Nte 28

Nëamuhangie Faulo kuuko u Malita

1Narë sese gwatyoeka, uvii sese gugamanya mwino itumbë rasee nënaa rë mukhatëkhatë a irambo arë rëutaanwa Malita. 2Na anyang'ë va ung'ë asëë vëgaguraghëëra sese gëhëë gëkuu, gusoko veeso vëgagufembeya moto na vëgagughenyifa sese song'e, gusoko mbua ëgaandya ukhua na arë mpefo. 3Faulo agahangwëya gëringa ga nkwë na agagëghumëa u moto, njokha ëgafuma unji a gëringa gusoko a mututu wa moto na ëgamutunga Faulo u mukhono. 4Naarë aghonjo va ung'ë asëë vaona njokha asëë ëning'ënie u mukhono wakwe, veeso vëgagikhanëa mu muntu na muuyakwe, “Gutie ntenga muntu uyi urë wauraghie muntu. Nambesa mweeso wafonie ufuma u hotota agirambo, tutë ëtiumurekea mweeso aduve.” 5Mbesa uvii, mweeso, agamëfaghwëëra njokha u moto na ainavarywa mpa gunyui. 6Veeso vëgarindëa, vëughema mwino mweeso uguimba mba ugwa fang'ë gënyahaafo na ukuya. Ëgweeso naarë vaindëa gwa itungo ririfu na vëgaona gutie intu në ivë nëramuhangaa, veeso vëgafeura masëgho ao na vëgahanya mwino mweeso arë muungu.

7Na fifë na itumbë rasëë arë gwina mëghunda a mutemi wa itumbë rasëë, në rëmukhatëkhatë a irambo, rina rakwe Fubulio. Muntu uyi agagughenyifa sese na agagutendea gëhe gëkuu gwa matiku atatu. 8Ëgadwëëra mwino ihe wamwa Fubulio arë uree uwaire na ugufanja saghami. Na Faulo againgëa mung'ë a nyumba na agaromba, na agaëka mëkhono akwe unto akwe na agafora. 9Nanë aarë ërëë ratendeka, antu vangëja në va gitumbë rasëë unë arë vakweti arue noo vëgaja na vëgaforiwa. 10Veeso vëgagufa sese zawadi nyingë. Nanë aarë sese gwauka, veeso vëgaëka unto a meeri mu gëntu në sese arë gugësëghëte.

Ufuma u Malita faka uRumi

11Naarë meeri ëtatu akëa sese gugauka na meeri a Alekisanda, në arë ikhaire gitumbe rasëë itungo ra mpefo. Na gëmanyëko ga meeri arëë Aruna va Mafaha. 12Gugafika u muji wa uSirakusa, sese gugagikha haafo matiku atatu. 13Ufuma haafo gugafimuka na gugafika uRegio. Na nënaa rakëa itiku rëmwedu nkungu a utaghama ëgakunka, na itiku ra gavëë sese gugafika uPuteoli. 14Haafo gugahanga ahuvëi, na vëgagughenyifa sese na gugagikhaa itambëëmwe na veeso gwa matiku mufungatë. Na vii sese gugafika uRumi. 15Na ahuvëi va kuuko, naarë veeso vagutegheeya sese, vëgaja ugusëngëëya sese faka uSoko ra Apio, na uMëgakhawa a Etatu Aghenyi utang'ana ginao. Naarë Faulo wavaona veeso agamurumba Muungu na agahanga nguu. 16Nanë aarë sese gwafika u muji wa uRumi, Faulo agayanjëywa gikhaa mweeso iyenedu, itambëëmwe na musikai umwedu wa umughoja.

Faulo u muji wa uRumi

17Naarë matiku atatu akëa Faulo agavaëtana itambëëmwe atongeeri va Ayahudi; nanë aarë veeso vihangwëya, mweeso agavakhanëa, “Aruna ane, nambesa nene ntinatendaa gëntu nëgëhiya na antu mba ntende ya vatata vitu, kë nene ngakwatwa nëtungiwe ufuma uYerusalemu na ngaëkwa u mëkhono a aRumi. 18Naarë veeso vambuënkëya nene, vëgafenja untungwëra nene, gusoko na gutie soko a umburagha gusoko a isauri rane ërëi. 19Ëgweeso naarë Ayahudi vahita nene nëtungwërwe, nene nëgaumëëywa uromba nende utegheeywa na Kaisari, nambesa arë ntikweti intu ra usitaaka ndughu ane. 20Gwa uvii gusoko ëyëë nene narombaa gutang'ane ginanyu na urighëëtya itambëëmwe nanee, vii në gusoko a ighonje ra Isiraeli uvii nene nëtungiwe itambëëmwe na mëkhua ëyëë.” 21Na veeso vëgamukhanëa, “Sese gwinahangaa keeti ufuma u Yuda nëigughokee vee, na gutie munyandughu mba umwe nëwajie hafai ueta sayu nëmbë nëëgughokee veve. 22Ëgweeso sese gwina nkumbu utegheeya ufuma kunë veve mwino masëgho ako arë; gusoko gwa uhonga na ikhakho ërëi sese gumanyie mwino ng'andë yoong'e antu vëurërighëtya ivë.”

23Naarë veeso vaëka itiku ra utaana ina Faulo, vëgaja kunë mweeso fana në arë ugikhaa, iburi riküü ra antu. Na ufuma diu faka mpëndë agavadonëa daaji mantu, uguvasudangëa sayu nëëghokee utemi wa Muungu. Mweeso agaëghëëya uvafema veeso vayanje sayu nëëmughokee Yesu uguvaraghëëra ufuma seria amwa Musa nanë ufuma anyagëdaghu. 24Na vangëja vëgarumëya asaa naarë mweeso ugurighëëtya, kunu vangëja vinahuvëa. 25Uvii, mwino veeso vëgadëa giyanjëya mukhatë ao aghonjo, veeso vëgauka vëgaenda kunë vinjë, naarë Faulo warighëëtya ukhani rumwedu, “Mwahu Mweru ainahutya nëuguhanya kunë vatata vanyu ukëërëa munyagëdaghu Isaya:

26‘Endi gwa antu avai, na uhanya,

Nyenye mwinjë utegheeya tutë ëgweeso

mutiumanya kamwe,

na nyenye mwinjë urarava tutë ëgweeso

mutiona kamwe.

27Gusoko nkhoo ya antu avai yatendëkie mputu,

na matwë ao maito gwa utegheeya,

na miho ao akunëkiwe,

mbesa veeso vëtaje uona gwa miho ao,

na vataje utegheeya gwa matwë ao,

na vataje umanya gwa nkhoo yawe,

vafëtuke kunë nene na uvaforya veeso.’

28Uvii nëëmanyëke kunë nyenye mwino utyoi urui wa Muungu watuwe gwa antu va ndughu ingëja nëti Ayahudi. Veeso vinjë utegheeya.” [ 29Faulo naarë wadaha urighëëtya uyi, Ayahudi vëgatunguya, kunu vëgikünguma gwa ukhai veeso gwa veeso.]

30Na mweeso agagikhaa kuuko mëakha ëvëë oong'e gwa girëfeya hela ya nyumba mweeso mughonjo. Mweeso agavaghenyifa voong'e unë vajie kunë mweeso, 31ugutanantya utemi wa Muungu nanë usëya sayu nëëmugokee Yesu Kiristo gwa daaji na uhaghaaro.

Currently Selected:

Nte 28: RNT

Highlight

Copy