Agalatia 5

Kiristo wagutëndie sese guhaghare

1Kiristo wagufee sese uhaghaaro. Uvii sese gwina uhagharo wa tutë, Gusoko ësëë imëki sese, na mutatende mwë atughwa mba duvë!

2Nene, Faulo ngumukhanëa nyenye. Nësa nyenye muyanja antu vangë vamutoe ihungu, ëyëë ina ryana mwino Kiristo ugutendeka atina sao. 3Nene ngurighëëtya kangë intu ërëi. Muntu gekaku në wenda uyanja antu vangë vëmutoe ihungu, uvii imunoneye atende mu intu nërëraghëëywe mung'ë a Seria. 4Nyenye mwabaghuwe ufuma kunë Kiristo nyenye në mufenja utendeka mwë aja gwa seria. Nyenye mwagwe ufuma u mboto. 5Gusoko ukëërëa Mwahu Mweru gwa njëa a uhuvëi witu kunë Kiristo, sese gwindëe ighonje ra tutë nërëjie. 6Gusoko muntu nëwakhuvëa itambëëmwe na Kiristo mbesa muntu atowe ihungu, mba atatowe ihungu oong'e ikhwëtë. Ëgweeso në rina ryana në uhuvëi nëugutëndaa mwëmo ukëërëa uyanjo kunë Muungu. 7Nyenye naa mufwaghëëre vija mung'ë ukhuvëi wanyu mwinaa Kiristo! Anyu në wamughiiya nyenye mweke umëkurya tutë? 8Ufëmi urui utifumie kunë mweeso unë wamwëtaanie nyenye. 9Gëlulëyo gëkevuu gëululia ntonge oong'ë. 10Nene nëna uhuvëi üküü mung'ë a Müküü mwino nyenye mutinje uhora isëgho rëngëja ukëra në rane. Na muntu në ugumururuja nyenye, mba atende anyu, Muungu ugumukuurya muntu wasuu. 11Ëgweeso, nësa nene, ahuvëi woyane, kë ngutanantya mwino aghosya inoneye vëtowe ihungu, gusoko kë në antu kë vëunkhasya nene? Gwa ryana ërëi impënga nërëghokee ikuya ramwa Yesu u musalaba radahie uheywaa. 12Nene ngufenja antu vasaa nëvëumufutyafutya nyenye ivanoneye vëtatowe ihungu gutufu ëgweeso vëhoorwe.

13Gusoko nyenye ahuvëi woyane, Muungu wamusambëe nyenye mutende mwina uhaghaaro. Ëgweeso nyenye mutautumëa uhaghaaro urui, mwino iyoma ra utenda mantu a gëmwëërë. Ëgweeso ukëërëa uyanjo itumëkëi nyenye gwa nyenye. 14Gusoko Seria yoong'e ikhondekie gwa ukhani rumwedu, “Nyenye nyoong'e imunoneye muvayanje antu woyanyu mwino nyenye mwiyanjëtë aghonjo.” 15Ëgweeso mbesa nyenye mwinjë giruma na gilya mu muntu na muuyakwe ihengi nyenye mutagimarëye mu muntu na muuyakwe.

16Nene nina ryana tëërë; duvi gwa Mwahu na mutatënde gwa uhonga nkumbu ya mwëërë. 17Gusoko nkumbu ya mwëërë i haya na ya Mwahu, na nkumbu ya Mwahu i hiya na ya mwëërë. Gusoko ëyëë, iyii igifënga nyeeso gwa nyeeso, gwa umughëëya nyenye mweke utenda rasëë në mu rëfenja. 18Ëgweeso nesa nyenye mutongeerwe na Mwahu Mweru nyenye mutiutendeka mwë fang'ë seria. 19Itungwee ntendo ya mwëërë ii daaji: uramatwë, ulehadi, na ntendo yawe yi mwino ya mbwa. 20Ukurya arungu në ti arungu, uroghi, urughu mukhatë a muntu na muntu. Giihoma gwa ikhuo, ufenja uvaonyatëëya vangëja, wikungumi nanë marekanuko. 21Wiru, ughaa nanë ughaa mung'ë a sigunkuu yawe ya gëdini. Na utendaa mantu angëja mwino ayaa. Nene ngumwonya mwino namwonyiye songe; voong'e në vëutendaa mantu ayaa, vëtiuwasaa utemi wa Muungu. 22Mwahu Mweru uguvatendaa antu vëtende vina uyanjo uküü munkhoo, vëduve gwa majëghana mukhatë a muntu na muntu muuyakwe. Mweeso uguvafaa ughëmëëyi wa mantu në makaku, gëarëya veeso gwa veeso, gitendea vija veeso gwa veeso, utenda ahuvëi. 23Mweeso uguvatendaa vëkegikheefea veeso gwa veeso na uhita utenda nkumbu yoong'e ya mwëërë. Gutie seria yoong'e në yiumwibalaa muntu nëuguduva uduvi urui. 24Vasaa voong'e unë vëmuhongie Kiristo vakhomiwe u mutë, mwëërë itambëëmwe na nkumbu yayo.

25Nësa guduva gwa Mwahu Mweru, uvii noo enoneye gwenende gwa Mwahu Mweru. 26Uvii, gutagitendee, gutagikenee sese gwa sese mbesa gutagionee wiru.

Currently Selected:

Agalatia 5: RNT

Highlight

Copy