Nte 27

Faulo wina muhënjo uenda uRumi

1Na naarë veeso varamwua sese gwende Italia gwa njëa a irambo, veeso vëgamwëka Faulo itambëëmwe na atungwa vangëja vëgëtunga u mëkhono amwa müküü wa asikai në munyui nëuguëtaanwa Yulio, në müküü wa iburi ra asikai nërëutaanwa Agusito. 2Guyanatëa mweeri amwa Adiramito, unë arë ë muhënjo gwenda u minji në umpeompeo a irambo ra Asia. Sese gugaandya muhënjo girambo, Arisitariko muntu wa u Makedonia ufuma uTesalonike agakhuvëa nasee mung'ë a muhënjo uruu. 3Fadiu ayo gugafika uSidoni. Yulio agamutenda Faulo ija, na agamurekea mweeso ende uvaona anyambuya vakwe na ende uhanga mantu në arë uyasëghëte. 4Ufuma haafo guganatëa meeri gugakëërëa uKupuro, ng'ë nëëmukhatëkhatë a irambo, gusoko mpefo arë yukunka hiya na sese. 5Na naarë sese gwatambuka guuvaru wa irambo ra uKilikia nane Famfulia, sese gugafika faka u Mira, muji në wëmukhatë a Lukia. 6Haafo müküü në munyui wa asikai agahanga meeri ëmwedu a uAlekisanderia naarë injë Italia, na agagunatëya sese. 7Gugenenda muhënjo witu mpoampoa gwa matiku maingë, na gugafika gwa makhasëko guuvaru wa uNido, na mwino nkungu ëgagughëëya sese ufwaghëëra na muhënjo, gugaenda uKirete guuvaru wa uSalimone. 8Gugakëëra u mpeompeo a irambo gwa makhasëko, gugafika gitumbë nërëutaanwa Bandari#27:8 Bandari: Fana meeri igwëmëka. në Njia, fifë haafo arë urëfo muji nëugwëtaanwa Lasea.

9Mwino itungo ririfu arë rayaghaa, na muhënjo arë wajaa wina holota gusoko itungo ra ufunga arë rakëa, Faulo agavafa anyamuh'enjo usëyi urui, 10uguhanya, “Aküü, naona mwino muhënjo winjë utendeka wina uruëki nanë ukhafëki wingë, tiese gwa mëëgho gutufu nanë meeri, ëgweeso noo na gwa uduvi witu.” 11Ëgweeso müküü wa asikai në munyui agaghëmba gëtwë ino kunë mufotya meeri nanë mughonjo wa meeri ukëa mwino Faulo wahanyiye. 12Na gusoko bandari* arë itinoneye gikhaa itungo ra mpefo, antu vaingë vëgaona vija vëheghe haafo, vafwaghëëre na muhënjo nëyudahëkëka vafike faka uFoinike, bandari* në a uKirete, nëëkengee mpeo a gukuma në a ukiya nanë mpeo a utaghana në a ukiya, gusoko vadahe gikhaa haafo itungo ra mpefo.

Nkungu mung'ë a irambo

13Nanë aarë mpefo nëëfumie utaghama ëgaandya ukunka mpoampoa, veeso vëgaghema mwino vahangaa ndolyo awe. Veeso vëgaheya igwe ra usimëya meeri vëgaenda vinjë uKirete, fifë na u mpeo a irambo. 14Ëgweeso itungo rikufëi nkungu në nküü ino, nëëgwëtaanwa gukuma në a ukiya, ëgaandya ukunka ufuma u ng'ë në nkaku. 15Nanë aarë meeri akwatwa na uremwa gihoma na nkungu, gugamërekea na gugatowa kunë meeri asëë injë. 16Na gugakëa fang'ë gikëngëyo ga gatumbë në ganyui nëgëmukhatëkhatë a irambo rina rayo Kauda, gudahe urëeta ifango rasëë ra masua ëgweeso gwa ukhasëki üküü. 17Veeso vëgamëuta masua unto a meeri na vëgamëtungëëra na maghavaa. Uvii, vëgaoghofa vataje veeso vaje uhoofea girundo ra mahanganga nërëutaanwa Siriti, veeso vëgasimia igwe ra uëmëchëya meeri na vëgamëreka meeri ëambamywe na nkungu. 18Mwino sese arë gukhuwa gwa nguu a nkungu, fadiu ayo veeso vëgaandya ujughuta mëëgho unji. 19Na itiku ra gatatu veeso gwa mëkhono ao vëgajughuta maife a meeri. 20Nanë aarë mbesa yuva mba njota itinagighea gwa matiku maingë, nkungu nküü ëgafwaghëëra ukunka ino, nkumbu ya utyoeka igaguhirëa.

