Agalatia 4
4
1Nëna ryana mwino musai, matungo oong'e në mung'ënya wë mwino mutughwa, mbesa mweeso në mughonjo wa ughwarë woong'e. 2Ëgweeso we fang'ë a antu në vëumurea faka itungo në ihe urëëkie. 3Uvii nanë see. Itungo narë sese gwë ang'ënya, sese arë gwa atughwa va vinyonyinyonyi vya mu urëmi. 4Naarë itungo ranoneya, Muungu agamutuma Mwana wakwe mu urëmi. Mweeso wafafiwe na mukhema, na wafafiwe fang'ë a Seria a Gëyahudi. 5Mweeso wajie ugukhomoa sese soong'e nënaa guduvie gwa gibalwa na Seria, gusoko sese soong'e gudahe utenda vana va Muungu. 6Na gusoko nyenye mwë vana vakwe, Muungu wamutumie Mwahu Mweru mukhatë a nkhoo yanyu, nëugurëa “Abba! Tata!” 7Uvii ukëërëa kunë Muungu, nyenye mutiatughwa kangë, ëgweeso gwë vana. Na nesa nyenye mwë vana vakwe, nyenye mwë asai.
Faulo wina choghofi gwa ëroo në rinjë uvadwëëra Agalatia mu uhuvëi wawe
8Khae yasiyo në nyenye naakë mwinamumanya Muungu, nyenye arë mwë atughwa va vinyonyinyonyi në gwa ntundo ti arungu va tutë. 9Ëgweeso itungwee nyenye mwamumanyie Muungu mwino Muungu wanyu. Nene nëdahëtë uhanya, Muungu wadahie umumanya nyenye. Wurë, nyenye mufenja uvisukëa vinyonyinyonyi ivoo në vilegheku na vitina ryana roong'e? Gusoko kë mufenja utënda atughwa va vinyonyinyonyi iyo kangë? 10Nyenye mugihengaa matiku nanë mëeri nanë vinyinga nanë mëakha! 11Nene nina choghofi gusoko anyu. Mwëëmo nënawutendie watendekie wa ndende.
12Auna ane, nene ngumunena tendeki mwino nene, gusoko nene noo natendekie mwino nyenye. Nyenye mwinang'utya nene matungo nëakëëre, ëgweeso itungwee mung'utya. 13Nyenye mumanyie gusoko nene arë nëwaire uvii nëgatanantya Sayu njija kunë nyenye muhënjo wa mwandyo. 14Gusoko nene arë nëwaire, nyenye mwendie uhanga maëghëëyo makuu. Nyenye mwinendaa ung'orya nene mba unjughuta. Hiya nayo, nyenye mwendie ung'enyifa mwino malaëka wa Muungu, mwino Kiristo Yesu. 15Ntuni nëëgadwëëra nëakhanëkëya ayaa oong'e? Gusoko nene ngusudangëa mwino në mbesa goro itungo rasëë nyenye na mudaha mbesa ukuura miho anyu na umpa nene. 16Uvii nene natendeka në murughu wanyu gwa umukhanëa tutëna? 17Antu vasaa vëuraghëëra nkumbu nküü kunë nyenye, ëgweeso nkumbu yawe në mbë. Veeso vëufenja umuutëa nyenye gunji, uvii nyenye mutënde mwino veeso. 18Gusoko ndolyo në njija matungo oong'e në njija utendeka, ti gutufu itungo në nene nëitambëëmwe na nyee. 19Anaane në anyui, nene nitegheeye uhungu gusoko anyu faka fana Kiristo uguumbëka mukhatë anyu. 20Nene nina nkumbu nküü utënda nërëfo itambëëmwe na nyee itungwee na ukhanëkëya ruri wane. Gusoko nene namutakaa nyenye.
Faulo ugurighëëtya nëëmughokee Hajiri nanë Sara
21Nene ngufenja umuwëya nyenye në mwë fang'ë a seria, mumanyie tutë mwino Seria ëguhanyana? 22Gusoko ëandëkiwe mwino Iburahimu arë wina vana vavëë. Mwana umwedu ufuma u mukhema unë arë mutughwa, mwana ungëja ufuma u mukhema wa urumba. 23Ëgweeso mwana wa mukhema nënaa mutughwa agafafwa gwa mwëërë. Na mwana wa mukhema wakwe në wa urumba arë wa iraghano. 24Itungwee urui në wikhori. Akhema vavëë vëgikhwanëywa na maraghano avëë. Rëmwedu ra maraghano ayaa rajie ufuma u gëtanto ga uSinai. Iraghano ërëë rëmughokee Hajiri në anaakwe vendie ufafwa atughwa mwino mweeso. 25Hajiri wikhwetë na gëtanto ga uSinai në gëgu Arabia. Urui në wikhori wa muji wa uYerusalemu wa itungwee, në utughwa itambëëmwe na antu vayo. 26Ëgweeso Yerusalemu në ëgunto ti ntughwa. Na Yerusalemu ëyëë ë mwino yiu witu. 27Gusoko ëandëkiwe,
“Yanjëcha, veve mughumba në winahangaa
vana mba khae;
yanjëcha na wiririsye, veve në winahangaa uhungu
mba khae,
Gusoko vana va mukhema nëwarekiwe
na mughohi në vaingë nanguu
ukëra vana va mukhema nëroghowe.”
28Gwa uvii, nyenye mwino Isaki, mwë vana va iraghano. 29Ëgweeso mwino mwitungo rasëë mweeso në arë wafafiwe uhonga ufafo wagëmwëërë agaandya umukhasya mwana në arë wafafiwe gwa uhonga na Mwahu wa Muungu. Na makhasëko ayayo ëgudwëëra itungwee. 30Ëgweeso, maandëko ëguhanya ntunihe? “Mujunche mutughwa wa gëkhema na mwanakwe. Gusoko mwana wa mutughwa wa gëkhema atiusaa itambëëmwe na mwana wa mukhema në ti mutughwa.” 31Uvii, ahuvëi woyane, gwa urighëëtya tutë, sese guti vana va mutughwa wa gëkhema, ëgweeso gwë vana va mukhema në ti mutughwa.
Currently Selected:
Agalatia 4: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.
