Mariko 13

Yesu uguhanya uruvangwa gwa Hekalu

(Mat 24:1-3; Luk 21:5-6)

1Yesu nënaa ugudua mu Hekalu, umwe wa asëywi vakwe agamwëëra, “Musëyi, raraava mwino magwe ayaa na manyumba ayaa mwino a utako.” 2Yesu agamwëëra, “Wurë, uyaghune manyumba ayaa në makuu? Gutie igwe mba rëmwe nërëusagha gunto a rëuya, mu intu rëukhonontwa.”

Mwandyo wa malwe na makhasëko

(Mat 24:3-14; Luk 21:7-19)

3Yesu nënaa wëkhee gunto a Ughongo wa Mëseituni uraraavie Hekalu, Fetero, Yakobo, Yohana nanë Anderea vëgamuwiya gwa mpoampoa, 4“Gukhanëe mantu ayaa ëgudwëëra nanëë? Uu ndolyokë nëëguraghëëra mwino chuu mantu ayaa ëfifë ukhondeka?” 5Yesu agaandya uvëëra, “Ighoji tajee muntu amukhongee. 6Gusoko vingë vëjie vëurëtumia rina ranë, vëuhanya, ‘Nene uu nee mweeso!’ Veeso noo vëuvayaghaya vingë. 7Nëikwë mwategheeya fëta na witeti wa urughu na, mutasampësampëë. Mantu asaa ënonëye udwëëra, ëgweeso mpeo ayo ëkëë. 8Ndughu ëgikhuva na ndughu mbuya, utemi ugikhuva na utemi wuya, mu itumbë guutenda gwina vitentemo vya ng'i nanë njaa. Mantu ayaa uu në gëtë mwandyo wa mukhema nëwina uhungu wa utunguka mwana.

9“Gweeso nyee ighoji. Gusoko antu vëumutoa mu mahakama, na umukhuva mu masunagogi. Muutowa usonge a atemi na vibali gusoko anë, mudahe unsudangëa kune veeso. 10Ëgweeso inoneye tanju Sayu Njija itanantiwe gwa ndughu yoon'ge. 11Na nëikwë vamukwata na umutoa mu mahakama, mutatendee mwina wova mwino mwinje urëghëtya ntuni itungo rësëë nëikwë rafika, hanyi gëkaku nëmuufewa, gusoko tinësa sa nyenye muurëghëtya ëgweeso Mwahu Mweru. 12Mwuuna ugumuhongeera mwuunaakwe auraghwe, ihe ugumuhongeera mwanakwe, ang'enya noo vëuvahongeera afafi vawe vëuraghwe. 13Antu voong'e vëumuhura nyee gusoko a rina ranë. Ëgweeso munyaughimëëya faka mpeo unë ugutyowa.”

Ikhasëko në iküü

(Mat 24:1-28; Luk 21:20-24)

14“Gweeso nëmwarëona, Isanaamu Ragooghofya rëmëkie fana ti gwayo. (Munya usoma na amanye rianaanayo!)” Faafo antu nëvë Uyudea vëmankëe vitanto. 15Muntu në wëë gitembe ra nyumba atatununtee na gingëa munyumbaakwe uhora intu. 16Nëwee umuunda atasukee unyuma uhora isaa rakwe. 17Hëhëë awe anyaguucha wito na nëvëgonchaa matiku asaa! 18Rombi mantu asaa itajee udwëëra matungo a gëtiku. 19Gusoko itungo rësëë guutendeka gwina ilwe nërënadwëëra mba nduvë ufuma fana Muungu naagawuumba urëmi faka rëo kangënoo rëtëujaa rëdwëëree mba nduvë. 20Nësa Müküü inayatënënkëya matiku asaa gutie muntu nënaa ugutyoeka. Ëgweeso gusoko a ahwaaniwa vakwe, Müküü wayakefiye matiku asaa.

21“Uvii në muntu wamwëëra, ‘Raraava, Masiha wëë afaa!’ mba ‘Wëë ukoo,’ mutamuhuvëe. 22Gusoko vëudwëëra masiha va weegheeghee na anyagëdaghu va weegheeghee, vëutenda ndolyo na mantu a utacha, gusoko nësa igudahëka uvayaghaya ahwaaniwa va Muungu. 23Ëgweeso nyenye ighoji. Nee namukhanëa mantu oong'e nëkëë inadweëra.

Uja gwa MwaaMuntu

(Mat 24:29-31; Luk 21:25-28)

24“Uvii, matiku asaa, në ilwe rësëë rakëra, yuva rëgirooriwa na mweri utigwerya. 25Njota igugwa ufuma gunto, na nguu ya girunde iguhingisiwa. 26Faafo vëumwoona MwaaMuntu ujie mumaunde gwa nguu nyingë na uküü. 27Uguvatuma vaa malaëka vakwe, uguvahwangwiya ahwaaniwa vakwe ufuma ng'ande yoong'e ine ya urëmi, ufuma mpeo a urëmi faka mpeo a irunde.

Usëyi ufuma mutini

(Mat 24:32-35; Luk 21:29-33)

28“Gwa mutini isëyi wikhori uruu: Gënyafaafo gutufu në makhanja ayo andya utenda matotu na uboha matutu, muumanyaa mwino itungo ra gëtiku rahumbeeraa. 29Uvii, uvii nyeenoo nëmwoona mantu asaa ëgutendeka, manyi mwino MwaaMuntu wëë fifë ino. 30Ngumukhanëa tutë, ufafo uruu utiukëra kamwe nëkëë mantu asaa oong'e inadwëëra. 31Irunde na ng'ë igukëra, ëgweeso nkhani yanë itiujaa ikëree kamwe.

Gutie nëumanyie itiku mba itungo

(Mat 24:36-44)

32“Gweeso gutie muntu nëumanyie itiku mba itungo rësëë rëjie nanëë, mba malaëka va girunde mba MwaaMuntu, Tata eyene unë umanyie. 33Ihengi, mutaree, gusoko mutighune itungo rësëë rëufika nanëë. 34Ëgutendeka mwino muntu nëugumëreka khaakwe winjë muhënjo uguvarekea atumami vakwe wibali, mu muntu na mwëmo wakwe, wamwëëra anë mughoji wa gënyamwaango araraave. 35Mutareehe, gusoko mutighune müküü wa khaya ugusuka nanëë, ëgudaha utendeka mpëndë, utiku wa mukhatë, diu nënkuu mba diu. 36Mutaree gusoko nëwaja buu atajee umuhanga mwaraa. 37Nëngumwëëra nyee, nguvëëra voog'e: Mutaree!”

Currently Selected:

Mariko 13: RNT

Highlight

Copy