Owo aavolowa munikulani ni aakilaathi atthu ootheene ereene mukhwipi mwemmwe. 3Vano Owo aahuuluma itthu sincipale ni soolikanyiha, eeraka: “Namwaala aarowa waala. 4Aalaka, mpatta wa mmiso waamorela mukerekhere wa ephiro, ni ipalame saahoowa ni saahooca. 5Mpatta mukina waamorela vamasorosoroni wahaakhanlewo etthaya yincipale, ni waamela woowaakuveya, niwoko etthaya yeeyo khayiixenre. 6Naakhumalaaya nsuwa, mmiso ole waamenle waahoosa ni waahuuma niwoko khawaarino mikwankhwaari. 7Mpatta mukina waamorela vanyiiwani, saahunnuwa ni saavuvura mmiso ole. 8Mukinatho waamorela vatthayani yooreera ni waavaha soohepha sooreera: mmiso mmoha soowiima imaara ncira, mmiso mukina soowiima imaara miloko mithannamosa, ni mukinatho imaara miloko miraru. 9Yoowo orino maaru, iiwe.” 10Oohusera yaamwaattamela ni yaamukoha: “Heeni Nyuwo munuulumaanyu ni atthu ni soolikanyiha?” 11Owo aahaakhula: “Wa nyuwo moovahiwa osuwela ixiiri sa omwene wa wiirimu, mene wa yaawo, naari. 12Yoowo okhalanne, onoovahiwatho, ni owo anaakhalane yincipale. Yoowo ohikhalanne, mpaka yeeyo orinaawe, enoovenxiwa. 13Niwoko na yeeyo Miyo kinimwaaleela ni soolikanyiha: ‘Niwoko yoonaka, khaanoonexexa, ni yiiwaka, khaniiwa, hata khaaniiwexexa.’ 14Mwa yaawo aakwaniheriwa masu a mprofeeti Yesaya owo eenraawe: ‘Nyuwo mahuku ootheene muneera mwiiwaka, mene khamurwa mwiiwexexa, mahuku ootheene muneera moonaka, mene khamurwa moonexexa.’ 15Vano mirima sa muloko ola saathatuwa soohipwattha, waakhalano maaru oolipa ni maitho ookhuneeleya. Wahaari hiihaawo, yaahereke woona ni maitho, wiiwa ni maaru, wiiwexexa ni murima ni orukunxa murima, ni Miyo kaamwaalamiha.’ 16Ooreelihiwatho ti maithwaanyu niwoko animoona, ni ooreelihiwa maaruwaanyu niwoko animwiiwa. 17Vano Miyo kinooleelani ekhaikhai: maprofeeti ni atthu oororomeleya ancipale yaatthunaxa woona yeeyo munoonaanyu, mene khayoonne. Awo yaatthunaxa wiiwa yeeyo muniiwaanyu, mene khayiiwale. 18Tivawo, mwiiwe etaphulelo ya yoolikanyiha ya namwaala: 19Mutthu iiwa mutthenga wa omwene ni aahiiwexexa mutthenga ole, mutakhali onimoowa ni onoomwaakha mmiso waaliwe mmurimanimwawe. Ola ti mmiso waaliwe mukerekhere wa ephiro. 20Mwaha wa mmiso ole waaliwe vamasorosoroni, owo ti yoole mutthu oniiwa masu ni woowaakuveya onaakhelela ni ohakalala. 21Wa soothesene, woonaka weera khanono mukwankhwaari mwaneenaawe, onoopwaherera ehuhu vakhaani paahi. Saakhumelelaka soohooxa, hoye hoye ottharatthariwa niwoko na masu ala, woowaakuveya onoohiya. 22Mwaha wa mmiso ole waaliwe vanyiiwani, owo ti mutthu yoole oniiwa masu, mene weeteteiya wa okumi ola ni olokottha wa opuha onimvuvura omutatuxaka oohiima. 23Woomalihera, mmiso ole waaliwe vatthayani yooreera, owo ti mutthu yoole oniiwa masu ni oniiwexexa. Onnavaha yoohepha: mmiso mmoha sinimwiima imaara ncira, mmiso mukina imaara miloko mithannamosa ni mukinatho imaara miloko miraru.”

Yoolikanyiha ya nakhwali

24Yeesu aahaathalihera yoolikanyiha ekina eeraka: “Omwene wa wiirimu ori ntoko mulopwana aanle mmiso wooreera mmattamwawe. 25Vaheera ootheene ekonaka, aahoorwa mwiittanaawe ni aamwaala nakhwaali variyari wa etrigu, ni aapwaha. 26Etrigu yaathapuruwaaya ni ekhalanaka nyiiwa, nakhwaalitho aamela. 27Anamiteko a muneene yaahoorwa wa yoowo ni yaaheera: ‘Khamwaanle mmiso wooreera mmattamwanyu? Vano, ongweela woowi nakhwali?’ 28Aawaakhula: ‘Mwiittanaaka opanke yeeyo.’ Anamiteko yaamukoha: ‘Apwiya, muntthuna weera nimuvenxe?’ 29Owo aawaakhula: ‘Hoye! Woomvenxa nakhwali, mmwivenxetho etrigu. 30Muhiye weera sunnuwe vamoha mpaka ehuhu ya ohepha. Vano, miyo nkiweerele anamahepha weera epacere omuukela nakhwali, emutthukaka irecesene weera sihisiwe. Vahoolowaya nkiweerele weera ethukumanye etrigu ni ethokorore vatathaniwaka.’”

