Nte 7

Nkhani yamwa Sitefano

1Mukumbëki në müküü agamuwëya Sitefano, “Vii uvii tütëna?” Na Sitefano agasucha, 2“Aruna ane, na vatata vane, ntegheeyi nene. Muungu wa üküü agamudwëëra kükü witu Iburahimu naarë këë ugikhaa uMesopotamia, naarë akëë ainaenda gikhaa uHarani. 3Muungu agamwëëra Iburahimu, ‘Tunguya ufuma ung'ë ako na ufuma gwa anyandughu vako na wende mung'ë a ng'ë në nene nguguraghëëra veve.’ 4Na mweeso agatunguya ufuma ung'ë a Akalidayo, na agaenda gikhaa uHarani. Në arë ihe wakwe wakuya, Muungu agamuheeya kuuko agamweeta ung'ë ëyëë në nyenye muumikhaa itungwee. 5Këë mweeso inamufaa Iburahimu usai mbanduvë mukhatë ayo mbesa usambi wa mughuu rumwe. Ëgweeso agavëka iraghano ra umufa mweeso usai na gwa ufafo wakwe nëikwe mweeso atifo, mbesa naa atikweti mwana. 6Na Muungu agahanya gwa ërëë, ufafo wakwe winjë utendeka ugheenyi ung'ë a antu vangëja, na anya ng'ë asëë vinjë uvatenda atughwa vao na uvatenda ivë mëakha maghana ane. 7‘Ëgweeso nene ninjë umëramwua ndughu në veeso vëumëtumëkëa’ uguhanya Muungu, ‘Nanë asaa akëra veeso vinjë ufuma ung'ë asee na unkurya nene gitumbë ërëë.’ 8Na mweeso agamufa mweeso iraghano ra ihungu. Na uvii Iburahimu agamufafa Isaki, na agamutoa ihungu itiku ra munana: na Isaki agamufafa Yakobo, na Yakobo, agavafafa vakuku ikumi na vavëë.

9“Na vakükü, vëgaona wiru gusoko amwa Yosefu, vëgamurinja mweeso mung'ë a uMisri, ëgweeso Muungu arë wëitambëëmwe na mweeso, 10na agamutyoa ufuma mumakhasëko akwe oong'ë. Na Muungu agatendeka wëë guuvaru wakwe na agamufa ihaa usonge amwa Farao, mutemi wa uMisiri, na agamutenda mweeso mutemi wa u Misiri na müküü wa mantu oong'e a ukhaakwe.

11“Na gugadwëëra njaa ung'ë oong'e a uMisiri nanë uKaanani, na makhasëko makuu, na vatata vitu vinahangaa malëwa. 12Ëgweeso Yakobo na arë wategheeya mwino gwina iyo uMisiri, mweeso agavatuma vatata vitu muhënjo wa mwandyo. 13Na muhënjo wa gavëë Yosefu agitenda amanyëke mughonjo gwa aruna vakwe, na gënyamwango gamwa Yosefu gëgamanyëka kunë Farao. 14Na Yosefu agatuma antu na umwëtaana Yakobo tata wakwe na antu voong'e va undughu akwe, antu makumi mufungatë na vatano. 15Na Yakobo agaenda faka uMisiri. Na mweeso mughonjo agakuya, na vatata vitu noo vëgakuya. 16Antu vëgavakenka veeso faka uSekemu na uvaëka mung'ë a mbëlëlo në Iburahimu wamëghurie kunë vana vamwa Hamori mung'ë a uSekemu gwa hela igëtunga.

17“Ëgweeso mwino itungo ra iraghano në arë rahumbea, në arë Muungu wamufie Iburahimu, antu vëgaingëfa na vëgagiongeeya uMisiri. 18Ufuma hafo agatema mutemi ungëja uMisiri në atimumanyie Yosefu. 19Mweeso agamëtenda mbeyu itu gwa uremu na uvaumëya vatata vitu vavafunye vana vao në adëru, unji a nyumba yao vakuye. 20Itungo rasëë Musa agafafwa, na arë muja usonge a Muungu, na mweeso agarewa mëëri ëtatu u nyumba amwa tata wakwe. 21Na itungo naarë mweeso wafunyiwa uchanya, muncha wamwa Farao agamuhoa na agamurea mwino mwana wakwe mughonjo. 22Na Musa agasëywa mahaa oong'e a Amisiri, na mweeso agatendeka muntu në munya nguu mu nkhani na ntendo.