21Mwino veeso vinalia malëwa gwa itungo ririfu, Faulo agaëmëka usonge mukhatë ao na agahanya, “Aghosya, nyenye arë mufenjiwa muntegheeye nene, na naamutiufenjiwa uandya muhënjo ufuma uKirete na uhanga nkhomee ëyëë nanë ukhafëki urui. 22Itungwee nene ngumuromba mukhamie nkhoo. Gusoko gutie mukhatë anyu nyenye nëukuya, ëgweeso meeri gutufu ëuruëka tukutuku. 23Gusoko utiku urui wa reo waëmëkaa fifë nanee malaëka wa Muungu në nene në wakwe na nene ngumukuryaa, 24na mweeso agahanya, ‘Utaoghafee, Faulo inoneye veve wëmëke usonge amwa Kaisari; na raava, Muungu wagufee veve vasaa voong'e në mwë muhënjo umwe navee.’ 25Uvii khamii nkhoo, aghosya, gusoko nëkweti uhuvëi kunë Muungu mwino ëutendeka viuyi mwino arë mweeso wankhanëe. 26Ëgweeso sese gwinje uhunuwa gunto a itumbë rëngëja nërëmukhatëkhatë a irambo.”

27Naarë utiku wa itiku ra ikumi na gane rafika, mwino sese arë gumanchiywe girambo ra Adiriano, gënya utiku wa mukhatë atendi mwëëmo va u meeri vëgaghema anju urë gwahumbea ung'ë në nkaku. 28Uvii veeso vëgafiima gëjota ga majë ga girambo vëgahanga mita makumi ane; gukufëi vëgaghumëa kangë gëfimo na vëgahanga mita makumi atatu. 29Na gwa goghoofa mwino fangëja meeri injë utua ng'ongo ya mung'ë a majë, veeso vëgasimia magwe ane a uëmëchëya meeri unyuma a meeri, na vegaromba uche urë. 30Na mwino atendi mwëëmo va u meeri arë vëufenja utëja, na vegaghumëa masua girambo, gwa gitendya mwino vegaghumëa igwe ra umëmechëya meeri, 31Faulo agamukhanëa müküü në munyui wa asikai nanë asikai, “Nëmbesa antu avai vadëa usagha mung'ë a meeri, nyenye mutiudaha utyoeka.” 32Uvii asikai vëgatëna maghaava a masua, na vëgamëreka nyeeso ende.

33Mwino arë gwahumbea ucha, Faulo agavanena veeso voong'e ulya malëwa, uguhanya “Reo në itiku ra ikumi na gane në nyenye mwafwaghëëra udëa ulya gëntu mbanduvë. 34Gwa uvii nene ngumunena nyenye mulye malëwa; ërëi rinjë umufa nyenye nguu, gusoko gutie ujëë mpa rumwe nëuguyaghaa ufuma gitwe ra umwedu mukhatë anyu.” 35Nanë aarë mweeso warighëëtya uyi, agahoa mukaate, na gwa ufunya asi kunë Muungu usonge ao voongë agauaghania na agaandya ulya. 36Uvii veeso voong'e vëgakhamia nkhoo na vëgalya malëwa veeso aghonjo. 37(Sese soong'e arë gwë antu maghana avëë na mutandatu mung'ë a meeri.) 38Nanë aarë veeso valya vikuta, vëgakefia urito wa meeri, gwa ughumëa ngano mung'ë a irambo.

39Në naarë wacha, atendi mwëëmo va u meeri vënamanyaa ng'ë asëë, ëgweeso veeso vëgaona ikungughu itambëëmwe na mahangahanga, unë veeso vëgaramwua nëmbesa yudahëka vëmëtoe meeri vende umëhaghamëya u mpeo a irambo. 40Uvii veeso vëgaghumëa magwe a umëmëchëya meeri vëgareka mung'ë a irambo, na itungo ërëëro ërëëro vëganyonyoa maghaava në atungie ifoteo; uvii vëgahumbua unto mwenda në urifu wa ukënaëëya nkungu na vëgaghooka u mpeo a irambo. 41Vëgafika kunë mëomo ëvëë a marambo ëtuanëye. Ëgweeso meeri ëgatua irundo ra mahangahanga na vëgaghumëa intu në irito fang'ë. Songe a meeri ëgahoofea na ëgaremwa utunguya, na nyuma a meeri ëgatamuka mafëgha gwa utuwa na nguu ya mafefe a nkungu. 42Na asikai vasaa arë vina mufango wa uvauragha atungwa, muntu nanë umwedu ataje ambame na utëja. 43Ëgweeso müküü në munyui wa asikai, gwa ufenja umutyoa Faulo, agavaraghëëya veeso vatatende mwino arë mufango wao urë. Mweeso agavaraghëëya vasaa nëvadahëte uambama vighumëe tanju aghonjo vakengee ung'ë në nkaku, 44na vangëja nënaa vasaghaa, vangëja vëganatëa u mafango na vange vëganatëa u mafëgha a meeri. Na uvii antu voong'e vëgatyoeka vëgafika u mpeo a irambo gwa majëghana.

Currently Selected:

Nte 27: RNT

Highlight

Copy