Agalatia 3
3
Utënda mwino Seria ëhanyiye mba umuhuvëa Yesu Kiristo
1Nyenye Agalatia mwafutu! Anyu nëwamuroghëe nyenye. Usonge a miho anyu Yesu Kiristo waraghëërwe daaji mwino antu vamuuraghie gwa umukhoma u mutë! 2Nene ngufenja umanya intu rëmwedu ufuma kunë nyenye: Wurë, nyenye mwaghenyifie Nkhoo a Muungu gusoko a utënda mafenji a Seria, namba gusoko a umëhuvëa Sayu Njija? 3Nyenye mutiudaha utënda mwafutu uyi! Nyenye mwaandiye uduvi wanyu në ufya gwa njëa a Mwahu wa Muungu; wurë, itungwee nyenye mufenja umarëya gwa nguu ya mëërë anyuna? 4Wurë, mantu oong'e në a uvavi nëamuhangie nyenye atëndekie a ndendena? Nësa vii tutë në ndeende. 5Mweeso unë ugufunyaa Mwahu kunë nyenye na utenda ntendo ya makura mukhatë anyu ugutenda vii gwa ntendo ya seria, namba gwa utegheeya itambëëmwe na uhuvëi?
6Uvii Iburahimu “agamuhuvëa Muungu, na ëgavariwa kunë mweeso mwino wa tutë.” 7Uvii nyenye raravi mwino antu në vina uhuvëi në vana vamwa Iburahimu tutë. 8Na maandëko, gwa goona usonge mwino Muungu unoneye uvavëka vija antu va ndughu ingëja gwa uhuvëi. Na uvii mwino Sayu njija në arë arighëëtiywe kunë Iburahimu khaeng'ë në asaa në arë ahanyiywe ëkëë inadwëëra, ëuhanya, “Mukhatë ako veve ndughu yoong'e injë uforiwa.” 9Uvii kangë avoo në antu va uhuvëi Muungu uguvaforya itambëëmwe na Iburahimu unë wahuvëe.
10Gusoko voong'e unë vëhaghamëe ntendo ya seria vë fang'ë a ijumi, mwino ëandëkiwe “Muungu ugumuruvanga muntu gëkaku në matungo oong'e atëutendaa oong'e nëiandëkiwe mu gëtabu ga Seria.” 11Itungwee në daaji mwino Muungu atëuvëkaa muntu woong'e vija usonge akwe gwa njëa a Seria; gusoko, “Muntu wasuu në wa tutë uguduva gwa uhuvëi.” 12Ëgweeso seria ëtigikhaa gunto a uhuvëi, gusoko, “Muntu woong'e nëugutenda në ëmu Seria matungo oong'e uguduvaa.” 13Kiristo wagutyoe sese ufuma mwëjumi ra Seria gwa urëhora ijumi rasëë gusoko itu. Gusoko ëandëkiwe, “Muntu woong'e nëugukhomwa u mutë#3:13 Mutë: Nënaa utëmi wa Gërumi ugutumëa gwa uvakhoma anya mahutye. ujumiwe.” 14Uvii mung'ë amwa Kiristo Yesu mboto yamwa Iburahimu, idahe uja gunto a antu va ndughu ingëja, uvii sese gudahe ughenyifa iraghano ra Mwahu ukëërëa uhuvëi.
Iraghano ra Muungu rëtiudaha ufeurwa na Seria a unyuma
15Aruna ane, nene ngumufa nyenye nyinkhori, Itungo në antu vavëe venda gërumëya mung'ë a intu na gëandëkëa mukataba,#3:15 Mukataba: Andëko ra wirumëyi wa antu vavëë. gutie muntu nëugudaha uwufangajëya mba gongeeya ukhani. 16Muungu, mëhënjo mingë wendie uvëka iraghano kunë Iburahimu ra umuforya mweeso nanë mpafo yakwe. Maandëko ëtihanyiye “Nanë ufafo wakwe” kunë antu vingë, ëgweeso gwa muntu umwedu, “Nanë ufafo wako,” unë Kiristo. 17Nene nina ryana tëërë, Muungu wadwëëye Seria mëakha maghana ane na makumi atatu usonge. Ëgweeso seria ëtiudaha gunanga iraghano#3:17 Iraghano: Andëko ra wirumëyë. mba ufangajëya iraghano ra Muungu, uvii mwino utënda iraghano ra Muungu mwino ti gëntu. 18Gusoko nësa usai uguhangëka gwa njëa a seria, uvii kangë utiudwëëywa gwa njëa a iraghano. Ëgweeso Muungu wamufie Iburahimu maforyo gwa njëa a iraghano.
19Ëgweeso seria naa ina ndolyo. Seria adwëëywe gwa guongeeya gunto a iraghano gusoko uraghëëra antu mahutye u ntuni. Na naa ina ryana a gikhaa faka fana ufafo ujie uja, kunë wasuu në iraghano ratëndiwe. Seria ëtiwe gwa njëa a vamalaëka, itambëëmwe na muntu në wëmukhatëkhatë a antu na Muungu. 20Muntu në wë mukhatë-khatë ugufenjiwa itungo në gwina mpande ëvëë. Ëgweeso Muungu në umwedu.
Soko a udwëëywa gwa Seria
21Gwa tutë Seria ëti hiya na maraghano a Muungu. Ti uvii kamwe. Gusoko nësa seria nëadahie ufunyiwa unë ëgudaha uvafa ufanga wa khae na khae uvii Muungu naa uguvaghenyifa antu mung'ë a ukhuvëi wakwe gwa utënda mwino Seria ëgufenja antu vëtende. 22Ëgweeso maandëko ëguhanya, mwino mu muntu mung'ë a urëmi wendie gibalwa na nkumbu nküü ya utënda mahutye. Gusoko asëë Muungu uguvafa vasaa nësa vamuhuvëa Yesu Kiristo gwa rasëë nëwarëraghanie.
23Itungwee naarë uhuvëi kë winaja sese na gwë fang'ë a seria arë gutungiwe faka uhuvëi uje ukunukuwa. 24Uvii, Seria ëyoo naa ëë mwino murei witu faka afoo fana Kiristo waja, uvii sese gudahe utendwa gwë va tutë gwa uhuvëi. 25Ëgweeso, gusoko uhuvëi waajie, uvii, Seria ti murei witu kangë. 26Gusoko mung'ë amwa Kiristo Yesu nyenye mwatëndie vana va Muungu ukëëra uhuvëi. 27Gusoko mwino vaingë mukhatë anyu arë vabadisiwe mukhatë amwa Kiristo, nyenye mwatëndie mwino Kiristo mughonjo. 28Uvii gutië hiya mukhatë a Muyahudi mba Muyunani, mutughwa mba muntu në ti mutughwa, mughosya mba mukhema. Nyoong'e mwatëndie mwino muntu umwedu mung'ë a ukhuvëa mwina Kiristo Yesu. 29Na gusoko nyenye mwë vamwa Kiristo, uvii nyenye mwe ufafo wamwa Iburahimu. Uvii nyenye mwë asai gwa uhonga na iraghano.
Currently Selected:
Agalatia 3: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.