Arumi 6

Guduvaa uduvi nëukhondekekie gusoko amwa Kiristo

1Uvii, guhanye ntunihe? Wurë, gufwaghëëre uduva mu mahutye uvii mboto a Muungu iongeeyena? 2Ti uvii mbanduvë! Guudaha wurë sese nëgwakure gwa mahutye ufwaghëëra uduva mu mahutye? 3Mutimanyiena mwino sese soong'e nëgwabadisiwe mukhatë amwa Kiristo Yesu gwabadisiwe mukhatë a ikuya rakwe? 4Gwa uvii gugavëkwa itambëëmwe na mweeso gwa ubadiso mukhatë a ikuya, uvii mwino Kiristo agafëtiwa ufuma gwa akuyi gwa uküü wamwa Tata, seenoo noo ëgunoneye uduva uduvi në ufya.

5Nësa sese gwakhuvëywe itambëëmwe na mweeso muikuya mwino rakwe, gwa uvii gujie ukhuvëa na mweeso mukhatë a ufëtyo në wëë mwino wakwe. 6Gumanyie mwino untu witu wa khae wakhomiwe u mutë itambëëmwe na Kiristo gusoko ntende a mahutye ëruvangwe, na gutatendekee kangë atughwa va mahutye. 7Gusoko muntu nëwakure waye munya uhaghaaro ufuma mu mahutye. 8Ëgweeso nësa gwakure itambëëmwe na Kiristo, guhuvëe mwino guuduva noo itambëëmwe na mweeso. 9Gusoko gumanyie mwino Kiristo wadahie ufëtiwa ufuma gwa akuyi, atiukuya kangë, ikuya rëtimwibalëte kangë. 10Ikuya nëwakure wakure muhënjo rumwedu gutufu, mahutye ëtina nguu kangë gunto akwe, ëgweeso uduva, nëuguduvaa uguduvaa kunë Muungu. 11Viuyi viuyi nyeenoo inoneye mwino mwakure mu mahutye ëgweeso mwino muduvie mu ukhuvëi na Muungu gwa njëa amwa Yesu Kiristo.

12Gwa uvii, mahutye ëtagibale kangë mëërë anyu në ëgukuyaa, na uvii uyikurya nkumbu yakwe. 13Mbesa mutaduye mba nongo ëmwedu a mëërë anyu ëtendeke gëfe ga utenda uvaya nanë mahutye. Bahu iduyi nyenye aghonjo kunë Muungu mwino antu nëvafëtiywe ufuma gwa akuyi, duyi mayoma anyu oong'e kunë Muungu gusoko a ughooke. 14Gusoko mahutye ëtiumwibala nyenye kangë, gusoko mutifo mu Seria ëgweeso mwëmu mboto.

Atughwa va tutë

15Uvii, guhanye ntunihe? Wurë, gutende mahutye atëë gusoko gutifo mu Seria ëgweeso gwëë mu mbotona? Ti uvuu mbanduvë! 16Mutimanyiena mwino nëmwiduya nyenye aghonjo atughwa nanë umutegheeya muntu ungëja mutenda tutë mwatughwa vakwe wasuumba atughwa va mahutye na gënyamwëmo gayo unë ikuya mba ikuryo na gënyamwëmo gayo unë utendwa guyanjëke usonge akwe Muungu? 17Ëgweeso Muungu na arumbwe, gusoko nyenye naa mwaatughwa va mahutye, ëgweeso mugakwatëëra gwa nkhoo yanyu masëyo nënaa mwayafewe, 18na nënaa mwatendwa mwina uhaghaaro sya na mahutye, mugatendeka atughwa va ughooke na tutë. 19Nene ngurighëëtya mwino në mwamuntu gusoko a ulegheku wa mbukamënë a mëërë. Gusoko mwino afoo mwandyo wafunyiye nongo ya mëërë anyu gwa khwalë na gwa kwalë nëënankëe, uvii itungwee funyi nongo ya mëërë anyu gwa tutë gusoko mudahe gweriwa. 20Gusoko nënaa mwaatughwa va mahutye, naa mutifo mututë na ughoke. 21Mwahangie gënyamwëmokë matiku asaa ufuma na mantu ayoo në muuyaonëa mënyaa? Gusoko mpeo a mantu asaa unë ikuya. 22Ëgweeso itungwee nëmwatendwa mwë muuhaghaaro, ufuma u mahutye, na utendwa atumwa va Muungu, mukweti gëhabanga ganyu, unë geriwa, na mpeoayo unë ufanga wa khae na khae. 23Gusoko gënyamwëmo ga mahutye unë ikuya ëgweeso gëfewa ga Muungu unë ufanga wa khae na khae fana Kiristo Yesu Müküü witu.

Currently Selected:

Arumi 6: RNT

Highlight

Copy