Yohaane 19

Yeesu onthoriheliwa othomeiwa

1Pilatu aamukuxa Yeesu ni aahaalamulela weera engwaxule. 2Anakhotto yaatthava ecireemba ya nyiiwa ni yaangwariha mmurumwawe. Yaangwariha mukaandyo wooxeera 3ni emwaattamelaka Yoowo yaamweerela: “Salaama, Mwene a aYuda!” Yannammana owiitho. 4Emaara ekinatho Pilatu aavenya arowaka wa aYuda ni aaweerela: “Mmoone, miyo kinooruuhelani Yoowo weera musuwele weera miyo nkinoona hata nthowa nimoha na omoothera Yoowo.” 5Yeesu akhumelaka vaate awanreene ecireemba ya nyiiwa ni mukaandyo wooxeera, Pilatu aaweerela: “Mmoone, Mutthu Ola.” 6Emoonaka ahooleli a asaserdoti* ni anamalipelela, yaakhuwela: “Munkhomele, munkhomele!” Pilatutho aawaakhula: “Nyuwo munkuxeke ni munkhomele! Wa miyo, nkimphwanya nthowa na omoothera Yoowo.” 7aYuda yaanyeserera: “Nookhalano nlamulo ni nlamulo nna ninnyeserera weera Owo akhwe niwoko aahiixeerela: ‘Mwaana a Muluku.’” 8Iiwaka hiiho, Pilatu aatepa woova 9ni aavolowatho mpaani etokotoko. Vano aamukoha Yeesu: “Nyuwo munkhumelela woowi?” Mene Yeesu khaamwaakhunle. 10Pilatu aamweerela: “Nyuwo munkhootta wuuluma ni miyo? Khamusuwenle weera kookhalano ikuru soowootaphulani, hoye hoye soowookhomelani?” 11Yeesu aamwaakhula: “Nyuwo khamwaakhalano hata vakhaani ikuru ni Miyo mwahaavahiwe ikuru iyo wa wiirimu. Tivawo yoole okivaherenre wa nyuwo ookhalano nthowa na yoottheka yoowoopwahani nyuwo.” 12Evenyero vaavaale Pilatu aatthuna omtaphula Yeesu, mene aYuda yannakhuwela: “Mwamutaphula Mulopwana Ola, khamuhiyono nthamwenaawe Seesari. Yoowo oniixeerela Mwene, ori mwiittana a Seesari.” 13Iiwalaawe yeeyo, Pilatu aamukhumihera Yeesu vaate ni aakilaathi vahiceni ya othoriha, vanipuroni noosuwanyeya ntoko ‘noothatiwa maluku’ ni niitthaniwa vaHeberi ‘Gabata.’ 14Naari nihuku na oreherera wa esimana ya mPaska* niphiyeraka nsuwa vamuru. Pilatu aaweerela aYuda: “Mmoone, Mwenaanyu!” 15Vano awosa yannakhuwela: “Mmwiive, mmwiive, munkhomele!” Pilatu aahaakoha: “Kinkhomeleke mwenaanyu?” Ahooleli a asaserdoti* yaamwaakhula: “Khaninono mwene, ahikhanle Seesari.” 16Ommaleloni Pilatu aahaavaherera Yeesu weera emukhomele. Vano anakhotto yaamukuxa Yeesu.