23“Itungo nënaa waficha mëakha makumi ane, isëgho rëgingëa munkhoo akwe ra gwenda uvasoya aruna vakwe, vana va Isiraeli. 24Na agaona umwedu wa aruna vakwe ugonewa. Mweeso agamwikhuvëya muntu wasuu nënaa ugonewa na agamurëfëya ndefi gwa umukhuva Mumisiri wasuu. 25Mweeso agaghema mwino aruna vakwe vamanyaa mwino Muungu arë uguvafa veeso utyoi gwa mukhono wakwe, ëgweeso veeso vinamanyaa. 26Na itiku nërëhongie agavadwëëra aruna vakwe na agahanga vavëë mukhatë awe vëgikhuva. Mweeso agaëghëëya uvatenda veeso vafatane uguhanya, ‘Antu, nyenye mwë aruna, asikë në nyenye mugihutya nyenye gwa nyenye?’ 27Ëgweeso muntu une naa ugumuhutya munyafifë wakwe agamusuntëya Musa uguhanya, ‘Anyu nëwaguëkie veve utendeke u mwibali na muramwui witu 28Veve ugufenja umburagha nene mwino aja wamuraghaa Mumisiri uyoo ighoona?’ 29Gwa isucho ërëë Musa agateja, na agatendeka mughenyi mung'ë a ungë a uMidiani, në arë agafafa vana vavëë.

30“Naarë meakha makumi ane akëa malaëka agamudwëëra mweeso mu mbugha uGetanto ga uSinai, na gëtinde ga moto gëutunku. 31Itungo në Musa mweeso arë waona uyii agataka; na mwino mweeso arë wahumbea fifë aihenge, ruri wa Müküü ugaja, 32‘Nene në Muungu wa vatata vako, Muungu wamwa Iburahimu na wamwa Isaki na wamwa Yakobo.’ Na Musa agakhakhata na ainaëghëëya uraava. 33Müküü agamukhanëa, ‘Yua maatu u mëghuu ako, gusoko hafai kunë wëmëkie në itumbë në ryeru. 34Tutë nayaona makhasëko a antu vane nëvë uMisiri na nategheeya gëëro gao, na nasima fang'ë nëvatyoe veeso. Na itungwee chu, nene ninjë ugutuma veve u Misiri.’ 35Musa uyi në veeso vamuhitie veuhanya, ‘Anyu nëwagutendie veve mutemi na Muramwui?’ Muungu wamutumie atendeke mutemi nanë mutyoi gwa mukhono wa malaëka wasuu nëwamudwëëre mweeso u gatunku. 36Mweeso në wavatongeere veeso ufuma unji, agatenda makua nanë utako ung'ë a uMisiri nanë girambo ra uSamu, nanë u mbugha gwa mëakha makumi ane.

37“Uyui në Musa nëwaakhanëe vana vaIsiraeli, ‘Muungu winjë umuhumbua gunto gusoko anyu munyagëdaghu ufuma u varuna vanyu mwino chu wa ng'umbue nene unto.’ 38Uyui në mweeso në na arë wë mung'ë a Kanisa mung'ë a mbugha itambëëmwe na malaëka në warighëëtiye kunë mweeso uGëtanto ga uSinai, na itambëëmwe na vatata vitu. Mweeso waghenyifie nkhani ya ufanga gwa ugufa sese. 39Vatata vitu vëgahita umutegheeya mweeso, ëgweeso vëgamusuntëëya kuengëja, na gwa nkhoo yao vëgahunukwa usuka uMisiri. 40Veeso vëgamukhanëa Aroni, ‘Tenda arungu gusoko itu vagutongeere sese usonge itu. Gusoko Musa naarë ugutongeere sese ufuma ung'ë a uMisiri, sese gutimanyie ntuni nëamuhanga mweeso.’ 41Na veeso vëgatenda ndama matiku asaa, na vëgafunya dahwa u sanamu#7:41 Sanamu: Intu nërikhweti na intu rëngëja ëgweeso rëtikweti ufanga. asëë na vëgayanjisiwa na mëëmo a mëkhono ao. 42Ëgweeso Muungu agaujuka na uvareka veeso vakurye njota ya girunde, mwino chu ëandëkiwe mugëtabu ga anyagëdaghu:

‘Nyenye mwafunyiye kunë nene maimwana

nëëkigitye nane ikumbëko,

mëakha makumi ane mung'ë a umbugha,

Veve nyumba a Isiraeli?

