Yohaane 4

Yeesu ni muthiyana muSamariya

1aFarisi* yaahiiwa yeeriwaka weera Yeesu eera aapakaka ni aapatisaka oohusera ompwaha Yohaane, 2aari mweeraru ahikhanle Yeesu aapatisa, mene oohuseraawe. 3Vano, Apwiya yaasuwenlaaya yeeyo, yaavenya oYudeiya ni yaahokoleelatho oGalileiya. 4Waatthuneya weera avire oSamariya. 5Hiiho aaphiya esidade emoha ya oSamariya yiitthaniwa Sikari, vakhiviru wa elapo Yakobe aamvanghaawe mwanawe Yoseefe. 6Yaakhala weiwo ehime ya Yakobe. Yeesu akhulumungweene ni mukwahaawe, aakilaathi mukerekhere wa ehime. Yeeyo yeereiye nsuwa vamuru. 7Vano aahoowa muthiyana muSamariya orika maahi. Yeesu aamweerela: “Mukivahe maahi vakhaani.” 8Oohuseraawe yeera erongweene musidadeni othuma yooca. 9Muthiyana muSamariya aamukoha: “Heeni Nyuwo mureene muYuda munkivekelaanyu miyo, kireene muSamariya, maahi weera muwure?” Vano, aYuda khaaniiraana ni aSamariya. 10Yeesu aamwaakhula: “Nyuwo mwaasuwenle yamahala ya Muluku ni taani onoovekelani maahi, mwaamumvekela maahi ni Owo aamoovahani maahi a okumi.” 11Muthiyana aaweerela: “Apwiya khamunono yoorikela maahi ni ehime eri yoowiixera. Mmwiphwanye woowi maahi a okumi awo? 12Weeraka Nyuwo mutokweene waapwaha atithihu Yakobe yaanivanghe ehime mwa yeeyo awo aneenaaya aawura nitho anamwanaaya ni muhuwaaya?” 13Yeesu aamwaakhula: “Yoole ongwura maahi ala onoovoliwatho ntthona. 14Vaheera yoole ongwura maahi Miyo kinimvahaaka, kharwaru avoliwa ntthona. Ohiyanawaya, maahi kineeraaka kimvahe, eniithatuwe naattuuttu akhumiheraka maahi a okumi woohimala.” 15Muthiyana aamweerela: “Apwiya mukivahe maaheene yaawo weera miyo kihivoliwetho ntthona, hata kihihokoleele va orika maahi.” 16Owo aamweerela: “Murowe, mwawiitthane aiyinyu ni ngweke wenno.” 17Owo aamwaakhula: “Nkinono aiyaka.” Yeesu aamweerela: “Nyuwo moohima ekhaikhai mweeraka weera khamunono aiyinyu. 18Vekhakhai, mwaakhalano athanu ni mulopwana murinaanyu vaanaano, khahiyono aiyinyu. Yeeyo muhimmaanyu ti ya ekhaikhai.” 19Muthiyana aaweerela: “Apwiya kinoona weera muri Mprofeeti.” 20Makholowaahu yaalapela vamwaakoni ola, mene nyuwo aYuda muneera weera oYerusaleemu ti nipuro nintthuneya olapa.” 21Yeesu aahima: “Muroromele yeeyo kinooleelaakani muthiyana. Ehuhu yookhuveela nyuwo muneeraanyu muhaalapele Atiithi, hata vamwaakoni ola, hata oYerusaleemu. 22Nyuwo aSamariya munlapela yeeyo muhisuwenlaanyu, hiyo noosuwela yeeyo ninlapelaahu niwoko ovuluxiwa ongweela wa aYuda. 23Vanonto, eneera ephiyaka ehuhu, aani vekhaikhai yoophiya, eneeraaya anamalapela a ekhaikhai yaalapele Atiithi ni mMunepani Wootteela ni mweekhaikhaiyini. Ti anamalapa ntoko awo Atiithi angwaasaaya. 24Muluku ti Munepa ni ontthuneya weera anamalapelaawe emulapele mMunepani Wootteela ni mweekhaikhaiyini.” 25Muthiyana aamweerela: “Koosuwela weera Mesiya, iitthaniwa Kristu, aneera awaaka. Owo aawaaka, anaanithalihere hiyo sootheene.” 26Vano Yeesu aahima: “Miyo kinuuluma ni nyuwo ti Mesiya.”

