Arumi 7

Nyinkhori ufuma uroghoe

1Mutimanyiena vaunaane mwino ngurëghëtya navasaa nëvëmëmanyie seria mwino seria ëmutungëëre muntu mu uduvi uruu gutufu? 2Uvii mukhema nëwina mughosya utungiwe na seria kunë mughosya wasuu itungo nëëkëë mufanga, ëgweeso në mughosya wasuu wakuya, watungwëërwaa seria ësëë a mughosya. 3Uvii itungo në mughosya wakwe mufanga, nësa wina mughosya ungëja ugutaanwa mulehadi. Ëgweeso në mughosya wakwe wakuya, watendaa wëë muuhaghaaro, atitungiwe na seria ëyoo, mbesa mweeso ti mulehadi, nëmbaa aroghowe na mughosya ungëja. 4Uvii uvii, vaunaanë, nyeenoo noo mwamëkuiye seria, gwa njëa a mwëërë wamwa Kiristo, mudahe utendeka mwëë mari amwa ungeja, mweeso nëagafëtya ufuma gwa akuyi, gudahe umudwëëya Muungu nkhari. 5Gusoko nënaa gwëë mu mwëërë, nkumbu ya mahutye, nënaa ërëfo gusoko a seria, ëgatenda mwëmo mu mëërë itu faka gugarëdwëëya ikuya nkhari. 6Uvii itungwee gwatungwëërwe mu seria, gwarëkuëye rasëë nënaa rëugufëngaa, gusoko sese gudahe utumama mu ufya wa nkhoo, ti uhonga ntende ëyoo akhae, a rëandëko.

Seria na ihutye

7Uvii, guhanye wurëhe? Seria unë ihutyena? Ti uvii mbanduvë! Ëgweeso naantiudaha urëmanya ihutye ëgweeso gwa seria gusoko naantiumanya uhuunukwa nësa seria inahanyaa, “Utahuunukwee.” 8Ëgweeso ihutye rëgahanga iyoma gwa iraghëëyo rësëë, ëgatenda mukhatë anë, ihuunukwa ra hiya hiya. Gusoko ihutye në seria ëtifo rëkure. 9Neenoo naa nëëmufanga afoo mwandyo nënaa seria ëtifo, ëgweeso nënaa iraghëëyo rasëë raja, ihutye rëgafëtya, nanee ngakuya.

10Ngoona iraghëëyo rasëë nërëgweetaa ufanga kunë nene rëgëëta ikuya. 11Gusoko ihutye gwa uhanga iyoma gwa iraghëëyo rasëë, rëgankhonga, na gwa uvii rëgamburagha. 12Uvii seria unë njeru, na iraghëëyo rasëë unë ryeru, na ra tutë na ija. 13Uvii wurë! rasëë nënaa ija rëgatenda ikuya kunë nene? Ti uwuu mbanduvë ëgweeso ihutye, gusoko ëmanyëke mwino ihutye tutë, regatenda ikuya mukhatë anë gwa njëa a ëroo në ija, gusoko gwa iraghëëyo ëroo ihutye rëkëanëye utendeka ibë ino.

Wikungumi mukhatë a muntu

14Gusoko gumanyie mwino seria a munkhoo, ëgweeso nene uu në muntu wa mumwëërë, narinjiwe muihutye. 15Gusoko ntigune nënëurëtenda, gusoko rasëë nënërëanjëte, ntiurëtenda, ëgweeso rasëë nënërëhuite uu ngurëtendaa. 16Ëgweeso nënaarëtenda rasëë nëntirëanjëte ngumësudangëaa seria ëyoo mwino uu njija. 17Uvii itungwee ti nene nkhoo anë nëngurëtendaa rasëë, ëgweeso uu ihutye ëroo nërëgëkhaa mukhatë anë. 18Gusoko nëmanyie mwino mukhatë a mwëërë wanë, utigëkhaa ukhani në uja, gusoko ufenja ngufenja, ëgweeso utenda ne ija ntiutenda. 19Gusoko rasëë në ija nënërëanjëte, ntiurëtenda, ëgweeso rasëë në ibë nëntirëanjëte unë ngurëtendaa. 20Uvii nësa rasëë nëntirëanjëte uunë ngurëtendaa, ëgweeso unë ihutye ëroo nërëgëkhaa mukhatë anë. 21Uvii namëona seria ëyëë, mwino kunë nene nëngufenjaa utenda në ija rërëfo rasëë nëibe. 22Gusoko nëmëanjëte seria a Muungu gwa untu wa ukhatë, 23ëgweeso mumwëëre wanë nëmëgune seria në ëëkure, ëgukhuva fëta na seria ëyoo a ihaa ranë, na untenda mutungwa wa seria ëyoo a ihutye në ëmukhatë a mwëërë wane. 24Hëhëë anë, mutuki nene! uu anyu nëuje untyoa na mwëërë waneë uruu wa ikuya? 25Ngumurumba Muungu, gwa njëa amwa Yesu Kiristo Müküü witu. Uvii, nësa unë uvii, nene mughonjo gwa ihaa ranë ngumëtumamëaa Seria amwa Muungu ëgweeso gwa mwëërë wanë seria a ihutye.

Currently Selected:

Arumi 7: RNT

Highlight

Copy