43Na nyenye mwahorie ihema#7:43 Ihema: Isaa në ikuu, në ikhamu nërëutumëwaa unjengea nkhango. ramwa Molaki,

nanë njota a muungu Refani,

mantu në nyenye mwayatendie gwa uyakurya;

na nene ninjë umutoa nyenye kuëngëja ukëa uBabeli.’

44“Vatata vitu arë vakweti ihema ra usudangëi mu umbugha, mbesa mwino mweeso warighëëtiye kunë Musa wamuraghëëre mweeso urëtenda ryeso, gwa uhonga wikhori ururo ururo në mweeso arë waune. 45Vatata vitu, varekewe vëgariingëya itambëëmwe inaa Yosua mu utemi wa Ndughu iyoo, në Muungu agaijuncha gunji usonge a vatata vitu. Uvii ëgatendeka faka itungo ramwa Daudi, 46naarë Muungu agatendeka wëë gu uvaru wakwe na agaromba arekewe ajenge mëkhao a Muungu wamwa Yakobo. 47Ëgweeso arë Solomoni nëwamëjengie nyumba gusoko akwe. 48Na mbesa uyii Uyuo Nëwegunto ino atigikhaa u nyumba nëijengiwe na mëkhono; mwino uhanyiye munyagëdaghu,

49‘Irunde në itumbë rane ra üküü,

na ng'ë në itumbë rane ra uëkëa mëghuu.

Nyumba kë në nyenye mwinjë umëjenga

gusoko ane, uguhanya Müküü,

na itumbë kë nërëutendeka itueyo rane?

50Ti mëkhono ane nëatendie mantu ayai oong'ena?’

51“Nyenye antu nëvankhoo nkaku, nëmwinatowaa ihungu mung'ë a nkhoo nanë matwë, nyenye matiku oong'e mumuhitaa Mwahu Mweru. Mwino vatata vanyu vatendie, nyenye noo mwatendie uyi. 52Munyagëdaghu kë në vatata vanyu vinamukhasya? Na veeso vavauraghie vasaa unë vatanantiye usonge ija ramwa Uyoo, Nëwatutë në nyenyë itungwee mwamutonere na umuuragha. 53Nyenye unë mwaghenyifie seria mwino adwëëywe na vamalaëka na mwinatendaa mwino seria ihanyiye.”

Sitefano Uguuraghwa

54Itungo naarë veeso vategheeya mantu ayai, veeso vëgahumwa na makuo, na veeso vëgasya mino awe gusoko akwe. 55Ëgweeso mweeso, wijue Mwahu Mweru, agakhamëcha miho unto girunde agaona üküü wa Muungu, na Yesu wëmëkie umukhono wa gëlëlo wa Muungu. 56Na mweeso agahanya, “Raavi, nene nëkengee irunde rënughuëkie, na Yesu wëmëkie umukhono wa gëlëlo wa Muungu.” 57Ëgweeso veeso vëgakurya mukindo gwa ruri në üküü na vëgagivia matwë ao na gënyahafo veeso vëgamumankëa voong'e itambëëmwe. 58Uvii veeso vëgamufunya unji a muji na vëgamutua mweeso na magwe; masudanga vëgaëka fang'ë masaa ao u mëghuu a muhumba umwedu rina rakwe Sauli. 59Na mwino veeso arë vafwaghëëre umutua gwa magwe, mweeso agaromba, “Müküü Yesu, sëngëya nkhoo ane.” 60Na agatungama fang'ë na agarëa gwa ruri në üküü, “Müküü, utavavarëye ihutye ërëë gusoko awe.” Na mweeso naarë warighëëtya uyi agatena nkhoo na agakuya.

Currently Selected:

Nte 7: RNT

Highlight

Copy