Okhomeliwa

17Athatelaka muttandaawe Owo aarowa vanipuroni niitthaniwa Nikarakasa (nneeriwa vaHeberi Gologota). 18Vaavaale yaamukhomela ni vamoha ni Yoowo eeli akina, mmoha moono mulopwana, mukina muthiyana, ni Yeesu eriyari. 19Pilatu aarumiha oreherera etthaabwa ekhaaneene weera eheliwe vasulu wa muttanda ni yoolempwa ela: “YEESU A ONASARETE, MWENE A AYUDA.” 20aYuda ancipale yaasoma yoolempwa ele neenre nipuro aakhomeliwaawe Yeesu nakhalaka vakhiviru wa esidade ni yoolempwa yaalempwale ni vaHeberi, vaRooma ni vaGrego. 21Ahooleli a asaserdoti* a aYuda yaamvaanyiha Pilatu yeeraka: “Muhilepe ‘Mwene a aYuda,’ mene weera Mulopwana Ola iixeerela ‘Mwene a aYuda.’” 22Pilatu aawaakhula: “Yeeyo kilempaaka, koolepa.” 23Emukhomelaka Yeesu, anakhotto yaakuxa ikuwosawe ni yaakawana mipatta mixexe, mpatta mmoha wa khula mutthu. Yaakuxatho mukaandyo. Ole waari woohittotthiwa, waamalela otthaviwa okhuma vasulu mpaka vathi ni ekuwo emoha paahi. 24Awo yaaheerelana: “Nihaahule. Nrowe nipake macitta weera nimoone mutthu taani onrowa ovahiwa.” Eyo yeereenle weera ekwaniheriwe yoolempwa eneera: ‘Yaakawana ikuwosaka yaaworu ni yaapakela macitta wa soowarasaka.’ Eyo anakhotto ti yaapanke. 25Vakhiviru wa muttanda wa Yeesu yaari amayawe, munnaya, Mariya mwaariye Keloopa ni Mariya oMagadalene. 26Awoonaka Yeesu amayawe vaavaale ni vakhiviruwaya oohusera aamusivelaawe, aaweerela amayawe: “Mwaninyu ori vawo” 27ni wa oohusera: “Ari vawo amayinyu.” Evenyero vaavaale, oohusera ole aawaakhela owannyawe.

Okhwa wa Yeesu

28Vahoolowaya, asuwelaka weera sootheene saamaliheriwa ni weera ekwaniheriwe Yoolempwa*, Yeesu aaheera: “Okivola ntthona.” 29Waakhala vaavaale mwaapu woosareya eviinyu yoonyuunya. Vano yaaruweya nttapwatta mwemmo, enatthukelela okhwipi wa mutathi wa hisopo* enamuronghela mpaka owanoniwawe. 30Awurakaru, Yeesu aaheera: “Sookwaniheriwa.” Wa yeeyo, ahuuramiha muru ni aaveleela munepaawe. 31Nne naari nihuku nooreherera ni oxaawaya waarowa okhala eSaabadu, nihuku nimoha noottittimiheyaxa. aYuda khayaatthuna weera mittembo sikhale vamittandani eSaabadu. Tivawo, yaamvekenlaaya Pilatu weera aalamulele anakhotto owiintaka nyettosaya ni sivenxiwe mittembo vamittandani. 32Yaahoowa anakhotto ni yaahiintaka nyetto sa mulopwana oopacera aakhomeliwe ni Yeesu ni vahoolowaya sa mukinatho. 33Ephiyakarutho wa Yeesu ni yoonaka weera aahookhwa, awo khayiintanke nyettosawe. 34Ohiya yeeyo, nakhotto mmoha aamuhoma mpararinimwawe ni nivakanawe ni woowaakuveya yaakhuma ephome ni maahi. 35Yoole oonne yeeyo, aakhalela onamoona ni onamoonaawe ti wa ekhaikhai. Owo onsuwela weera onghima ya ekhaihai ni onkhalela onamoona weera nyuwotho muroromele. 36Itthu iye seereenle weera ekwaniheriwe Yoolempwa*: “Khaniwowo naari nikhuvanawe nimoha nneera nintakiwe.” 37Ni ntoko ehimmaaya Yoolempwa* nipuro nikina: “Awo eniimoone Yoole yaamuhommaaya.”

Ovithiwa wa Yeesu

38Vahoolowaya Yoseefe a wAramiteiya aamvekela Pilatu muttembo wa Yeesu. Yoseefe aari oohusera a Yeesu, mene a muxiirini niwoko aangwoova aYuda. Aahoowa ni etthunihero ya Pilatu, anakuxa muttembo, anarowano. 39Owo aahooliwa ni Nikodemu, yoole aamuxekunre Yeesu ohiyu. Nikodemu aakuxa sookwanaka ikiilu* miloko miraru niixexe sa makhura ootakanseriwa emira* ni alowe*. 40Ekuxaka muttembo wa Yeesu, ooweeli yaavitikelela esaanda ettikitthelaka makhura oowunkhelaxa ntoko yaaraaya ekhovelelowaaya ya mariro a aYuda. 41Vanipuroni aathomeiwaawe Yeesu naakhala nttimbe ni munttimbeni mmwe naakhalatho nikhuku nnyowani weiwo ahaatonkwaawe ovithiwaawo mutthu. 42Woonaka weera naari nihuku nooreherera wa aYuda ni weera nikhuku naari vakhiviru, yaamvitha mwemmo.

Currently Selected:

Yohaane 19: VMK2021

Highlight

Copy