Yohaane 20

Ovenyerera

1Wa nihuku noopacera na esimana, oyaaka ni oxa, nlelo ereene epiphi, Mariya oMagadalene aaphiya onikhukuni ni aahoona weera nluku ntokotoko na vamulako naakakhiwa. 2Vano, aamutthimakela Simeyoni Pedru ni oohusera mukina, yoole Yeesu aamusivelaawe, anaweerela: “Ahaakhumiha Apwiya munikhukuni ni khanisuwenle awiikaathiyaayawo.” 3Pedru ni oohusera mukina yaavenya erowaka onikhukuni. 4Ooweeli yaatthimaka, mene oohusera mukina aatepa otthimaka ni aapacera ophiya onikhukuni. 5Owo aahuurama ni aawehexexa munikhukuni. Aahoona esaanda mwemmwe, mene khaavolongwe. 6Vattuliwawe Simeyoni Pedru aamutthara, anaphiya, anavolowa munikhukuni ni ahoona esaanda 7nitho ekuwo yaatthukiwaaya mmuru mwa Yeesu. Eyo yaari yoopindiwa mpattaaya emwalamwalihiweene esaanda. 8Vahoolowaya oohusera mukina aapacenre ophiya onikhukuni aavolowatho. Owo aahoona ni aaroromela. 9Awo nlelo khayiiwexexa weera, ntoko yeenraaya Yoolempwa*, waatthuneya Yeesu ovenyerera mookhwaani.

Yeesu oniixoonihera wa Mariya oMagadalene

10Hiiho oohusera yaahokoleela owaani, 11mene Mariya aahala vamulako wa nikhuku, iinlaka. Iinlaka hiihaale, aahuurama weera awehexexe mpuwa 12ni aawoona andyelo eeli ewanreene sootteela ni ekilaantheene vaavaawo waaraayawo muttembo wa Yeesu, mmoha waamuru ni mukina waametto. 13Awo yaamukoha: “Muthiyana, heeni muniinlaanyu?” Owo aawaakhula: “Ahaakuxa Apwiyaaka ni nkisuwenle awiikaathiyaayawo.” 14Wa yeeyo, aarukunuwa ni aamoona Yeesu vaavaale, mene khaamusuwenle. 15Yeesu aamweerela: “Muthiyana, heeni nyuwo muniinlaanyu?” Mummwaasa taani?” Uupuwelaka weera aari mwaneene a nttimbe, owo aamweerela: “Nyuwo mwaakuxaleene, mukileele nipuro mwiikaathiyaanyu ni miyo kinookuxa.” 16Yeesu aamweerela: “Mariya!” Vano, amurukunuwelaka, owo aakhuwela vaHeberi: “Rabuni!’” entaphulela: ‘Muhusiha.’ 17Yeesu aamweerela: “Muhikivarele niwoko nlelo nkinaaye waahokoleela Atithaka. Murowe toko wa axunnaka ni mwaaleele weera Miyo kinghokoleela wa Atithaka ni Atithinyu ni wa Mulukwaaka ni Mulukwaanyu.” 18Mariya oMagadalene aarowa ni aahaalaleera oohusera: “Koowoona Apwiya!” Ni aahaathalihera yeeyo Owo aamuleenlaawe.

Yeesu oniixoonihera wa oohusera

19Wiilaka nihuku nenne noopacera na esimana ni ethukumanneene oohusera mpaani ni milako soowaliweene niwoko na owoova aYuda, Yeesu aavolowa, aakhala eriyaraaya, anaweerela: “Murettele okhale ni nyuwo.” 20Ahimaka yeeyo, aawoonihera matataawe ni nipararinawe. Oohusera yaahakalalaxa ewoonakaru Apwiya. 21Yeesu aaweerela veeli: “Murettele okhale ni nyuwo. Ntoko Atiithi akirumihale, hiihotho Miyo kinimoorumihani.” 22Wa yeeyo, aawiiseelela yaawo, anaweerela: “Mwaakhele Munepa Wootteela. 23Nyuwo mwalevelela soottheka sa mukina, anaaleveleliwe; mwaahilevelela soottheka sa mukina, khanleveleliwa sootthekasawe.”

Yeesu oniixoonihera wa Tomaxi

24Tomaxi, iitthaniwa maphapo, mmoha a muloko neeli, khaakhanle vamoha ni oohusera aaphiyalaawe Yeesu. 25Oohusera akina yaamweerela: “Nowoona Apwiya!” Mene owo aaweerela: “Miyo kaahoona ineneero sa misomaari mmatatanimwaya, kaahivoleiha ekathaaka mwemmo saaraaya misomaari ni kaahivoleiha ntatanaka mpararinimwaya, nkinroromela.” 26Yaaviralaaya esimana emoha, oohuseraawe yaaritho vaavaale ni Tomaxi vamoha ni yaawo. Saarookhalaru milako soowaliwasene, Yeesu aavolowa, aaheemela eriyaraaya, anaweerela: “Murettele okhale ni nyuwo.” 27Vano aamweerela Tomaxi: “Muvoleihe ekathaanyu; moone matataaka. Mookole moonowaanyu ni muvoleihe ntata mpararinimwaka. Muhihovele – muroromele!” 28Tomaxi aamweerela: “Apwiyaaka ni Mulukwaaka!” 29Vano Yeesu aamweerela: “Munroromela niwoko mukoonnaanyu? Ooreelihiwa ti yaawo ahikoonne enaroromelatho.” 30Yeesu aapaka variyari wa oohuseraawe ineneero sikina sootikhiniheya sincipale sihilempwe mulivuruni ela. 31Iyatho silempwe weera nyuwo muroromele weera Yeesu ti Kristu, Mwaana a Muluku ni muroromelaka mukhalane okumi mwa Nsinanawe.

Currently Selected:

Yohaane 20: VMK2021

Highlight

Copy