Oohusera anghokolowa osidade

27Ehuhuweene yeele oohuseraawe yaahokolowa ni yaatikhina emphwanyaka Yeesu uulumaka ni muthiyana. Khaawotho aamukonghe: “Muntthuna osuwela eheeni?,” hoye hoye “Heeni onuulumaawe ni yoola?” 28Vano, ahiyaka mwaapwaawe, muthiyana aahokoleela osidade ni aaheerela muloko wa atthu: 29“Ngwe mmoone Mulopwana okileenle sootheene kipankaaka. Weeraka apaale ti Kristu?” 30Yaavenya musidadeni ni yaarowa wa Yoowo. 31Yeereiyaka hiiho, oohusera a Yeesu yannamunyeserera Yoowo yeeraka: “Muhusiha, muce etthu.” 32Mene Owo aaweerela: “Kookhalano yooca ekina nyuwo muhisuwenlaanyu.” 33Vano oohuseraawe yaaheerelana: “Weeraka ookhala mukina ongwiihenre yooca?” 34Yeesu aaweerela: “Yoocaaka ti opaka otthuna wa Yoowo okiruminghe ni omaliha mutekwaawe. 35Nyuwo khamuneera: ‘Soohala nyeeri mixexe mpaka ophiyera ehuhu ya ohepha?’ Miyo kinooleelani: muhule maitho ni moone imatta. Iyo siri soolikanaxa weera sihephiwe. 36Yoowo onghepha onaakhela ntthuvelonawe ni onghephela soowiima okumi woohimala moota wooweera yoole aanle nitho yoole onghepha anootteeliwa murima. 37Hiiho ti ekhaikhai miruku singhimaaya: ‘Mukina onaala ni mukina onghepha.’ 38Miyo koorumihaleni weera muhephe yeeyo muhilimmaanyu. Akina yannavaraxa muteko ni nyuwo munghepha soowiima sa mitekosaya.”

ASamariya ancipale animuroromela Yeesu

39ASamariya ancipale a esidade ele yaamuroromela Yoowo niwoko na onamoona onttharelana wa muthiyana: “Owo ookileela sootheene kipankaaka.” 40Hiiho emwaattamelaka Yeesu, aSamariya yaamunyesereriha weera akhale ni yaawo ni Owo aakhala mahuku meeli. 41Niwoko na maswaawe, akina ancipale yaamuroromela. 42Yaamweerela muthiyana: “Vano hiyo khaninroromela niwoko na maswaanyu paahi, mene niwoko noomwiiwa asineenaahu ni noosuwela weera Owo ti Mvuluxa a ekhaikhai a elapo ya vathi.”

Yeesu onimulamiha mwaana a namuteko mutokweene a mwene

43Woovira mahuku meeli ale, Yeesu aavenya arowaka oGalileiya. 44Yeesu muneenaawe aahaaleelaxa weera khawoworu mprofeeti ori oottittimihiwa mweelaponimwawe. 45Aphiyaka oGalileiya, aGalileiya yaamwaakhelela nnene. Awo yaahoona sootheene Owo aapankaawe oYerusaleemu wa ehuhu ya mPaska* niwoko yaaritho weiwo. 46Emaara ekinatho Owo aaxekura oKana oGalileiya, weiwo aatatunxaawe maahi eviinyu. Vano aakhala weiwo namuteko mutokweene mmoha a mwene, mwanawe aavoreiwa oKafarnawu. 47Iiwalaawe yeeriwaka weera Yeesu aari oGalileiya, awaaka oYudeiya, aamwaasa anamdyoonttelela weera arowe amulamihe mwanawe aahanle vakhaani okhwa. 48Yeesu aamweerela: “Nyuwo mwaahoona ineneero ni sootikhiniha, khamunroromela!” 49Namuteko mutokweene a mwene aaweerela: “Apwiya, ngwe, mwanaka ahinaaye okhwa.” 50Yeesu aamwaakhula: “Muroweke, mwaninyu onookhala ni okumi.” Mulopwana aaroromela masu a Yeesu ni aavenya. 51Areene nlelo mphironi, arumeiyaawe yaamukumanano ni ihaali weera mwanawe aari ni okumi. 52Aakohaka ewoora heeni mwanawe olammaawe, awo yaamwaakhula: “Eretta yaamvoreiya yaamuhiya osilo ewoora yanaathannapiili.” 53Vano atiithi yaasuwela weera yeeyo yaari ewoora emoharu aamuleenlaawe Yeesu: “Mwaninyu onookhala ni okumi.” Hiiho aamuroromela, nitho ootheene a vaatewawe. 54Eyo yaari eneneero yanaaveeli yootikhiniha Yeesu aapankaawe arwaaka oYudeiya arowaka oGalileiya.

Currently Selected:

Yohaane 4: VMK2021

Highlight

Copy