Soolikanyiha sa enuku ya emostarda* ni sa eferementu

31Vano aahaathalihera yoolikanyiha ekina: “Omwene wa wiirimu ori ntoko enuku ya mwiri wa emostarda* mulopwana aakuxalaawe ni aanlaawe mmattamwawe. 32Erookhalaru ekhaaneene yoopwaha inuku sikina, yunnuwa, onookhala mwiri mutokotoko moota wooweera apalame animoowa ni ampaka ipuurusaya mphandinimwaya.” 33Aahaathaliheratho yoolikanyiha ekina: “Omwene wa wiirimu ori ntoko eferementu muthiyana aakuxalaawe ni aatakansenraawe ni ephepa yincipale mpaka yootheene enanyaruwa.” 34Yeesu aahima itthu sootheene seiya wa atthu ancipale ni soolikanyiha. Kheewo aahimaawe woohikhala ni yoolikanyiha, 35akwaniheraka hiiho yeeyo aaleeliwaawe ni mprofeeti: “Nkuulume ni soolikanyiha, nkihime itthu saavithiwe okhuma ephattuwelo ya elapo ya vathi.”

Etaphulelo ya yoolikanyiha ya nakhwali

36Vano Owo aahaahiya atthu ancipale ni aarowa owaani. Oohuseraawe yaamwaattamela Yoowo ni yaamweerela: “Munithalihere yoolikanyiha ya nakhwali mmatta.” 37Owo aawaakhula: “Owo aanle mmiso wooreera ti Mwaana a mutthu. 38Ematta ti elapo ya vathi, ni mmiso wooreera ti anamwane a omwene. Nakhwali ti anamwane a mutakhali. 39Mwiittana aamwaanle nakhwali ti Diyabu* . Ohepha ti emalihero ya ehuhu, ni anamahepha ti andyelo. 40Hiiho ntoko nakhwali onkuxiwaawe ni onghisiwaawe mmooroni, hiihotho eniyeereiye emalihero ya ehuhu. 41Mwaana a mutthu anaarumihe andyelowaawe, ni awo eniikhumihe sa omwenaawe sootheene sinaakwattula akina ni ootheene yaawo ampaka sootakhala. 42Awo eniyaavonyere mmooroni, weiwo oneeraaya okhale wiinla ni okhuuriha maino. 43Vano, atthu oororomeleya eniyaare ntoko nsuwa moomweneni wa Atithaya. Yoowo orino maaru, iiwe!

Soolikanyiha sa muhakhu ovithiwe ni sa nluku noowaaraxa

44Omwene wa wiirimu ori ntoko muhakhu woottittimiheyaxa ovithiwe mmatta. Mutthu mmoha aaphwannyaawe, aavitha emaara yanaaveeli, anarowa ni ohakalala anathumiha sootheene aarinaawe. Vano aathuma ematta ele. 45Omwene wa wiirimu ori ntoko nanakoso onaasaasa maluku oowaaraxa oottittimiheyaxa. 46Aphwanyaka nluku noowaaraxa noottittimiheyaxa, aarowa, anathumiha sootheene aarinaawe, anathuma nluku nne.

Yoolikanyiha ya ntthavi na nikoka

47Omwene wa wiirimu ori ntoko ntthavi na nikoka nimvonyeriwa mphareiyani ni nimvara moota woohiyanahiyana wa ihopa. 48Nisaraka, anamakoka anoopurula ntthavi mpaka mukerekhere wa ephareiya. Vano, anookilaathi ni anoothukumanya ihopa sooreera mmipaparani, mene anooriha seiyo soonanara. 49Hiiho eniyeereiye emalihero ya ehuhu. Andyelo animoowa ni eniyaamwalamwaxe anamatakhala ni oororomeleya. 50Eniyaavonyere anamatakhala mmooroni, weiwo oneeraaya okhale wiinla ni okhuuriha maino. 51Nyuwo mohiiwexexa itthu sootheene iya?” Awo yaamwaakhula: “Aani!” 52Owo aaweerela: “Tivawo namawera a nlamulo* ootheene ooxuttihiwa mwaha wa omwene wa wiirimu, onoolikana ntoko mwaneene a vaate onkhumiha mmuhakhunimwawe itthu sooreeraxa sinyowani ni itthu sa khalayi.”

Mprofeeti oohikhalano nttittimiho

53Amalihaka wuuluma soolikanyiha seiye, Yeesu aavenya vaavaale. 54Aphiyaka esidadaawe, aapacera oxuttiha muloko wa atthu muSinagogani*. Ootheene yaatikhina ni yaakohana: “Singweela woowi mirukusawe ni ikuru seiya sootikhiniheiya? 55Khahiyono Ola Mwaana a kalipinteiro? Khanihiyono nsina na amayawe ole Mariya? Axunneiye khahiyono Yakobe, Yoseefe, Simeyoni ni Yudasi? 56Khaakhanle vamoha ni hiyo axirokoriye ootheene? Woowi Ola ophwannyaawe itthu seiya?” 57Niwoko nenenenno awo yaamuhovela Yoowo. Yeesutho aaweerela: “Mprofeeti ori oottittimihiwa mapuro ootheene, ohikhanle elapwaawe ni vaatevawe.” 58Vano, khaapankewo sootikiniha sincipale niwoko na ohiroromelawaya.

Currently Selected:

Matheyo 13: VMK2021

Highlight

Copy