Yohaane 3

Yeesu ni Nikodemu

1Aakhala muFarisi* mmoha iitthaniwa Nikodemu, mutokweene mmoha a aYuda. 2Owo aahoowa wa Yeesu ohiyu eeraka: “Muhusiha, noosuwela weera Nyuwo Muhusiha ongwa wa Muluku, niwoko khaawo ongwera opaka ineneero sootikhiniheya Nyuwo mumpakaanyu, Muluku ahikhanle ni yoowo.” 3Yeesu aamwaakhula: “Kinooleelani ekhakhai: khaawo ongwera woona omwene wa Muluku owo ahiyariwetho wa osulu.” 4Nikodemu aamukoha: “Ongwereya hai mukina oyariwa areene namuuluvala? Vekhaikhai khangwera ovolowatho mmirimani mwa amayawe ni ayariwetho!” 5Yeesu aamwaakhula: “Kinooleelani ekhaikhai: khaawo ongwera ovolowa moomweneni wa Muluku owo ahiyariwe wa maahi ni wa Munepa. 6Yaawo angyariwa wa erutthu ti a mweerutthuni, ni yaawo angyariwa wa Munepa ti a mmunepani. 7Muhitikhine niwoko kooleenlaakani ontthuneya weera muyariwe veeli. 8Epheyo enoopela weiwo entthunaayawo. Nyuwo munimwiiwa, mene khamungwera ohima enkhumaaya, naari enkelaaya. Hiihotho enkhumelela ni ootheene ooyariwa wa Munepa.” 9Nikodemu aamukoha: “Ongwereya hai hiiho?” 10Yeesu aamweerela: “Nyuwo muhusiha a oYixrayeli ni khamuniiwexexa itthu iya? 11Kinoororomelihani weera hiyo ninuuluma sa yeeyo ninsuwelaahu ni ninkhalela onamoona sa yeeyo nnoonaahu, hata hiihotho, mulokwaanyu khoonaakhulela onamoonaahu. 12Miyo kohooleelani itthu sa vathi ni khamuroromenle. Mmwiroromele hai Miyo kooleelani itthu sa wiirimu? 13Khaawo owenle wiirimu, ahikhanle Yoole owiiye wiirimu, eyo tiiyo Mwaana a mutthu. 14Mooteene yoowo Moisesi eemenxaawe enowa munikareni, hiihotho ontthuneya weera Mwaana a mutthu akhale oowelihiwa 15weera ootheene animuroromela Yoowo, ekhalane okumi woohimala. 16Vano Muluku aasivela elapo ya vathi moota wooweera aamvahalaawe Mwanawe mmoharu weera atthu ootheene animuroromela Yoowo kheeriheya, mene anookhalano okumi woohimala. 17Muluku khaamurumihenle Mwanawe mweelaponi ya vathi weera athorihe, mene weera elapo evuluxiwe ni Yoowo. 18Yoowo onimuroromela khanthorihiwa, mene yoowo ohinimuroromela, oothorihiwa niwoko na ohiroromela mwa Nsina na Mwaana mmoharu a Muluku. 19Nthorihelo ti nna: waara wohoowa vathi, mene atthu yaasivela epiphi ohiya waara niwoko mitekosaya saari soonanara. 20Yoowo ompaka soonanara, onthanya waara. Owo khanaattamela waara oovaka weera mitekosawe nsisuweliwe. 21Vano yoowo ompaka ekhakhai, onimwaattamela waara weera mitekosawe sooneiye mwaatthuni ntoko soopakiwa ni Muluku.”

Okhalela onamoona wa Yohaane mpatisa

22Vahoolowaya, Yeesu aarowa ni oohuseraawe wa elapo ya oYudeiya ni weiwo aakhala ehuhu vakhaani vamoha ni yaawo nitho aapatisa. 23Yohaanetho eera apatisaka wAinooni, vakhiviru wa oSalimi niwoko weiwo yaahaatta maahi ni muloko wa atthu wannarowa weera opatisiwe. 24Eyo yaakhumelenle ahinaaye Yohaane otthukiwa. 25Waahaakhulaniwa akina oohusera a Yohaane ni muYuda mukina mwaha wa ekhovelelo ya orapiha. 26Awo yaarowa wa Yohaane ni yaamweerela: “Muhusiha, Mulopwana Owo aari ni nyuwo okhopela wa Yordanu, mwa Yoole mwaamukhalenlaanyu onamoona, ompatisa ni ootheene anrowa wa Yoowo.” 27Yohaane aawaakhula: “Mutthu ongwera waakhela paahi yeeyo omvahiwaawe wiirimu. 28Nyuwo asineenaanyu muri anamoona a yeeyo kaahimmaaka: ‘Miyo nkihiyono Kristu, mene aani kiri yoole orumihiwe vahoolowawe.’ 29Namatthomeriwa ori a namatthomera. Nthamwene onimurumeela namatthomera oningweherera ni onimwiiwelela ni iiwaka nsu na namatthomera onoohakalalaxa. Wu ti ohakalalawaka ni vano wookwaniheriwa. 30Ontthuneya weera Owo akhale oottittimiheyaxa ni miyo ooyevaxa. 31Yoole onrweela osulu ori Mutokweene a ootheene. Yoole onrweela wa vathi ori a vathi ni onuuluma ntoko mutthu a vathi. Yoole onrweela wiirimu ori Mutokweene a ootheene. 32Owo onkhalela onamoona yeeyo oonnaawe ni iiwalaawe, mene khaawo anaakhulela onamoonaawe. 33Yoole onaakhulela, onaakhuleliha weera Muluku ti a ekhaikhai. 34Vano, Yoole Muluku omurummaawe, onuuluma masu a Muluku niwoko Owo onnavaha Munepa moota woohikhalano mwiinaano. 35Atiithi animusivela Mwaana ni aamwinnyerera sootheene mmatatanimwawe. 36Yoowo onimuroromela Mwaana, ookhalano okumi woohimala. Vaheera yoowo onimukhootta Mwaana, kharwa oona okumi, mene isara sa Muluku sinkhala ni yoowo.”

Currently Selected:

Yohaane 3: VMK2021

Highlight

Copy