Yohaane 21

Yeesu ni okoka wootikhiniheiya

1Vahoolowaya Yeesu aahiixooniheratho wa oohuseraawe mukerekhere wa ephareiya ya oTiberiyade. 2Yaakhumelenle ha: Aari weiwe Simeyoni Pedru, Tomaxi (iitthaniwa maphapo), Nathaneyeli a oKaana oGalileiya, anamwane a Zebedeyo ni oohusera eeli akina. 3Simeyoni Pedru aaweerela: “Kinkela okoka.” Awo yaaheera: “Hiyo ninrowa ni weyo.” Vano yaavenya, enavolowa munikulani, mene ohiyuweene yoole, khayaaphwannye etthu. 4Oxaaka, Yeesu aari mukerekhere wa ephareiya, oohuseratho khayaamusuwenle. 5Owo aahaakoha: “Anamwane, nyuwo mookhalano etthu ya oca?” Awo yaamwaakhula: “Hoye” 6Owo aaweerela: “Muvonyere ntthavi moonowaanyu mulopwana ni mmwiphwanye.” Yaapaka hiiho, ni khayaawenre opurula ntthavi niwoko na ihopa soowaatta. 7Oohusera aamusivelaawe Yeesu aamweerela Pedru: “Ti Apwiya!” Simeyoni Pedru, amwiiwaka ahimaka yeeyo, aawara mukaandyowawe, niwoko aaroorula, anakhumbwela mphareiyani. 8Oohusera akina yaatthara ni nikula epurulaka ntthavi noosareya ni ihopa niwoko yaari vakhiviru wa mukerekhere, wookwanaka imeetru* miloko mithanniixexe. 9Ekhuruwaka yaahoona mooro ni makhala ooviha ni ihopa vayikho vaavaale nitho ipaawu sikina. 10Yeesu aaweerela: “Mukiruuheleke ihopa sikina mphwannyaanyu vaanaano va.” 11Simeyoni Pedru aavolowa munikulani, anapurulela ntthavi mukerekhere wa ephareiya. Nne naasareya ni ihopa sitokweene 153. Saarookhalaru ihopa sincipale ntthavi khanaahungwe. 12Yeesu aaweerela: “Ngweeke, muceeke.” Khaawo oohusera mmoha uumihale murima weera amukohe: ‘Nyuwo taani?’ Awo yaasuwela weera ti Apwiya. 13Yeesu aawaattamela, anakuxa ipaawu, anaavaha, apakaka hiihotho ni ihopa. 14Eyo yaari emaara yanaararu Yeesu iixoonihenraawe wa oohuseraawe vahoolo wa ovenyerera mookhwaani.

Yeesu ni Pedru

15Emalihaka oca, Yeesu aamukoha Pedru: “Simeyoni, mwaana a Yohaane, munookisivela waapwaha ala?” Owo aamweerela: “Aani Apwiya, moosuwela weera kinnoosivelani.” Yeesu aamweerela: “Muciheke iputtiputthisaka. 16Yeesu aamukoha veeli: “Simeyoni, mwaana a Yohaane, munookisivela?” Owo aamwaakhula: “Aani Apwiya, moosuwela weera kinnoosivelani.” Yeesu aamweerela: “Mukukhule ikhondoolosaka.” 17Emaara yanaararu Yeesu aamukoha: “Simeyoni, mwaana a Yohaane, munookisivela?” Pedru aathanana niwoko na omukoha Yeesu emaara yanaararu:‘nyuwo munookisivela?’ ni aamwaakhula: “Apwiya, moosuwela itthu sootheene ni moosuwela weera kinnoosivelani.” Yeesu aamweerela: “Muciheke ikhondoolosaka. 18Kinooleelani ekhaikhai: Mwaaraanyu mmiravo, mwaangwarela ni mwaanrowa weiwo mwaatthunaanyu, mene muuluvalaka, mmweemexe matataanyu ni mutthu mukina anoowariheni ni anookuxeeni ooronghakani weiwo muhinghaawelaanyu.” 19Yeesu aahima yeeyo weera amoonihere ni moota heeni wa okhwa Pedru eeraawe amvuwihe Muluku. Vano aamweerela: “Mukitthare!” 20Pedru aarukunuwa ni aamoona weera oohusera Yeesu aamusivelaawe eera aattharaka. Owo aari yoole aamuuramenle Yeesu wa ehuhu yaacaaya efesta ya mPaska* amukohaka: ‘Apwiya taani aneera oovariheni.’ 21Amoonaka yoowo, Pedru aamukoha Yeesu: “Apwiya ankha ola?” 22Yeesu aamwaakhula: “Miyo kaatthuna weera owo akhale ni okumi mpaka kineeraaka kihokolowe, eheeni mumpwatthaanyu? Mukitthareke nyuwo.” 23Tivawo yiiwanyeyaaya masu weera oohusera owo kharwa akhwa. Yeesutho kheenre weera owo kharwa akhwa. Eenre paahi: “Miyo kaatthuna weera owo akhale ni okumi mpaka kineeraaka kihokolowe, eheeni mumpwatthaanyu?” 24Owo oohusera onkhalela onamoona itthu iya ni olempe seiya. Noosuwela weera onamoonaawe ti wa ekhaikhai. 25Ohiya toko yeeyo, Yeesu aapaka itthu sikina sincipale. Sootheene sa seiyo saalempwale, kinuupuwela weera hata mweelaponi ya vathi yootheene saano ehikhanle mapuro oowaatta wa ilivuru seera silempwe.

Currently Selected:

Yohaane 21: VMK2021

Highlight

Copy